Наўсцяж адны каласавікі

Штотыдзень у эфіры тэлеканала «Беларусь 3» тэлевіктарына «Размаўляем па-беларуску». Для таго каб стаць яе ўдзельнікамі, неабходна зайсці на сайт tvrgomel.by або 3belarus.by і праз банер «Размаўляем па-беларуску» запоўніць заяўку на каманду з трох чалавек. Ну, а праверыць сваё веданне роднай мовы пасля таго, як праграма выйшла ў эфір, можна з дапамогай «Звязды».

Ці ведалі вы, што:

каласаві́к — баравік, які расце ў час каласавання жыта;
настра́мак (адно са знач.) — невялікі воз сена;
пагатоў (прысл.) — тым больш;
наўсця́ж — ва ўсіх напрамках, навокал;
рыштаванне — збудаванне з дошак для будаўнічых работ;
паходня — пераносны ліхтар, факел.
Даць дзёру — хутка пакінуць месца падзей, уцячы. Беларусы яшчэ скажуць: даць драла, даць лататы. Рускія: смотать удочки.
Сажнем носа не дастаць — пра чалавека, які вельмі зазнаецца, фанабэрыцца. Беларускія адпаведнікі: без фігі ні да носа, задзіраць нос. Рускія: шестом носа не достать.