Белтэлерадыёкампанія абвясціла аб пачатку прыёму заявак на адборачны тур дзіцячага конкурсу песні «Еўрабачанне-2019». Нагадаем, сёлета міжнародны творчы форум пройдзе ў Мінску пад дэвізам Lіght Up! («Запальвай!»).
Прадставіць нашу краіну ў песенным конкурсе змогуць юныя артысты, якім на дату правядзення шоу — 25 лістапада — будзе не менш за 9 і не больш за 14 гадоў. Да адбору дапускаюцца як беларусы, так і замежнікі — але з умовай, што яны пастаянна жылі ў Беларусі як мінімум 2,5 года. Што да конкурснай песні, то больш чым напалову яна мусіць быць на беларускай або рускай мове (замежнай дапускаецца не больш як 40 % агульнага аб'ёму тэксту) і не быць камерцыйна рэалізаванай або публічна выкананай да 1 мая бягучага года.
Заяўкі з паметкай «На дзіцячы конкурс песні «Еўрабачанне» прымаюцца ў выглядзе каштоўных бандэроляў на адрас 220014, г. Мінск, вул. Макаёнка, 9. Апошні дзень прыёму заявак — 29 чэрвеня, а ўжо да 7 ліпеня журы вызначыць ад 7 да 10 фіналістаў нацыянальнага адбору. Хто ж у ім пераможа, стане вядома падчас гала-канцэрта, які адбудзецца ў верасні, — тэлегледачы і прафесіяналы музычнай сферы разам выберуць прадстаўніка Беларусі на дзіцячым «Еўрабачанні-2018». Дарэчы, наша краіна ўдзельнічае ў дзіцячым конкурсе з моманту яго заснавання ў 2003 годзе і, у адрозненне ад дарослага шоу, мае вельмі добрыя вынікі. У скарбонцы беларусаў — дзве перамогі (2005 і 2007 гады), адно другое і два трэція месцы.
Вікторыя ЦЕЛЯШУК
Фота БЕЛТА
Мерапрыемства праводзіцца на добраахвотнай аснове.
Не выявіць ні секунды абыякавасці.
