Сумесная з заказчыкам кадраў лабараторыя створана ў БДУ

Студэнцкая навукова-даследчая лабараторыя "Тонкаплёнкавыя тэхналогіі" створана на фізічным факультэце Белдзяржуніверсітэта. Упершыню сузаснавальнікам  лабараторыі выступіў заказчык кадраў. У дадзеным выпадку - навукова-тэхнічная кампанія "Ізавак".

Лабараторыя дапаможа прыцягнуць студэнтаў, магістрантаў і аспірантаў да навукова-даследчай, творчай, інавацыйнай дзейнасці ў галіне тонкаплёнкавых тэхналогій, а таксама падрыхтаваць спецыялістаў у адпаведнасці з запытамі канкрэтнага заказчыка. Роля партнёра ўніверсітэта заключаецца ва ўдасканаленні навучальных праграм, унясенні ім прапаноў па змяненнях і дапаўненнях у іх змест з улікам патрэбы арганізацыі ў наяўнасці ў будучых спецыялістаў пэўных кампетэнцый.   

Таксама  спецыялісты кампаніі "Ізавак"  будуць удзельнічаць у фарміраванні тэматыкі курсавых і дыпломных работ, ажыццяўляць прафарыентацыйную працу, аказваць падтрымку ў развіцці матэрыяльна-тэхнічнай базы фізічнага факультэта.

Функцыянаваць СНДЛ будзе на кафедры энэргафізікі. Яе ўдзельнікамі змогуць стаць усе ахвотныя студэнты, магістранты і аспіранты, навуковыя інтарэсы якіх звязаны з вывучэннем нанатэхналогій і 2D-матэрыялаў, мікра- і нанаэлектронікі, фізікі паверхні. Дзейнасць лабараторыі будзе ўключаць лекцыйныя і практычныя заняткі, індывідуальнае кансультаванне студэнтаў, правядзенне навуковых семінараў і экскурсій у навукова-даследчыя і вытворчыя цэнтры, арганізацыю канферэнцый, форумаў і сустрэч з экспертамі па навуковых напрамках лабараторыі. На базе лабараторыі будуць выконвацца курсавыя, дыпломныя, магістарскія і аспіранцкія праекты.

Даведка:

Навукова-тэхнічная фірма "Ізавак" з'яўляецца найбуйнейшым у СНД экспарцёрам вакуумнай тэхнікі, яе прадукцыю можна сустрэць у краінах Еўропы, Азіі і Паўночнай Амерыкі. Больш за 25 гадоў арганізацыя займаецца інавацыйнымі плёнкавымі тэхналогіямі, стварэннем унікальнага вакуумнага напыляльнага абсталявання, іённымі крыніцамі, тэхнікай распылення і распрацоўкай адпаведнага праграмнага забеспячэння. "Ізавак" паспяхова рэалізавала праекты для сусветных кампаній Hi-tech-рынку.

Надзея НІКАЛАЕВА