Вы тут

Якія лекі варта ўзяць з сабой на адпачынак


Каб не сапсаваць сваё знаходжанне на адпачынку, важна ўзяць з сабой аптэчку, асабліва калі падарожнічаеце з дзіцем. Малыя горш за дарослых пераносяць змену клімату, іх капрызныя жывоцікі могуць не прыняць новую ежу, а бурная радасць ад новых мясцін нярэдка абарочваецца сінякамі ды ранкамі... Ды і ці мала што яшчэ можа здарыцца? Як сустрэць такія непрыемнасці ў поўным узбраенні, расказала загадчыца 3-га педыятрычнага аддзялення 3-й гарадской дзіцячай клінічнай паліклінікі горада Мінска Людміла КІПЦЭВІЧ.


— На адпачынку у бацькоў павінны быць пад рукой некалькі відаў прэпаратаў. Сярод іх сонцаахоўныя крэмы, антысептыкі і перавязачны матэрыял, гарачкапаніжальныя, супрацьалергічныя сродкі і лекі ад расстройства страўніка, — нагадвае Людміла Іванаўна.

Каб пазбегнуць апёкаў і для аховы скуры ад ультрафіялету, купіце сонцаахоўны крэм не менш за 30 SPF. Памятайце, што час знаходжання пад сонцам не павінен перавышаць дзвюх гадзін, прычым толькі ў ранішнюю і вячэрнюю пару. У перыяд з 11 да 15 гадзін загараць не рэкамендуецца ні дзецям, ні дарослым. Калі скура пачырванела, неабходна наносіць пантэнол-спрэй ці бепантэн-крэм.

У выпадках парэзаў, ранак спатрэбяцца перакіс вадароду, лейкапластыр, вата і бінт. Можна дадаць яшчэ і зялёнку.

Калі ў дзіцяці павысілася тэмпература ад знаходжання на сонцы ці вострай рэспіраторнай інфекцыі, выручыць парацэтамол.

У выпадку дыярэі, выкліканай як змяненнем харчовага рацыёну, так і кішэчнай інфекцыяй, дапаможа актывіраваны вугаль ці смекта. Маючы на ўвазе кішэчную інфекцыю, якая нярэдка ўзнікае ад няякаснай ежы ці вады, захапіце з сабой ніфураксазід (стопдыяр). Ні ў якім разе не бярыце лаперамід (ён добра спыняе дыярэю, але ў выпадку, калі яна носіць інфекцыйны характар, толькі нашкодзіць).

Калі ў дзіцяці з'явяцца алергічныя рэакцыі — на ўкусы насякомых, ад ужывання новых харчовых прадуктаў і інш., варта скарыстацца фенкаролам. Калі едзеце з дзецьмі, у якіх алергічная рэакцыя можа працякаць у выглядзе цяжкасці дыхання, звязанай з ацёкам дыхальных шляхоў, вазьміце з сабой будзесанід у выглядзе спрэю (але для яго набыцця неабходны рэцэпт, таму загадзя звярніцеся да свайго педыятра).

— Выязджаючы ў краіны, дзе ёсць высокая верагоднасць захварэць той ці іншай інфекцыяй, напрыклад адром, клешчавым энцэфалітам, вірусным гепатытам, малярыяй, неабходна ад іх прышчапіцца, — адзначае Людміла Кіпцэвіч. — Але пра гэта трэба паклапаціцца загадзя, прыкладна за месяц, бо імунітэт пасля прышчэпкі выпрацоўваецца да некалькіх тыдняў. Звяртацца варта ў тэрытарыяльны Цэнтр гігіены і эпідэміялогіі і, высветліўшы эпідэміялагічную сітуацыю ў той краіне, дзе вы плануеце адпачынак, удакладніць усю інфармацыю аб вакцынацыі.

Алена КРАВЕЦ

Загаловак у газеце: Лекі, якія нельга забыць

Выбар рэдакцыі

Грамадства

Як пенсіянерка з Гомеля купіла набор каструль па цане патрыманай іншамаркі

Як пенсіянерка з Гомеля купіла набор каструль па цане патрыманай іншамаркі

Усё, як у казцы: прыгожая зала, музыка, пачастункі. Абаяльныя людзі распавядаюць аб правільным харчаванні і рэкламуюць свой тавар...

Грамадства

714 тысяч тон адходаў для перапрацоўкі сабралі летась беларусы

714 тысяч тон адходаў для перапрацоўкі сабралі летась беларусы

Гэта адходы шкла, паперы, пластыку, шын, батарэек, машыннага масла...

Грамадства

​Дзе прызначалі спатканні ў даваенным Мінску?

​Дзе прызначалі спатканні ў даваенным Мінску?

Атрымаць падказкі вам дапаможа экскурсія «Рамантыка мінскіх дворыкаў».