Па звестках Нацыянальнага кадастравага агенцтва, у маі было ўсяго 1000 дагавораў куплі-продажу. На куплю выдаткавалі 143 мільёны рублёў. Гэта значыць, у сярэднім кватэра каштавала 143 тысячы рублёў. У параўнанні з папярэднімі месяцамі адбыўся спад пакупніцкай цікавасці. У лютым, сакавіку і красавіку здзелак было на 14 % больш, чым у маі. Растлумачыць падзенне рынку можна і новымі правіламі выдачы крэдытаў. Цяпер ёсць жорсткае абмежаванне, калі на выплату працэнтаў і асноўнага доўгу ў вас павінна прыходзіцца не больш як 40 % ад прыбытку. Таму буйныя крэдыты сталі даступныя далёка не ўсім.
Згаданыя абмежаванні па крэдытах быццам бы павінны весці да патаннення жылля, але ў нас спецыялісты па нерухомасці прагназуюць яшчэ нязначнае падаражэнне па выніках года. У маі ў сталіцы працягваўся рост цэн на кватэры. Сярэдні кошт «квадрата» дасягнуў 2,5 тысячы рублёў, што на 8 % больш, чым у студзені, і на 22 % — чым у маі мінулага года. Падаражэнне адбываецца на фоне недастатковай прапановы першаснага жылля, а гэтая праблема не вырашаецца з прычыны дэфіцыту пляцовак пад забудову, гаворыць ганаровы старшыня савета Беларускай асацыяцыі «Нерухомасць» Мікалай ПРАСТАЛУПАЎ.
Наш эксперт сцвярджае, што цэны на кватэры ў новабудоўлях падняліся, бо саміх дамоў становіцца менш. Ужо нават панэльнае жыллё прапануюць па 2400—2600 рублёў за квадратны метр. Вядома, павышэнне цэн на 22 % за год — гэта зашмат, досыць нечакана і амаль што нерэальна. Да чэрвеня намецілася стабілізацыя цэн, попыту і прапановы. Здзелак стала менш. У прынцыпе летам часцей за ўсё ў нас назіраецца зацішша. На думку Мікалая Прасталупава, да сярэдзіны жніўня змен на рынку не адбудзецца, а вось чаго чакаць далей...
У Мінску шмат жылля будавацца ўжо не будзе. Утворыцца дэфіцыт новабудоўляў, які і так ёсць. Аднапакаёвая кватэра за 100—120 тысяч рублёў без аздаблення — гэта няправільна, асабліва з улікам якасці будаўніцтва. У галоўным мегаполісе краіны штучна створаны дэфіцыт новабудоўляў. Зямлю ў горадзе не даюць, вакол кальцавой забудоўваць не жадаюць. За першасным будаўніцтвам расце і цана другаснага жылля. Каля 90 % прадаўцоў кватэр на другасным рынку ўзамен купляюць іншае жыллё, паляпшаюць жыллёвыя ўмовы. І ўсе хочуць новабудоўлі, а іх мала.
Нават калі прадаваць маленькую кватэрку ў старой панэльцы за 80 тысяч рублёў, то застаецца купіць больш прасторную новабудоўлю за 110 тысяч рублёў ды зверху ўкласці 20 тысяч у аздабленне. Варыянтаў палепшыць жыллёвыя ўмовы няшмат, лічыць Мікалай Прасталупаў. Але наш эксперт упэўнены, што пасля лета цэны відавочна не пойдуць уніз...
Сяргей КУРКАЧ
Мерапрыемства праводзіцца на добраахвотнай аснове.
Не выявіць ні секунды абыякавасці.
