Вы тут

«Мая школа» — дабрачынны валанцёрскі праект БДУ


Бяром некалькі студэнтаў, прыбаўляем шчырае жаданне дапамагчы іншым, памнажаем на ініцыятыву і добры настрой і атрымліваем сотні дзіцячых усмешак! Вось такую незвычайную матэматыку можна вывучыць у «Маёй школе» — дабрачынным валанцёрскім праекце БДУ.


За гэ­тым за­ня­ткам і па­ду­рэць мож­на!

Ідэя яго стварэння з'явілася ў 2012 годзе ў Ксеніі Воўк, цяпер ужо выпускніцы факультэта міжнародных адносін БДУ. Валанцёры працуюць у розных кірунках: дапамагаюць выхаванцам дзіцячых дамоў выканаць дамашнія заданні і навярстаць школьную праграму, далучаюць дзетак да спорту і арганізоўваюць матчы па футболе, праводзяць для малых забаўляльныя мерапрыемствы з гульнямі, тэатральнымі пастаноўкамі і падарункамі.

Сёння ў скарбонцы «Маёй школы» ўжо некалькі буйных акцый. Напрыклад, у 2015 годзе валанцёры арганізавалі фотапраект «Сонечная прафесія», які быў накіраваны на падтрымку дзяцей з сіндромам Даўна. Кожнае «сонечнае» дзіця расказала, кім хоча стаць, калі вырасце, а затым яго фатаграфавалі ў вобразе будучай прафесіі: маленькія футбалісты, пчаляры, мастакі — каго дзеці толькі не выбіралі! Прэзентацыя здымкаў адбылася ў Міжнародны дзень чалавека з сіндромам Даўна.

Яшчэ адзін незвычайны праект пад назвай «Бумеранг дабра» студэнты ажыццявілі вясной мінулага года. Некалькі тыдняў валанцёры наведвалі дзіцячыя дамы Мінска і праводзілі майстар-класы па вырабе брошак у выглядзе жывёл. Дзве брошкі дзеці пакідалі сабе, а іншыя дзве адпраўляліся ў гандлёвы цэнтр «Gallerіa Mіnsk». У ім можна было купіць корм і медыкаменты, неабходныя прытулкам для жывёл, і аддаць іх валанцёрам. У падарунак неабыякавыя людзі атрымлівалі самаробныя брошкі і паштоўкі з падзякай ад дзетак.

Сёння кіраўнік праекта «Мая школа» — Караліна Чарнашэй, сёлетняя выпускніца факультэта філасофіі і сацыяльных навук БДУ. «Быць валанцёрам — не так проста, — прызнаецца дзяўчына. — Недастаткова адзін раз наведаць дзіцячы дом і лічыць, што ты зрабіў вялікую справу. Каб падрыхтаваць нейкую акцыю, трэба патраціць шмат часу і сіл: мы праводзім сходы, на якіх абмяркоўваем ідэі для будучага мерапрыемства, думаем над іх увасабленнем, звязваемся са спонсарамі, прыцягваем СМІ. Гэта складаная і сур'ёзная работа».

Май­стар-клас па вы­ра­бе бро­шак у дзі­ця­чым до­ме № 5.

Па словах Караліны, для праекта патрэбны крэатыўныя людзі з вялікім запасам ідэй. Бо цяпер звычайнымі песнямі і казкамі дзяцей не здзівіш. Канешне, важна быць адкрытым, ветлівым, прыязным. Але самая галоўная якасць валанцёра — адказнасць. «Неабходна ўсведамляць усю сур'ёзнасць таго, чым ты займаешся. Дзеці бяруць прыклад амаль з кожнага, хто да іх прыходзіць. А значыць, валанцёр павінен паводзіць сябе правільна. Толькі чалавек, які адказвае за свае ўчынкі, здольны працаваць з дзецьмі», — сцвярджае кіраўнік
праекта.

Дзяўчына таксама паведаміла, што выхаванцы дзіцячых дамоў вельмі не любяць, калі іх шкадуюць, яны крыўдзяцца, хоць і не заўсёды гэта паказваюць. Важна размаўляць з імі, як са звычайнымі дзецьмі і нават як з аднагодкамі, нягледзячы на тое, што яны маленькія. Варта не шкадаваць, а падумаць, як можна дзеткам дапамагчы: пагаварыць, развесяліць, прывезці цацкі або прысмакі.

Работа з дзецьмі прыносіць мора пазітыву і станоўчых эмоцый. А яшчэ ў вас з'явіцца шмат маленькіх шчырых сяброў. Напрыклад, у Караліны ёсць верная сяброўка Марына. Дзяўчаты часта размаўляюць па тэлефоне пра ўсё на свеце, школьніца заўсёды чакае Караліну ў госці.

Сваімі ўражаннямі падзялілася і валанцёр Карына Кантар, выпускніца біялагічнага факультэта БДУ. Дзяўчына дапамагае дзецям выконваць дамашнія заданні: «Летась я займалася з Анечкай, яна вучылася ў пачатковай школе. Калі мы толькі пазнаёміліся, чытаць дзяўчынка не ўмела. Анечка спрабавала схітрыць: прасіла мяне нешта прачытаць і на слых запамінала тэкст, а затым быццам бы чытала яго сама. Канешне, я адразу раскрыла яе сакрэт і змяніла тактыку. Цяпер дзяўчынка выдатна чытае! А фенаменальная памяць таксама спатрэбілася: Анечка вучыць вершы і з задавальненнем мне іх расказвае».

Калі вы цвёрда вырашылі стаць членам дружнай каманды валанцёраў, трэба толькі напісаць Караліне або іншым удзельнікам праекта ў сацыяльных сетках. Запрашаем усіх на ўрокі дабрыні ў «Маёй школе»!

Ганна ЯЎСЕЙЧЫК, студэнтка ІІІ курса факультэта журналістыкі БДУ

Выбар рэдакцыі

Грамадства

Як выхаваць даследчыка за школьнай партай?

Як выхаваць даследчыка за школьнай партай?

Чаму ўсе краіны, якія развіваюць інавацыйную эканоміку, робяць сёння стаўку на STЕM? 

Палітыка

Аляксандр Лукашэнка сустрэўся з прадстаўнікамі СМІ Расіі

Аляксандр Лукашэнка сустрэўся з прадстаўнікамі СМІ Расіі

Некалькі рэчаў сёлета адбываюцца ўпершыню.

Грамадства

Ці набудуць у гаспадароў старыя хаты?

Ці набудуць у гаспадароў старыя хаты?

Адэльскі сельскі савет, што ў Гродзенскім раёне, можна назваць брамай у Еўрасаюз.