Газета далучылася да слаўгарадскага фестывалю «Гаспадарчы сыр» і разам з поштай прапанавала гасцям свята акрамя падпіскі на любімую газету яшчэ і эксклюзіўныя падарункі.
Гастранамічны фестываль, які прайшоў у Слаўгарадзе сёмы раз, сабраў шмат прыхільнікаў усяго народнага і самабытнага. Газета «Звязда» цудоўна дапоўніла гэты фармат. І чытацкая аўдыторыя выдання пашырылася яшчэ на некалькі чалавек.
Наша падпісчыца Раіса Лысянкова атрымала ў падарунак ад рэдакцыі эксклюзіўны кубак — будзе спалучаць прыемнае з карысным: піць гарбату і знаёміцца з навінамі са свежага нумара «Звязды». Прызналася, што газету на роднай мове з задавальненнем чытае яе муж. А карысныя звяздоўскія парады яны разам выкарыстоўваюць у сябе на прысядзібным участку. Яшчэ адна наша чытачка Наталля Ганчарова стала ўладальніцай фірменнай кепкі. Абяцае, што, калі паедзе на курорт, будзе рэкламаваць наша выданне і там.
Прыемна, што шмат сяброў у газеты сярод сыравараў. Жыхарка слаўгарадскай вёскі Ходарава Ніна Гецарава, напрыклад, выпісвае «Звязду» на працягу 30 гадоў. Асабліва ёй падабаецца старонка «Алё, народ на провадзе» Валянціны Доўнар і рубрыка «Песню бярыце з сабой». Тэксты песень яна выразае і спявае разам з каляжанкамі. За дзесяцігоддзі назбіраўся ўжо вялікі альбом.
Яшчэ ў адной прыхільніцы «Звязды» Людмілы Бондаравай з аграгарадка Лапацічы Слаўгарадскага раёна нават ёсць сыр «Карэспандэнцкі». «Змешваю зеляніва з часнаком, дадаю тварог і заварочваю ў сыр — смаката!» — раскрывае кулінарны сакрэт жанчына. Сыр, дарэчы, разабралі на свяце самым першым.
Высокую ацэнку газеце дала і старшыня Слаўгарадскага райсавета Святлана
Язерская.
— Газета славіцца сваімі грунтоўнымі матэрыяламі, шмат піша пра дзейнасць прадстаўнічай улады. Для мяне, як дэпутата, гэта вельмі карысна, — падкрэсліла яна.
Нэлі ЗІГУЛЯ
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Каментары