Няўцям змяніць рыззё?

Штотыдзень у эфіры тэлеканала «Беларусь 3» віктарына «Размаўляем па-беларуску». Для таго каб стаць яе ўдзельнікамі, неабходна зайсці на сайт tvrgоmеl.bу або 3bеlаrus.bу і праз банер «Размаўляем па-беларуску» запоўніць заяўку на каманду з трох чалавек. Ну, а праверыць сваё веданне роднай мовы пасля таго, як праграма выйшла ў эфір, можна з дапамогай «Звязды».

Ці ведалі вы, што:

рыззё (разм.) — старое, падранае адзенне;
лу́ста — адрэзаны вялікі плоскі кавалак хлеба;
няўця́м (прысл., разм.) — незразумела; не прыйшло ў галаву;
ніцма (прысл.) — тварам уніз;
цявіна — сцябліна травы (травінка);
стадо́ла (устар.) — канюшня на заезным двары;
сесці на галаву — цалкам падпарадкаваць каго-небудзь сваёй волі (беларускія сінонімы: надзець аброць, на карак усесці; рускія адпаведнікі: сесть на шею, надеть хомут);
не ў сабе (быць) — знаходзіцца ў благім настроі, быць моцна нечым усхваляваным, занепакоеным (беларусы яшчэ скажуць: як сам не свой, як у ваду апушчаны; рускія: не в себе, как тень).