Вы тут

Адпачынак на беларускім моры: жэставая мова, лячэбная ежа і шоп-туры


Заслаўскае вадасховішча, якое большасць беларусаў называе Мінскім морам, я заўжды ўспрымала як месца, дзе можна адпачыць: паплаваць, пасмажыць шашлыкоў, згуляць у пляжны валейбол... Усяго і трэба, што на дзесяць кіламетраў ад сталіцы ад'ехаць. А сёлета я даведалася, што на нашым моры можна яшчэ і аздаравіцца. Дастаткова некалькі хвілін прайсціся па яловай алеі ад галоўнага корпуса санаторыя «Прыморскі», каб трапіць на пляж і ад душы наплавацца пасля працэдур ці проста паваляцца пад сонцам на лежаках.


ЛФК на вуліцы, рол-шэйп для рук

Ледзьве мы з Валерыяй Нікіцюк, спецыялістам аддзела інфармацыі тураператара «Аўтаматызаваныя тэхналогіі турызму», выйшлі з машыны, як нас адразу павялі на заняткі па лячэбнай фізічнай культуры (ЛФК). Гэтай працэдуры, якую, калі дазваляе надвор'е, стараюцца праводзіць на вуліцы, тут удзяляюць столькі ўвагі, што хочуць зрабіць яе адным з асноўных кірункаў дзейнасці санаторыя. Тым больш што праз запатрабаванасць групы ЛФК займаюцца ў
3-4 змены, каб умясціць усіх ахвотных, а заняткі вядуць прафесійныя ўрачы.

Размяўшы косці, мы з Валерыяй рушылі ў будынак прымаць іншыя працэдуры. Амаль усе яны тут так ці інакш лечаць арганізм. Нездарма ж мы ехалі сюды займацца медыцынскім турызмам.

Мне дастаўся «Рол-шэйп» — агрэгат для вібрамасажу ступняў і кісцей рук. Спачатку было козытна і прыемна, а калі прапанавалі дадаць эфект з антыцэлюлітнай праграмы — падалося, што скура пачала жыць асобным жыццём. Пасля адчувала сябе так, быццам мяне крыху патаўклі.

Валерыя ў гэты час млела на кушэтцы для выцягвання пазваночніка. Нягледзячы на шматабяцальную назву, косці тут не хрусцяць і жылы не цягнуцца. На пазванкі ўздзейнічаюць далікатна і бязбольна, а яшчэ ёй уключылі падагрэў кушэткі і вібрацыю... Поўнае расслабленне. «У мяне быццам шарыкі ўздоўж пазваночніка пабеглі... А цяпер маленькі слонік тапоча ножкамі. Здаецца, станаўлюся лягчэй», — каменціравала свае адчуванні Валерыя.

Басейн без басейна

За незвычайнымі для нас уздзеяннямі на арганізм час незаўважна падышоў да абеду. У «Прыморскім» — толькі лячэбная ежа, каб лепш засвойваўся эфект ад працэдур, запэўнілі нас у сталовай. Ніякага смажанага-вострага — толькі спалучэнне аздараўленчага з карысным. З таго, што нам давялося каштаваць, магу засведчыць, што гэта сапраўды смачна і на выгляд звычайна: боршч, пюрэ, катлета, салата...

Каб не расслабляцца пасля ежы, пайшлі аглядаць спартыўную гаспадарку санаторыя. Бо, як сказаў Сяргей СКУРАНОВІЧ, галоўны ўрач санаторыя «Прыморскі», «лячэнне трэба абавязкова спалучаць з актыўным адпачынкам». Мы накаталіся на роварах, згулялі ў настольны тэніс і нават невялічкі аэрахакей.

Узбадзёрыўшыся, пайшлі купацца. Ну як жа прыехаць на Мінскае мора і не паплаваць... Тым больш што ў санаторыі няма ўласнага басейна.

— Двойчы на тыдзень мы возім сваіх гасцей у басейн «Ракета» і штотыднёва — у аквапарк. І гэтыя наведванні ўваходзяць у цану пуцёўкі, — расказаў галоўны ўрач, як яны выходзяць са становішча. — У пуцёўку, арыентаваную на пашыраную медыцынскую праграму, уключаны таксама паслугі ў медыцынскім цэнтры Кіравання справамі Прэзідэнта, што ў Ждановічах, цэнтры бальнеалячэння і ў 12-й стаматалагічнай паліклініцы. Мы хочам, каб адпачывальнікі атрымалі як мага больш прафесійных лячэбных працэдур.

Наплаваўшыся ды згуляўшы ў валейбол, мы рушылі адпачыць на тэрасе над першым паверхам санаторыя. Паваляліся на лежаках, пагушкаліся на арэлях-канапе і нават паплёскаліся ў джакузі.

Рай для слабачуючых

Так называюць санаторый, што належыць таварыству глухіх, наведвальнікі, якія маюць праблемы са слыхам. Хоць такіх у «Прыморскім» толькі некалькі працэнтаў, увесь персанал валодае жэставай мовай, якая, як кажуць, вельмі дапамагае, калі трэба «дакрычацца» да калегі на вуліцы.

«Прыморскі» пазіцыянуецца як месца для ціхага сямейнага адпачынку. У адным памяшканні тут і працэдуры, і жылыя пакоі, і сталовая. Аднак гэта не значыць, што адпачывальнікі замыкаюцца ў невялікай прасторы санаторыя. Да Мінска адсюль 20 кіламетраў, таму для гасцей на санаторных маршрутках арганізоўваюць экскурсіі па сталіцы і наваколлі. Днём на чатыры гадзіны можна проста самастойна выехаць паблукаць па гораду ці зладзіць шоп-тур, а ўвечары — наведаць тэатр.

Паколькі выезд з санаторыя на экскурсіі мы не планавалі, пайшлі лячыцца далей. Стоўнтэрапія — масаж цёплымі камянямі — прыемна расслабіў. А спелеапакой, сцены і падлога якога зроблены з гімалайскай солі, замацаваў адчуванне, што мы ўжо, мусіць, нааздараўляліся. Каб лепш надыхацца і насыціцца спецыяльным сухім паветрам пакоя, тут трэба не ціхенька рэлаксаваць пад музыку, а размаўляць. А нам жа толькі дай пагаварыць... Так што выканалі працэдуру на «выдатна».

Аздараўляцца як мага даўжэй

На гэтым лячэнне не скончылася. Валерыю паставілі пад моцныя струмені душа Шарко — як яна пішчала, было чуваць і за дзвярыма. Я ж сабе спакойна сядзела ў сухой вуглякіслай ванне. Гэта ёмістасць, з якой толькі галава тырчыць, а цела ў гэты час насычаецца газам. Кажуць, добра дапамагае тым, у каго вялікія фізічныя і псіхаэмацыянальныя нагрузкі, вось і разгружалася.

— Спецыялісты санаторыяў і курартолагі рэкамендуюць аздараўляцца і адпачываць як мага даўжэй. Раней пуцёўка была 24 дні, пасля стала скарачацца да 21 дня, 18 і нават 12 — гэта ўжо мінімальны тэрмін для лячэння і медыцынскага турызму, — лічыць Вольга ШУППО, начальнік санаторна-куротнага аддзела прадпрыемства «Аўтаматызаваныя тэхналогіі турызму». — Такія перыяды прыдуманы нездарма, каб не нанесці шкоду арганізму, каб ён паралельна з лячэннем адпачываў. Тым больш што ў санаторыях, як правіла, шыкоўная дыягнастычная база. Многія тут за гадзіны праходзяць даследаванні, на якія дома аддалі б тыдні, асабліва людзі з глыбінкі.

Неўзабаве праляцеў цэлы дзень, насычаны лячэннем і адпачынкам. І прыемна стомленая сяброўка наступным разам вырашыла адправіцца на экскурсію ў Брэст, каб праехацца па гістарычным цэнтры горада і прайсці па Брэсцкай крэпасці, жыхары якой сустрэлі крывавы пачатак вайны.

Інтэрнэт-тэлебачанне для турыстаў

Знайсці месца адпачынку па гусце і выбраць, куды рушыць вандраваць, цяпер можна ў рэжыме анлайн кругласутачна. Беларускі канал пра турызм і адпачынак запрацаваў у краіне ў Міжнародны дзень турызму, 27 верасня.

На партале http://tv.sanatorіі.by/ можна ўбачыць самыя разнастайныя сюжэты: ад маляўнічых айчынных краявідаў да ўнікальных методык лячэння ў санаторыях, ад экскурсій па знакавых і гістарычных месцах краіны да інтэрв'ю з урачамі.

— Нашы супрацоўнікі пабывалі ва ўсіх куточках Беларусі і сабралі дэталёвую інфармацыю пра ўсе аб'екты адпачынку. За больш як тысячу камандзіровак па краіне мы стварылі каля 10 тысяч відэаролікаў, якія можна пабачыць на нашым Youtube-канале https://www.youtube.com/user/sanatorііby, —  расказала Марына ГНЕДАЯ, дырэктар прадпрыемства «Аўтаматызаваныя тэхналогіі турызму».

Ірына СІДАРОК

Выбар рэдакцыі

Грамадства

Як выхаваць даследчыка за школьнай партай?

Як выхаваць даследчыка за школьнай партай?

Чаму ўсе краіны, якія развіваюць інавацыйную эканоміку, робяць сёння стаўку на STЕM? 

Палітыка

Аляксандр Лукашэнка сустрэўся з прадстаўнікамі СМІ Расіі

Аляксандр Лукашэнка сустрэўся з прадстаўнікамі СМІ Расіі

Некалькі рэчаў сёлета адбываюцца ўпершыню.

Грамадства

Ці набудуць у гаспадароў старыя хаты?

Ці набудуць у гаспадароў старыя хаты?

Адэльскі сельскі савет, што ў Гродзенскім раёне, можна назваць брамай у Еўрасаюз.