Вы тут

Арганізаваць канцэрт? Галоўнае — нестандартны падыход і рызыка!


Колькі вы ведаеце маладых людзей, якія адкрылі свой бізнес па арганізацыі культурных і музычных мерапрыемстваў? Напэўна, няшмат. Мне ўдалося пазнаёміцца з удзельнікамі аднаго з такіх праектаў — «Лэйбл MZ productіon». Каманда займаецца выданнем і прэзентацыяй альбомаў, арганізацыяй канцэртаў, падтрымкай арганізацыі мастацкіх выстаў і нават тэатральных пастановак. Яна супрацоўнічае з многімі айчыннымі ўстановамі і выканаўцамі.


— Ідэя стварэння праекта з'явілася зімой 2012 года, — расказаў арганізатар і кіраўнік Мікалай Заяц. — За пяць гадоў дзейнасці каманда ўжо паспела пасупрацоўнічаць з арганізатарамі больш як 200 мерапрыемстваў у Беларусі і ў блізкім замежжы (Украіне, Расіі, Польшчы), правесці мноства ўласных мерапрыемстваў, прэзентаваць дыскі і альбомы. Напрыклад, у запісе аднаго з уласных CD — «Жалуды», 2013 года — прынялі ўдзел Макс Корж і група «ЛСП», якія выканалі для дыска рэп-кампазіцыі на беларускай мове.

Сёння ў каманду ўваходзіць дзевяць чалавек. Кожны адказвае за ўласны кірунак: прэса, менеджмент, фатаграфія.

Памочнікам арганізатара мерапрыемстваў з нядаўняга часу з'яўляецца Аксана Крупнова, студэнтка Беларускага дзяржаўнага ўніверсітэта.

— У каманду я трапіла з-за цікавасці да беларускай культуры і музыкі. Хацелася разабрацца, на якім узроўні ў нас цяпер знаходзіцца музычная індустрыя. Мне захацелася атрымаць добры арганізатарскі вопыт, а ў гэтым праекце можна рэалізаваць свой патэнцыял і папрацаваць з цікавымі людзьмі. Для мяне важная атмасфера, і я яе знайшла, — кажа дзяўчына.

Цяпер каманда займаецца падрыхтоўкай да правядзення штогадовага рэп-фестывалю «Уключай біт». Гэта складанае мерапрыемства, якое патрабуе шмат намаганняў у тэхнічнай падрыхтоўцы. Фэст славіцца цікавай праграмай, наяўнасцю адразу дзвюх лакацый (мода і музыка), а таксама дзеліцца на тры часткі: батл-секцыю, беларускамоўную і рускамоўную секцыі. На мерапрыемстве выступіць больш за 15 выканаўцаў. Па выніках фестывалю плануецца зладзіць дабрачынную акцыю разам з беларускімі музыкантамі.

— Акрамя бягучых праектаў, плануем арганізаваць беларускамоўны джаз-фэст. Думаю, будзе цікава. Тым больш, што ў наш час цэняцца нестандартныя і нефармальныя падыходы, — кажа Мікалай. — Таму пры ўвасабленні ў жыццё ўласных ідэй раю прыдумляць нешта новае, цікавае і не забываць, што любая справа — гэта рызыка. Рызыкуйце!

Ірына Лукашык, студэнтка І курса Інстытута журналістыкі БДУ

Выбар рэдакцыі

Грамадства

Вясёлыя гісторыі чытачоў

Вясёлыя гісторыі чытачоў

Пра стасункі, армію і падарункі.

Грамадства

Вайна пакінула яму жыццё, але забрала блізкіх. Завіталі да клічаўскага ветэрана вайны Міхаіла Фельдмана

Вайна пакінула яму жыццё, але забрала блізкіх. Завіталі да клічаўскага ветэрана вайны Міхаіла Фельдмана

Нягледзячы на свае 96, Міхаіл Фельдман выглядае на зайздрасць бадзёрым і маладжавым. 

Грамадства

Прыёмная кампанія: да чаго рыхтавацца?

Прыёмная кампанія: да чаго рыхтавацца?

Зроблены першы крок да аб'яднання экзаменаў.