Калі Мінск не спіць…
Яшчэ зімой я пачаў хадзіць пешкі па горадзе, натхніўшыся досведам сваёй жонкі. Яна неяк вырашыла пазбавіцца ўсяго лішняга (на яе думку) і выглядаць больш падцягнутай. Замест шкодных дыет і розных модных цяпер кросфітаў яна пачала проста праходзіць даволі вялікія дыстанцыі пасля працы. І за вельмі хуткі час вынік, якога яна чакала, быў дасягнуты.
Карацей, такія паходы вырашыў практыкаваць і я і ўнёс іх у свой расклад як прыемны дадатак да трэнажорнай залі і трэніровак па рэгбі.
Пачыналася ўсё выключна з практычных мэт: я хацеў не толькі скінуць лішнія кілаграмы, але і павысіць вынослівасць. Стартавай адлегласцю былі ўсяго пяць кіламетраў — прыкладна столькі ад майго дому да працы. Амаль гадзіна ходу. Столькі ж і да трэнажорнай залі. То бок, калі за дзень паспець схадзіць у залю, з яе — на працу, а потым дамоў, ужо атрымаецца пятнаццаць кіламетраў. І гэта калі не лічыць дадатковыя крокі.
Для таго, каб кантраляваць адлегласць, я паставіў сабе на смартфон адмысловы дадатак, які лічыць, колькі я прайшоў або прабег за дзень, тыдзень і месяц адпаведна. Акрамя гэтага, дзякуючы дадатку, можна даведацца пра колькасць спаленых калорый, дынаміку змены вагі ды іншыя карысныя рэчы. Што праўда, гэтымі функцыямі я карыстаўся мала…
Акрамя паступовага павелічэння адлегласці, павялічвалася і вага ў маім заплечніку — дадатковая нагрузка. Мне падабаецца эксперыментаваць над сабой, а калі такі эксперымент нясе яшчэ і станоўчыя вынікі, дык гэта наогул выдатна. Так, дарэчы, рабіў і Мікалай Гумілёў, выдатны расійскі паэт Срэбнага веку, які ўвесь час змагаўся з сабой і спрабаваў сябе пераадолець. Пакуль усе яго аднагодкі ездзілі ў Парыж за «вегетарыянскімі» прыгодамі, ён выпраўляўся ў паходы ў Афрыку, адкуль прывозіў нізкі цудоўных вершаў.
Натуральна, што першапачатковыя маршруты дастаткова хутка надакучылі ды прыеліся. Такое адчуванне, што яны наўпрост зрабіліся за невялікі час лёгкімі ва ўсіх сэнсах. І тут я пачаў камбінаваць ды вынаходзіць: прачынацца яшчэ раней, пазней класціся спаць, яшчэ больш павялічваць адлегласць і нагрузку, змяняць маршруты, абіраючы новыя. Гэта насамрэч неверагодна: бачыць, як прачынаецца і засынае твой горад; як, у залежнасці ад пары году, у ім заціхае, або наадварот — пачынае квітнець начное жыццё.
Мне даўно хацелася напісаць пра тое, што Мінск вельмі імкліва набліжаецца да еўрапейскіх сталіц. Я добра памятаю часы, калі ніякіх Кастрычніцкіх і Зыбіцкіх не было, а модная цяпер Рэвалюцыйная, дзе збіраецца гарадская багема, была гэткай жа, як і іншыя вуліцы: цёмнай, слаба асветленай вуліцай у цэнтры.
Насамрэч, я вельмі далёкі ад усіх гэтых тусовак. Мне імпануюць або адзінота, або закрытыя і зусім невялікія кампаніі, дзе малазнаёмы чужынец — выпадак рэдкі. Але ж кожны раз, калі я выходжу на шпацыр, нешта цягне мяне ў самыя тусовачныя месцы сталіцы. Мне падабаецца само адчуванне таго, што Мінск не спіць, хоць я ніколі і не затрымліваюся ў такіх месцах падоўгу. Было б наогул класна, калі б у Мінску з’явіўся які востраў ці нешта кшталту таго, дзе кругласуткава панавала б атмасфера свята: гучная музыка, вясёлыя людзі, бясконцы карнавал.
Што мне падабаецца ў Мінску цяперашнім — дык гэта бяспека. Можна ў любы час дня і ночы прайсціся па горадзе — і нічога не здарыцца. Ведаю, што менавіта за гэта наш горад цэняць многія замежнікі. Канкрэтна ў мяне за апошнія гады быў толькі адзін малапрыемны выпадак, калі на пустой вуліцы нейкі п’яны мужык вельмі навязліва набіваўся ў прыяцелі. Ды й тое, як высветлілася пасля, ён аказаўся не тутэйшым, а грамадзянінам іншай краіны. Турыст, якога, відаць, не навучылі ў дзяцінстве добрым манерам.
Але вернемся да тэмы: разам са зменамі вонкавымі, якія пачалі добра адчувацца на рэгбійным полі, я пачаў заўважаць змены і ва ўласным характары. На рэгбійным турніры ў Рэчыцы, дзе мы ўзялі сёлета першае месца, я адыграў некалькі гульняў запар без замен. Раней такога не было. Ды і ў цэлым па жыцці я стаў часцей даводзіць запачаткаванае да лагічнага фіналу. Складаныя пытанні пачалі вырашацца быццам самі сабою, нашмат прасцей.
Канстанцін КАСЯК
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.