24 Верасень, панядзелак

Вы тут

Адсвяткаваць дзень нараджэння Мінска можна будзе спартыўна


8 верасня на пляцоўцы каля Палаца спорту з самай раніцы разгорнецца сапраўдны спартыўны горад. Там будуць прадстаўлены розныя віды спорту. Вядомыя спартсмены і прадстаўнікі федэрацый правядуць майстар-класы і арганізуюць спаборніцтвы, прыняць удзел у якіх змогуць не толькі прафесіяналы, але і кожны жыхар і госць сталіцы. Плануецца, што маштабныя спартыўныя мерапрыемствы прадоўжацца да вечара.


Баскетбол (9.30 — 18.30)

На арэне пад купалам каля Палаца спорту ў рамках фінальнага этапу Нацыянальнай лігі па баскетболе 3х3 адбудуцца спаборніцтвы тэставага турніру Еўрапейскіх гульняў — 2019. За чэмпіёнства ў катэгорыі «Дзяўчаты» пазмагаюцца 6 замежных калектываў і чатыры наймацнейшыя айчынныя каманды. Беларусь прадставяць адразу дзве нацыянальныя дружыны: за асноўную згуляюць Наталля Дашкевіч, Таццяна Ліхтаровіч, Настасся Сушчык, Дар'я Магаляс, за маладзёжную — Арына Масько, Ганна Лапо, Аляксандра Шумейка, Паліна Макрыцкая.

У мужчынскай частцы спаборніцтваў варта звярнуць асаблівую ўвагу на катэгорыю «Эліта», сярод 10 заяўленых каманд дзве ўкамплектаваны гульцамі нацыянальных зборных Беларусі.

У самай масавай катэгорыі «Агульная» выступяць 32 дружыны.

На пляцоўцы будзе працаваць гульнявая зона для малых і Дзіцячая баскетбольная акадэмія для дзяцей ва ўзросце ад трох да шасці гадоў. У рамках мерапрыемства адбудуцца паказальныя выступленні майстроў варкаўта, брэйк-данса і ВМХ, груп падтрымкі.

Ролікі (11.00 — 15.00)

Масавы забег пройдзе на праспекце Пераможцаў. Удзел у ім змогуць прыняць і дзеці, і дарослыя. Трэба будзе пераадолець дыстанцыі ад 1 да 16 кругоў. Адзначым, што забег адбудзецца па правілах канькабежнага спорту, дзе першы круг — размінкавы або фестывальны, на якім забаронены абгон спартсмена пад першым нумарам, астатнія кругі спаборніцкія. У забегу прымуць удзел прадстаўнікі Беларусі, Францыі, Нідэрландаў, Расіі і Украіны.

З 13.00 пачнецца работа гульнявых зон, паказальныя выступленні ролераў. Майстар-клас па катанні на роліках правядуць удзельнікі Алімпійскіх гульняў 2018 года — вядучыя прадстаўнікі канькабежнага спорту краіны Марына Зуева, Віталь Міхайлаў, Ігнат Галавацюк, Таццяна Міхайлава.

Веславанне (11.00)

У цэнтры Мінска, на рацэ Свіслачы, каля праспекта Пераможцаў, у суботу адбудзецца прэзентацыя паруснага спорту і спаборніцтвы па веславанні на байдарках і каноэ «Зорная рэгата». Славутыя беларускія спартсмены, чэмпіёны свету і Еўропы будуць спаборнічаць у розных дысцыплінах на дыстанцыі 200 метраў. Акрамя спаборніцтваў прафесійных спартсменаў пройдуць заезды на драганботах — 12-мясцовых кітайскіх лодках-байдарках.

Валейбол (11.00)

На зялёнай зоне паміж будынкамі па праспекце Пераможцаў, 2 і асфальтавай пляцоўцы пройдзе майстар-клас: выхаванцы СДЮШАР навучаць навыкам гульні ў валейбол усіх ахвотных гасцей і ўдзельнікаў свята. На пляцоўцы таксама пройдзе аўтограф- і фотасесія з гульцамі жаночай валейбольнай каманды «Мінчанка».

Для гасцей будзе працаваць яркая тэматычная фотазона, а забаўляць наведвальнікаў будзе клубны маскот жырафа Жора.

Сілавы экстрым (11.00 — 15.00)

На адкрытай пляцоўцы каля Палаца спорту адбудзецца ўжо традыцыйны міжнародны турнір па сілавым экстрыме «Mіnsk Ореn Сuр» — 2018. Сёлета за кубак Мінска пазмагаюцца наймацнейшыя стронгмены з шасці краін — Беларусі, Расіі, Украіны, Грузіі, Літвы і Польшчы. Спартсмены пакажуць сябе ў чатырох асноўных практыкаваннях, самым відовішчным з якіх стане трэк-пул легкавых аўтамабіляў у счэпцы (арм-авер арм) агульнай вагой восем тон.

Стрыт-варкаўт (11.00)

На асфальтавай пляцоўцы каля Палаца спорту адбудуцца паказальныя выступленні студэнтаў БДУФК, спартсменаў — навучэнцаў спецыялізаваных вучэбна-спартыўных устаноў: усходнія віды адзінаборстваў, акрабатыка, аэробіка, спартыўныя танцы, чарлідынг.

У тэму

Анастасія Марыніна, генеральны сакратар — выканаўчы дырэктар ГА «Беларуская федэрацыя баскетбола»:

— Palova-арэна заўсёды прымае самыя топавыя спаборніцтвы, яна ўжо вядомая ва ўсім свеце. У 2015 годзе прымала чэмпіянат Еўропы, у наступным годзе там адбудуцца Еўрапейскія гульні. Нам прыемна, што ў рамках такога выдатнага свята госці сталіцы, прыхільнікі спорту змогуць убачыць адны з найлепшых камандаў Еўропы. Баскетбольная барацьба будзе відовішчная, займальная, кожны матч доўжыцца не больш за 25 хвілін, таму гэта будзе вельмі дынамічна. Гульня будзе ісці паралельна адразу на шасці кортах.

Сяргей Ляпешка, старшыня федэрацыі сілавога экстрыму Мінска і Мінскай вобласці:

— Мы праводзім турнір ужо на працягу шасці гадоў менавіта ў дзень горада. Збяруцца ўсе чэмпіёны сваіх краін. Праходзіць спаборніцтвы будуць у амфітэатры, дзе будуць прысутнічаць спевакі і дзве групы чарлідынгу, якія будуць разбаўляць выступленні асілкаў. Запланаваны конкурсы для гледачоў, нескладаныя, але ўсе будуць атрымліваць прызы. Спаборніцтвы ў нас будуць нестандартныя з незвычайнымі снарадамі, так што будзе цікава, будзем рады ўсіх бачыць. З кожным годам мерапрыемства праходзіць усё больш насычана, думаю, вам спадабаецца.

Аляксандр Наваковіч, намеснік старшыні ГА «Беларускі саюз канькабежцаў»:

— Наша асноўная задача — папулярызацыя канькабежнага спорту, хуткаснага бегу на каньках. Марафон на ролікавых каньках ужо таксама стаў традыцыйным. Сёлета ў ім возьмуць удзел чэмпіён свету з Францыі і ўсе члены нашай нацыянальнай каманды. Будуць адкрыты пункты пракату, калі няма сваіх ролікавых канькоў, можна будзе ўзяць іх там.

Дар'я ЛАБАЖЭВІЧ

Загаловак у газеце: На актыўнай хвалі

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.