25 Верасень, аўторак

Вы тут

У Віцебску адкрыецца музей фатаграфіі


У Віцебску 23 чэрвеня ў час Міжнароднага конкурсу-фестывалю "ФотаКрок" імя Сігізмунда Юркоўскага адкрыюць музей фатаграфіі, паведаміў арт-дырэктар форуму Васіль Пруднікаў.


Музей таксама будзе мець імя вядомага фатографа XIX стагоддзя. Ён размесціцца ў цэнтры гістарычнай часткі горада па вуліцы Талстога, 7. Тут можна будзе паглядзець выставачную экспазіцыю, паназіраць за таінствам, якое праходзіць у "цёмным" пакоі, выпіць духмяную каву і сфатаграфавацца ў старадаўнім атэлье, атрымаўшы фотакартку ў стылістыцы ўзору фотасалонаў Віцебска XIX стагоддзя. Яго экспазіцыйная канцэпцыя будзе гучаць так - "Ад камеры-абскура да лічбавых пікселяў".

"Музей фатаграфіі імя Сігізмунда Юркоўскага стане лагічным і дастойным працягам гарадской канцэпцыі музейнага развіцця па ўвекавечанні імя знакамітых гараджан, якія праславілі Віцебск на ўвесь свет", - расказаў Васіль Пруднікаў.

Паводле яго слоў, ён стане не проста сховішчам прадметаў фотамастацтва і даследчым цэнтрам, але і новай прасторай гарадскога жыцця. А той, хто перадасць у дар старую фотакамеру, адбітак або фотаальбом, стане ганаровым дарыльшчыкам музея і атрымае памятны сертыфікат.

Фестываль "ФотаКрок" пройдзе з 20 па 24 чэрвеня. Чакаецца прыезд больш як 100 удзельнікаў з Беларусі, Расіі, Эстоніі, Латвіі, Літвы, Польшчы, Украіны, Азербайджана, Ізраіля і ЗША. У гэтым годзе Сігізмунду Юркоўскаму споўнілася б 185 гадоў, а яго вялікаму вынаходству - шторна-шчыліннаму затвору - 135.

"Мы прапанавалі фатографам стаць удзельнікамі фестывальнага конкурсу "Вытокі" і прысылаць здымкі, якія ўвасабляюць паняцце "Мая малая Радзіма". Выставачная праграма таксама прысвечана тэме малой радзімы. У прыватнасці, экспазіцыя фотаздымкаў Леаніда Тугалева з Рыгі. У Віцебску нарадзіліся яго бацькі, і больш за 70 гадоў жыцця ён прыедзе ўсяго толькі другі раз на іх малую Радзіму", - адзначыў арт-дырэктар фестывалю.

Таксама запланавана выстава работ фатографа з Калінінграда Алега Клімава. Яшчэ адзін расійскі фотажурналіст Уладзімір Вяткін наогул першы раз прадставіць гледачам у Віцебску свае работы, якія рыхтаваліся майстрам усё яго жыццё.

"Эксклюзівам фестывалю стане арыгінальная выстава адной фатаграфіі "Бягун у горадзе" Эля Лісіцкага (1926 год) з калекцыі культурнага праекта "РУС ПРЭС ФОТА" - рэдакцыйнага архіва часопіса "Савецкае фота". Сімвалічна, што паказ выставы пройдзе непасрэдна ў будынку Музея Віцебскага народнага мастацкага вучылішча, дзе працаваў Лісіцкі ў 1919-1921 гады па запрашэнні Марка Шагала. Яшчэ адной жамчужынай праграмы стане выстава "Сямейная фатаграфія Медалье. XIX стагоддзе, Віцебск". Яна прысвечана сям'і Шмар'ягу-Лейба Медалье (1872 – 1938) - духоўнага рабіна Віцебска, галоўнага рабіна Масквы і Савецкага Саюза. Унікальнасць гэтай калекцыі ў тым, што тут прадстаўлены здымкі членаў сям'і ў выкананні ўсіх першых фатографаў Віцебска канца XIX стагоддзя, у тым ліку Сігізмунда Юркоўскага", - растлумачыў Васіль Пруднікаў.

Таксама ў праграме фестывалю шэраг іншых выстаў, майстар-класы, лекцыі, творчыя сустрэчы, конкурсы, розныя актыўнасці. Фатографы атрымаюць магчымасць зняць горад з агляднай пляцоўкі ратушы. Маладыя калегі змогуць прадставіць экспертам свае работы і атрымаць ацэнку. Па выніках конкурсу-фестывалю традыцыйна збярэцца выстава "ФотаКрок па Віцебску" - рэзультат здымкі ўдзельнікамі фэсту горада, яго жыхароў і гасцей.

Як адзначыў Васіль Пруднікаў, галоўная задача фестывалю - паказаць аўдыторыі высокі ўзровень фатаграфічнай культуры праз выставы як класікаў фотамастацтва, так і лепшых работ сучасных фоталюбіцеляў на конкурснай аснове.

"ФотаКрок" традыцыйна збірае ўдзельнікаў і гасцей у час святкавання Дня горада. Гэта ўжо трэці форум фатографаў. Першы прайшоў у 2016 годзе.

Арганізатарам фестывалю выступіў Віцебскі мясцовы фонд фатаграфіі "ФотаКрок". Падтрымку аказалі дэпутацкі корпус Палаты прадстаўнікоў, аддзел культуры Віцебскага гарвыканкама, грамадскія і культурныя арганізацыі, установы адукацыі і культуры, шэраг камерцыйных кампаній.

БЕЛТА

Дадаць каментар

Выбар рэдакцыі

Спорт

Цырымонія развітання з Анатолем Капскім прайшла ў «Барысаў-Арэне»

Цырымонія развітання з Анатолем Капскім прайшла ў «Барысаў-Арэне»

Грамадзянская паніхіда працягвалася больш за дзве гадзіны ў "Барысаў-Арэне".

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.