У Кушлянах прайшоў фэст

Паэтычна-музычны фэст у Кушлянах праводзіўся па ініцыятыве супрацоўнікаў Дзяржаўнага музея гісторыі беларускай літаратуры пры падтрымцы Смаргонскага райвыканкама.

На падворку маёнтка патроху збіраецца народ: мінчане, смаргонцы, маладзечанцы, жыхары навакольных мясцін. На галерэі, што цягнецца ўздоўж фасада дома, пабудаванага мужыцкім адвакатам Францішкам Багушэвічам напрыканцы 19 стагоддзя, гукарэжысёр Юрый Вутовіч і вядучыя Вольга Крывянкова з Цэнтра культуры, а таксама Вольга Шаўчэнка з музея гісторыі беларускай літаратуры ўзгадняюць пэўныя моманты свята з дырэктарам музея-сядзібы Алесем Жамойціным.

Дырэктар музея гісторыі беларускай літаратуры Зміцер Яцкевіч шпарка крочыць да каменнай аборы, каля якой размясціліся тэматычныя пляцоўкі, і аддае чарговыя распараджэнні мінскім супрацоўнікам. Бард Андрэй Мельнікаў часова памяняў гітару на рыдлёку, каб замацаваць банеры адной з дзвюх выстаў, прывезеных з Мінска. На ёй цікавая інфармацыя пра этапы жыцця беларускага "дудара". Другая выстава "Жыццё ў слове" размясцілася пад дахам аборы. Для гасцей свята гэта ўнікальны выпадак пазнаёміцца з цікавай інфармацыяй, не едучы ў Мінск.

Вакальна-харэаграфічнай кампазіцыяй "Прывітальная" свята адкрывае народны калектыў з Жодзішак "Вечарынка". Прысутных вітаюць начальнік аддзела культуры райвыканкама Таццяна Ражава, кіраўнікі музея і філіяла Зміцер Яцкевіч і Алесь Жамойцін. Слынны беларускі паэт Віктар Шніп прачытаў вершы, прысвечаныя аўтару "Дудкі беларускай", яго сучаснікам і даследчыку жыцця і творчасці Ф. Багушэвіча Уладзіславу Содалю. Следам да мікрафона запрашаюць мяне. Я не маю прысвячэнняў, але маю вершы, што нарадзіліся тут, на гэтых узгорках, пад шатамі гэтых дрэў. Пэўную атмасферу беларускасці ствараюць выступленні мясцовых фальклорных гуртоў і аматарскіх калектываў з Солаў, Сінькоў, Шутавічаў, Кушлянаў. Ці не такія спевы натхнялі калісьці гаспадара сядзібы на стварэнне вершаў, а яшчэ на ўпартае жаданне захаваць тутэйшую гаворку і надаць ёй статус дзяржаўнасці.

Праз пэўны час жадаючых запрашаюць на экскурсію па музейнай экспазіцыі, якую праводзіць Алесь Жамойцін, а частка аматараў даўніны выпраўляецца з навуковым супрацоўнікам сталічнага музея Антонам Астаповічам па ўнікальным маршруце праз прысаду да Лысай гары і памятнага валуна Мацея Бурачка. Каля гэтага помніка прыроды і гісторыі краязнаўца і выдавец з Маладзечна Міхась Казлоўскі згадвае, што гадоў трыццаць таму энтузіястамі былі пасаджаны 60 дубкоў – у памяць пра 60 гадоў зямнога жыцця Францішка Багушэвіча. Сярод зарасляў сосен, ліпаў, клёнаў, алешын знаходзім-такі ажно пяць дубкоў уздож сцяжыны да валуна – як сімвал пяці няпоўных гадоў, праведзеных тут паэтам напрыканцы яго жыцця.

А на тэматычных пляцоўках у гэты час ладзяцца выступленні батлейкі, музейна-педагагічны занятак "Сам зраблю батлеечную ляльку", аквагрым, музейны занятак-гулянне ў народным стылі. Супрацоўнікі мінскіх музеяў Алена Канапацкая, Ірына Мышкавец, Таццяна Лабада знаёмяць дзетак з народнымі музычнымі інструментамі, беларускімі казкамі, цікавосткамі сялянскага жыцця.

На завяршэнне фэсту не было ні феерверкаў, ні салютаў. Затое феерычна свяціла вечаровае сонца, а на душы засталася асалода ад стасункаў з аднадумцамі і ўзнёслага настрою, што падарылі арганізатары гэтага свята беларускасці.

Ала КЛЕМЯНОК

Фота аўтара