Каберац для абшарніка

Штотыдзень у эфіры тэлеканала «Беларусь 3» тэлевіктарына «Размаўляем па-беларуску». Для таго каб стаць яе ўдзельнікамі, неабходна зайсці на сайт tvrgomel.by або 3belarus.by і праз банер «Размаўляем па-беларуску» запоўніць заяўку на каманду з трох чалавек. Ну, а праверыць сваё веданне роднай мовы пасля таго, як праграма выйшла ў эфір, можна з дапамогай «Звязды».

Ці ведалі вы, што:

прошча — месца, надзеленае надзвычайнай сілай;
каберац (абл.) — дыванок пад ногі;
валкаваць — зграбаць скошаную траву;
екатаць — галасіць ад болю, вішчаць;
мянташка — прылада, якой востраць косы;
абшарнік — уладальнік зямельных надзелаў, памешчык.
Мераць адной меркай — меркаваць пра каго-небудзь ці пра што-небудзь вельмі суб'ектыўна, аднолькава. Беларускія адпаведнікі: мераць на свой аршын, ставіць на адну дошку. Рускі: стричь под одну гребенку.
На тым свеце дастаць — дамагчыся свайго пры любых абставінах, што б там ні было. Беларусы яшчэ скажуць: з дна марскога дастаць, пад зямлёй знайсці. Рускія: из-под земли достать.