Вы тут

Адкрылася фотавыстаўка Ірэны Гудзіеўскай «Сімвалы Беларусі. У пошуках...»


З 27 чэрвеня да 29 ліпеня ў Мастацкай галерэі Міхаіла Савіцкага будзе працаваць фотавыстаўка Ірэны Гудзіеўскай «Сімвалы Беларусі. У пошуках...». Праект прысвечаны Году малой радзімы.


Фотаработа Ірэны Гудзіеўскай.

«Буслы, зубры, лён. Хлебныя палі і васількі. Палессе і пушчы. Замкі і вежы... Калі і чаму яны сталі сімваламі Беларусі? Што мы ведаем пра іх і ці ўмеем імі ганарыцца? Фотапраект «Сімвалы Беларусі. У пошуках...» імкнецца данесці да кожнага сэрца годнасць і аптымізм беларускіх сімвалаў, тое міфічнае і сапраўднае, што ўтрымліваецца ў генетычнай памяці самога народа, — мяркуе арт-крытык, кіраўнік секцыі фотакрытыкі Беларускага грамадскага аб'яднання фатографаў Любоў Гаўрылюк. — За кожным пейзажам фотамастачкі Ірэны Гудзіеўскай — шчырая гісторыя, за кожнай фарбай у апярэнні птушкі — звычай або песня. І расказаны яны візуальнай мовай сучаснага чалавека — праз мастацтва фатаграфіі».

Праект «Сімвалы Беларусі» — гэта працяг вялікай аўтарскай тэмы «Зачараванне», якую Ірэна Гудзіеўская пачала больш за восем гадоў таму разам з Тамарай Ганчаровай з трох сімвалаў — «Пушча. Лён. Прыгажуні». Яна была прадстаўлена ў Беларусі, у многіх еўрапейскіх краінах і ў ЗША.

На выстаўцы «Сімвалы Беларусі» экспануецца каля 80 фотаработ на палотнах, друк якіх стаў магчымым дзякуючы падтрымцы Пріорбанка. Дарэчы, фотаработы Гудзіеўскай, прысвечаныя беларускім сімвалам, натхнілі пісьменніцу Лёлю Багдановіч на цыкл «Бабуліны казкі», якія на радыё «Мінская хваля» чытае Тамара Вяцкая. Кампазітар Леанід Шырын напісаў выдатную музыку для праекта.

Варта дадаць, што Ірэна Гудзіеўская зазвычай працуе ў галіне мастацкай фатаграфіі і рэкламы. Пачала свой творчы шлях яна з выстаўкі 64 Eme Salon de Prіntemps у Парыжы ў 1994 годзе. З гэтага часу Ірэна актыўна ўдзельнічае ў буйных выставачных праектах, уваходзіць у склад журы конкурсаў моды і дызайну, стала пераможцай міжнародных фестываляў рэкламы, супрацоўнічае з беларускімі, расійскімі, еўрапейскімі часопісамі. Да таго ж Ірэна Гудзіеўская — член Беларускага грамадскага аб'яднання фатографаў.

Варвара ГОМАН

Загаловак у газеце: Прыгажосць сярод хлебных палёў

Выбар рэдакцыі

Грамадства

Тураўскі крыж упершыню будзе прадстаўлены 26 верасня

Тураўскі крыж упершыню будзе прадстаўлены 26 верасня

На свята Узнясення Крыжа Гасподняга, падчас вячэрняй службы ў Мінскім кафедральным саборы.

Грамадства

Як і чым жыве колішняя «памідорная сталіца» Беларусі?

Як і чым жыве колішняя «памідорная сталіца» Беларусі?

Каб адчуць, чым organіc food адрозніваецца ад звыклых для сучаснага гараджаніна прадуктаў, дастаткова пакаштаваць памідоры ў Савічах і параўнаць іх з таматамі з гіпермаркета.

Грамадства

Генеральны дырэктар РУП «Белпошта» Святлана Юркевіч: Мы будзем развіваць перш за ўсё паштаматы

Генеральны дырэктар РУП «Белпошта» Святлана Юркевіч: Мы будзем развіваць перш за ўсё паштаматы

На працягу многіх дзесяцігоддзяў пошта асацыіравалася з традыцыйным наборам паслуг — лістамі, пасылкамі, газетамі, пенсіямі... Але сучасныя тэхналогіі ўсё больш уваходзяць у наш побыт.