Вы тут

Патрыятычна-асветніцкая акцыя "Вязынка —2018" пройдзе 19 мая


Дзеянні разгорнуцца на малой радзіме народнага паэта Беларусі Янкі Купалы ў вёсцы  Вязынка (Маладзечанскі р-н). Пачатак у 12.00.


Традыцыя правядзення злётаў на радзіме Янкі Купалы была закладзена студэнтамі і выкладчыкамі філалагічнага факультэта Белдзяржуніверсітэта ў 1976 годзе. Тады выезд у Вязынку арганізоўваўся вельмі ўрачыста. Ад факультэта да чыгуначнага вакзала рушылася шэсце са сцягамі і транспарантамі, а ў электрычцы філолагі займалі некалькі вагонаў. Дарога да купалаўскай радзімы напаўнялася звонкімі студэнцкімі галасамі: песнямі, жартамі, вясёлым смехам. Праграма Вязынкі ўключала афіцыйную частку з ускладаннем кветак да помніка Песняру і дэкламаваннем вершаў Янкі Купалы. А конкурсная частка складалася з інсцэніроўкі песень, чытання вершаў, пастаноўкі сцэнак, прэзентацыі насценгазеты будаўнічых атрадаў, разнастайных спартыўных спаборніцтваў.

У XXI стагоддзі акцыя набыла статус агульнаўніверсітэцкай. Штогод мерапрыемства прысвячаецца знамянальным датам айчыннай гісторыі і роднага універсітэта. Сёлета яно прымеркаванае да абвешчанага ў Беларусі Года малой радзімы.

Удзельнікамі акцыі стануць кіраўніцтва, выкладчыкі, супрацоўнікі і студэнты філалагічнага факультэта БДУ. У якасці гасцей запрошаны прарэктары і дэканы факультэтаў ВНУ. Усяго ў гэты дзень Вязынка збярэ больш за 200 чалавек.

Ва ўрачыстым адкрыцці прымуць удзел дэкан філалагічнага факультэта Іван Роўда і ганаровы старшыня Міжнароднага фонду Янкі Купалы Вячаслаў Рагойша.

Традыцыйна мерапрыемства пачнецца святочным канцэртам каля дома Янкі Купалы. Асноўныя падзеі акцыі разгорнуцца на сімвалічнай гары Парнас. Тут пройдзе спартыўна-забаўляльнае свята, у праграму якога ўвойдуць конкурсы “пенальці дэкану”, перацягванне ліны, пляжны валейбол, а таксама выкананне песень ля вогнішча і многае іншае. Акрамя таго, курсанты ваеннага факультэта Беларускай дзяржаўнай акадэміі авіяцыі і рыцарскі клуб "Саюз вольных ратнікаў” параадуюць паказальнымі выступленнямі.

Ключавой падзеяй Вязынкі стане чытанне на розных мовах свету верша Янкі Купалы “А хто там ідзе”. У дэкламацыі прымуць удзел прарэктары, дэкан факультэта міжнародных адносін Віктар Шадурскі, дэкан факультэта філасофіі і сацыяльных навук Вадзім Гігін і дэкан гістарычнага факультэта Аляксандр Каханоўскі.

Таксама ўсіх гасцей акцыі чакае “каша ад дэкана”.

Надзея НІКАЛАЕВА

Дадаць каментар

Выбар рэдакцыі

Грамадства

Як перазімаваць без праблем?

Як перазімаваць без праблем?

У гэтыя дні ў Беларусі праходзіць пажарна-прафілактычная акцыя «За бяспеку разам». 

Культура

Іна Афанасьева: 50 гадоў — усе мае, і яны мне падабаюцца!

Іна Афанасьева: 50 гадоў — усе мае, і яны мне падабаюцца!

Шчаслівыя людзі рэдка пахваляюцца на ўвесь свет сваімі пачуццямі. 

Грамадства

Аляксандр Чарвякоў. «Усебеларускі стараста»

Аляксандр Чарвякоў. «Усебеларускі стараста»

Ён стаў кі­раў­ні­ком рэс­пуб­лі­кі ў 28 га­доў. Праз дзе­ся­ці­год­дзе "ла­пат­ная Бе­ла­русь" ужо ме­ла на­цы­я­наль­ны ўні­вер­сі­тэт, Ака­дэ­мію на­вук і раз­ві­тую гас­па­дар­ку.