Летась Салігорская раённая цэнтральная бібліятэка заняла першае месца ў рэспубліканскім конкурсе «Найлепшая бібліятэка года». Ва ўстанове, што ўзначальвае Людміла Муравейка, працуе калектыў, які знаходзіцца ў пастаянным творчым пошуку.
Напрыклад, у Год культуры і да юбілею горада тут стартаваў унікальны інфармацыйна-адукацыйны праект «Культурны код Салігорска» па даследаванні гарадскога асяроддзя і пошуку асаблівасцяў шахцёрскай сталіцы. Ён рэалізуецца сумесна з Салігорскім дзяржаўным каледжам. Ініцыятар і каардынатар праекта — бібліятэкар першай катэгорыі Кацярына Вавілава і педагог каледжа Алена Смоліч.
Добра гарадам з тысячагадовай гісторыяй, ім ёсць што расказаць і паказаць. Салігорск — горад малады, днямі яму спаўняецца 60 гадоў. Але і тут ёсць шмат цікавых і адметных мясцін. І каму, як не моладзі, расказаць аб культурнай і прыроднай спадчыне сваёй малой радзімы? Для навучэнцаў каледжа арганізавалі курсы-трэнінгі, сярод іх было праведзена сацыялагічнае даследаванне «Любіць свой горад вельмі проста», каб выявіць, наколькі моладзь ведае свой Салігорск. Вынікі паказалі, што веды недастатковыя. У сувязі з гэтым Кацярына Вавілава распрацавала курс краязнаўчых заняткаў, улічыўшы тое, што ў маладзёжным асяроддзі прыярытэтным у арганізацыі вольнага часу з'яўляецца выкарыстанне сучасных сродкаў камунікацый, камп'ютарных тэхналогій, інтэрнэт-прасторы. Навучэнцы прынялі ўдзел у трэнінгу «Раскадзіруй горад разам з намі», на практычным уроку на іх смартфоны была ўстаноўлена праграма счытвання QR-кодаў. Затым ім прапанавалі стаць «культурнымі навігатарамі», на валанцёрскіх пачатках знаёміць жыхароў горада і гасцей з аб'ектамі прыроднай, культурнай спадчыны. Пад кіраўніцтвам куратараў валанцёры аб'ядналі гістарычныя, культурныя, прыродныя славутасці Салігорска ў некалькі экскурсійных пешаходных маршрутаў.
Першы з іх — «ДРЭВАград», знаёміць усіх ахвотных з нетыповымі для гарадскога азелянення дрэвамі, што растуць у Салігорску. Другі — «Самая Соль Салігорска» — з архітэктурнымі і гістарычнымі помнікамі горада. Трэці маршрут — «Шлях да Валошкавага Храма» пралягае па вуліцах, дзе знаходзяцца першыя забудовы Салігорска. Канцавы пункт маршруту — Свята-Пакроўская царква ў вёсцы Чыжэвічы.
Цяпер ажыццяўляецца трэці этап праекта. У межах яго прайшлі экскурсія «Завод, які пабудаваў горад», духоўная экспедыцыя «І расквітнеў Храм Валошкаў...», час памяці «Запішы нас у гісторыю гаротнай быллю...»
За 2016 год арганізатарамі навучаныя і падрыхтаваныя 26 студэнтаў-валанцёраў, якія правялі восем экскурсій для розных груп насельніцтва. У 2017-м было атрымана 11 заявак на экскурсіі.
Праект стаў сучасным, інфармацыйным і прыцягальным для маладых людзей дзякуючы менавіта тэхналогіі QR-кода. З дапамогай мабільнага тэлефона коды счытваюцца з інфармацыйнай таблічкі, і любы турыст, жыхар горада можа перайсці на сайт бібліятэкі ў спецыяльны раздзел, дзе сабраныя ўсе звесткі аб праекце: схема маршрутаў, інфармацыя пра аб'екты. Колькасць віртуальных наведванняў ужо склала 7358. Створана таксама старонка ў сацыяльных сетках.
Праект прынёс карысць і аддачу для ўсіх. Для горада маршруты прэтэндуюць стаць турыстычнымі асаблівасцямі, бібліятэка ў чарговы раз пацвердзіла «званне» інфармацыйна-культурнага, асветніцкага цэнтра. Ну а моладзь даведалася шмат цікавага з гісторыі Салігорска, аб яго адметных мясцінах і славутых земляках і стала яшчэ больш ганарыцца шахцёрскай сталіцай.
Шмат цікавага і карыснага ладзіцца для маленькіх наведвальнікаў і ў Салігорскай раённай дзіцячай бібліятэцы.
— З 1989 года на яе базе працуе тэатральны клуб «Забава», — расказала бібліятэкар чытальнай залы Наталля Бабіч. — Усіх лялек работнікі робяць самі з падручных матэрыялаў, шыюць ім адзенне. За амаль што трыццаць гадоў іх сабралася шмат, таму казачных персанажаў «пасялілі» ў асобным пакоі — маляўніча аформленым музеі.
Маленькія наведвальнікі ахвотна сюды прыходзяць, бо любімых герояў казак, мультфільмаў можна ўзяць у рукі, пагуляць з імі. Карыстаюцца папулярнасцю ў дзяцей і спектаклі, якія ладзяць для іх работнікі бібліятэкі. Яны самі пішуць сцэнарыі, рыхтуюць дэкарацыі, запрашаюць на прагляд хлопчыкаў і дзяўчатак з садкоў, вучняў малодшых класаў. Самадзейныя артысты выязджаюць таксама з пастаноўкамі ў дзіцячыя навучальныя ўстановы, летнія аздараўленчыя лагеры, санаторыі.
Таццяна ЛАЗОЎСКАЯ
Як мы бярозавік куплялі на гандлёвай пляцоўцы лясгаса і ў лясніцтве
Творчая вечарына народнага артыста Беларусі прайшла ў адной з мінскіх гімназій.