Вы тут

Лірнік вясковы


Будзеш жыць! Будуць векі ісці за вякамі, —

Не забудуцца дум тваіх словы,

Як і слоў беларускіх, жывучы між намі,

Не забыўся ты, лірнік вясковы...


Гэтыя радкі Янка Купала прысвяціў Уладзіславу Сыракомлю. Пясняр называў Сыракомлю першым у спісе паэтаў, якія аказалі на яго найбольшы ўплыў.

Пра жыццё і творчасць паэта расказвае экспазіцыя літаратурнага музея ў Смольгаўскай школе Любанскага раёна. У школьным двары ўстаноўлены памятны камень, а на сцяне будынка — памятная дошка: «У в. Смольгаў нарадзіўся беларуска-польскі паэт Уладзіслаў Сыракомля (Людвік Кандратовіч) 29.09.1823 — 15.09.1862».

Псеўданім Сыракомля паэт узяў у знак павагі да радавога герба сямейства Кандратовічаў. Такі герб, выразаны на дрэве мясцовымі ўмельцамі, і мноства іншых экспанатаў — архіўных здымкаў, друкаваных выданняў, копій рэдкіх дакументаў — прадстаўленыя ў экспазіцыі музея земляка, паэта-патрыёта, краязнаўца, перакладчыка, майстра баладна-гутарковай формы.

У жанры «народная гутарка» (так пазначыў сам аўтар) напісаны яго вядомы твор «Паштальён». У розных краінах гэты запісаны паэтам расказ ведаюць як папулярную рускамоўную песню «Когда я на почте служил ямщиком».

Працы Сыракомлі перакладалі ў розныя часы мінулых стагоддзяў, у яго гонар названыя вуліцы ў Мінску, Навагрудку, Нясвіжы, Стоўбцах, Вільнюсе, Варшаве.

Вельмі актуальным зваротам для ўсіх пакаленняў на ўсе часы гучыць сёння напісанае Уладзіславам Сыракомлем у 1857 годзе: «Ганебны сорам не ведаць усёй зямлі, на якой мы жывём, або яшчэ горш, ведаць лепш чужыя краіны, чым сваю».

Гэтымі днямі на малой радзіме паэта і ў Любані праводзіўся круглы стол «Малая радзіма Уладзіслава Сыракомлі: 195-годдзе з дня нараджэння», арганізаваны ўпраўленнем па адукацыі, спорце і турызме Любанскага райвыканкама, Мінскага абласнога інстытута развіцця адукацыі пры ўдзеле Саюза пісьменнікаў Беларусі.

Здымкі зробленыя ў вёсцы Смольгава. На фота — некаторыя экспанаты ўнікальнага школьнага музея, яго інтэр'ер. Адзін са здымкаў знаёміць з Палінай Немальцавай — вучаніцай Любанскай школы № 3. Дзяўчына прадстаўляе распрацаваны даследчы праект «Малая радзіма «Лірніка вясковага»». Гэты праект — вынік вывучэння літаграфій Напалеона Орды, матэрыялаў Нацыянальнага гістарычнага архіва Беларусі, перапіскі з нашчадкамі паэта.

Яўген Пясецкі, фота аўтара

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.

Калейдаскоп

Вясёлыя гісторыі чытачоў

Вясёлыя гісторыі чытачоў

Класiкаў трэба ведаць…, Быў бы араты, будзе й прыганяты, Па малiну…