Вы тут

Як працуе камісія па садзейнічанні занятасці насельніцтва на Лепельшчыне


Дзеля рэалізацыі Дэкрэта Прэзідэнта Рэспублікі Беларусь № 3 «Аб садзейнічанні занятасці насельніцтва» ў раёне створана адмысловая камісія, якую ўзначальвае старшыня раённага Савета дэпутатаў Ігар Урбан, піша «Лепельскі край».


 

Фота: lepel-kraj.by

Перад членамі камісіі — непрацуючы жыхар адной з вёсак Лепельскага сельсавета Арцём. Апошняе месца працы — філіял «Лепельскі» ААТ «Віцебскаграпрадукт». Стропальшчык — запатрабаваная прафесія, ёсць варыянт і перавучыцца. Пад ляжачы камень вада не бяжыць. Арцёму параілі не цягнуць час, а праглядаць вакансіі. У сваю чаргу члены камісіі будуць трымаць пытанне працаўладкавання Арцёма на кантролі.

... У лепяльчаніна Віталя таксама нядрэнная прафесія — слесар-сантэхнік. У цяперашні момант даглядае хворую маці, аднак з афіцыйнай работы па доглядзе яго нядаўна звольнілі. У сям'і праблемы, маці часта тэлефануе ў міліцыю са скаргай, што сын не працуе. Адным словам, калі называць рэчы сваімі імёнамі, жыве на ўтрыманні ў састарэлай маці.

— На маю думку, не зусім этычна жыць за кошт хворай маці, — спрабуе дастукацца да мужчыны Ігар Урбан. — Бо можна звярнуцца ва ўпраўленне па працы, занятасці і сацыяльнай абароне райвыканкама, дзе вам прапануюць вакансіі або магчымасць прайсці перанавучанне. Акрамя таго, нагадаю, што, згодна з Дэкрэтам № 1, з першага студзеня працаздольныя непрацуючыя грамадзяне будуць цалкам аплачваць субсідаваныя дзяржавай камунальныя паслугі. Так далей жыць нельга ні па этычных, ні па маральных нормах. Калі ёсць жаданне, працаваць вы будзеце заўсёды. У новай краме «Дыяніс», напрыклад, вісіць аб'ява аб вакансіі грузчыка. Чаму б не схадзіць туды і не пахадайнічаць за сябе, не спадзеючыся на кагосьці?

Да мяне і цяпер звяртаюцца з просьбай працаўладкаваць чалавека. Дапаможаш, а праз некаторы час з-за паводзін нядбайнага работніка сорамна кіраўнікам у вочы глядзець. Патэлефануем, паклапоцімся, але не больш як адзін раз. Прыходзьце са спісам неабходных дакументаў у цэнтр занятасці, а варыянт працаўладкавання заўсёды можна падабраць.

Станіславу, які жыве ў адной з вёсак Горскага сельсавета, крыху за пяцьдзясят. Пастаянныя скандалы ў сям'і з братам, які папракае Станіслава ва ўтрыманстве. Сітуацыя няпростая. Цяжкую працу мужчына па стане здароўя выконваць не можа, але няма сведчанняў і для афармлення інваліднасці. Зрэшты, па вонкавым выглядзе Станіслава лёгка выказаць здагадку, што здароўе было падарвана ў сяброўстве з чаркай. У свае «крыху за пяцьдзясят» выглядае на дзясятак гадоў старэйшым. Вясковец запэўніў, што апошнім часам з алкаголем «завязаў».

Члены камісіі паспрабуюць дапамагчы знайсці нескладаную работу. Для Станіслава ж выбар просты. Адновіць стасункі з алкаголем — з'едзе ў лячэбна-працоўны прафілакторый, калі не — усе шанцы выбрацца з багны.

У Аляксандра з вёскі Бароўскага сельсавета жыццёвая дарога таксама напоўнена ямамі і выбоінамі: злоўжыванне алкаголем, знаходжанне ў ЛПП, работа ў КУПП «Бароўка», звальненне па артыкуле. Як вынік — адсутнасць работы і «прысутнасць» вялікай запазычанасці за кватэру.

Лепяльчанка Святлана ў свой час атрымала ад дзяржавы сацыяльную кватэру, бо мела статус сіраты. Здавалася б, жыві і радуйся. Праўда, затым з-за нявыплаты камунальных паслуг выгоды былі адключаныя. Аднак на камісіі жанчына запэўнівала, што з запазычанасцю расплацілася і зрабіла рамонт. На апошнім месцы працы замяшчала прыбіральшчыцу на час адпачынку. Святлана ведае швейную справу і ўладкавацца пры жаданні можна. Ёсць і магчымасць прайсці перанавучанне. Адна праблема — біць лынды не атрымаецца. Зрэшты, жаданне працаваць у вачах Святланы чыталася даволі выразнае, а гэта — галоўны аргумент на яе карысць.

Анатолю, жыхару адной з вёсак Лепельскага сельсавета, у хуткім часе споўніцца шэсцьдзесят. Яго было шчыра шкада: працавіты мужчына са стажам больш за сорак гадоў трапіў у няпростую жыццёвую сітуацыю. Выплаты па трэцяй групе інваліднасці невялікія, трэба работу шукаць. Яму прапанавалі падысці ў цэнтр занятасці.

— Работа з асацыяльнымі элементамі ў раёне арганізавана на належным узроўні, — упэўнены Ігар Урбан. — Цесная сувязь існуе паміж прадстаўнікамі гарадскіх і сельскіх пунктаў аховы грамадскага правапарадку, упраўленнем па працы, занятасці і сацыяльнай абароне райвыканкама. Тут важна памятаць, што ўсё залежыць ад чалавека. У нас няма самамэты змагацца з такімі людзьмі, мы змагаемся за тое, каб дапамагчы ім знайсці работу і змяніць жыццё да лепшага.

Падрыхтавала Вольга АНУФРЫЕВА

Загаловак у газеце: «Неэтычна жыць за кошт хворай маці»

Выбар рэдакцыі

Грамадства

Як выхаваць даследчыка за школьнай партай?

Як выхаваць даследчыка за школьнай партай?

Чаму ўсе краіны, якія развіваюць інавацыйную эканоміку, робяць сёння стаўку на STЕM? 

Палітыка

Аляксандр Лукашэнка сустрэўся з прадстаўнікамі СМІ Расіі

Аляксандр Лукашэнка сустрэўся з прадстаўнікамі СМІ Расіі

Некалькі рэчаў сёлета адбываюцца ўпершыню.

Грамадства

Ці набудуць у гаспадароў старыя хаты?

Ці набудуць у гаспадароў старыя хаты?

Адэльскі сельскі савет, што ў Гродзенскім раёне, можна назваць брамай у Еўрасаюз.