У Беларусі да канца года плануюць удасканаліць заканадаўства, якое рэгулюе рынак Форэкс, паведаміў намеснік начальніка ўпраўлення метадалогіі нябанкаўскіх аперацый галоўнага ўпраўлення рэгулявання некрэдытных фінансавых арганізацый Нацыянальнага банка Аляксей Уласаў. Пра гэта эксперт Нацбанка заявіў на канферэнцыі Асацыяцыі развіцця фінансавага рынку (АРФІН), якая сабрала вядучых прадстаўнікоў галіны для падвядзення вынікаў работы на пазабіржавым рынку Форэкс у мінулым годзе, а таксама для абмеркавання галоўных тэндэнцый развіцця сёлета.
Для падстрахоўкі
Прадстаўнік рэгулятара расказаў, што ўжо распрацаваны праект указа, якім будуць унесеныя змены ў работу пазабіржавога рынку Форэкс. «Цяпер ён знаходзіцца на ўзгадненні ў органах дзяржаўнага кіравання. Прыняцце і ўступленне дакумента ў сілу плануецца ў канцы года, але гэта будзе залежаць ад працэдуры ўзгаднення», — растлумачыў ён.
У прыватнасці, плануецца ўкараніць патрабаванне аб запісе і захоўванні тэлефонных размоў з кліентамі. «Гэта дазволіць пазбегнуць непрадбачаных момантаў пры разборы сітуацый, звязаных з цэнамі на базавыя актывы, іншых момантаў, якія не задавальняюць кліентаў у працы з форэкс-кампаніямі, пацвердзіць тое ці іншае меркаванне, пазіцыю па аперацыях», — адзначыў Аляксей Уласаў. Ён удакладніў, што пакуль запісы тэлефонных размоў мяркуецца захоўваць на працягу года, але гэты тэрмін можа карэктавацца.
У комплексе
Таксама плануецца ўзмацненне дыстанцыйнага кантролю за аперацыямі на рынку Фор-экс. «Мяркуецца выяўленне аперацый, якія значна адхіліліся ад устаноўленых параметраў — цэн базавых актываў пры адкрыцці і закрыцці пазіцый. Такія адхіленні сустракаюцца ў нядобрасумленнай практыцы, выяўленнем падобных выпадкаў будзе займацца Нацыянальны форэкс-цэнтр, а параметры будуць устаноўлены Нацбанкам. Само паняцце «істотныя адхіленні» таксама будзе раскрыта ў заканадаўстве», — заявіў спецыяліст.
Аляксей Уласаў падкрэсліў, што беларускае заканадаўства будзе набліжана да еўрапейскага. «Мяркуецца больш поўнае раскрыццё інфармацыі аб дзейнасці форэкс-кампаній не толькі кліентам, але і трэцім асобам. Магчыма, гэта будзе нейкая частка фінансавай справаздачнасці, вынікі працы кампаніі. Праект указа носіць комплексны характар і мяняе нават тэрміналагічныя падыходы. У прыватнасці, плануем, зыходзячы з вопыту ЕС, дадзеную дзейнасць называць інвестыцыйнай. Акрамя таго, плануем гаварыць не пра пазабіржавы рынак Форэкс, а пра рынак беспаставачных пазабіржавых фінансавых інструментаў», — сказаў ён.
З «плюсам»
Аляксей Уласаў расказаў пра вынікі працы рэгуляванага пазабіржавога рынку Форэкс нашай краіны за два гады, якія прайшлі з дня ўступлення ў законную сілу Указа Прэзідэнта Беларусі ад 4 чэрвеня 2015 года № 231 «Аб ажыццяўленні дзейнасці на пазабіржавым рынку Форэкс».
Паводле ацэнак прадстаўніка Нацыянальнага банка, за гэты час створана шматузроўневая сістэма абароны сродкаў кліентаў, абароны правоў спажыўцоў у рамках заканадаўства. Акрамя таго, прыцягнуты замежныя інвестыцыі, створаны рабочыя месцы. І па-трэцяе, уцягнуты зберажэнні грамадзян у эканамічны абарот і прыцягнуты ў краіну грашовыя сродкі нерэзідэнтаў.
Сістэма абароны сродкаў кліентаў, апроч іншага, уключае ў сябе фарміраванне Нацыянальным форэкс-цэнтрам гарантыйнага фонду з дапамогай унясення ўзносаў з боку форэкс-кампаній (на пачатак 2018 года — 820 тысяч долараў), фарміраванне забеспячальнага капіталу (больш за 1 млн долараў), а таксама выкананне суб'ектамі рынку патрабаванняў да іх знешніх контрагентаў. Па стане на 1 студзеня 2018 года каэфіцыент пакрыцця кліенцкіх сродкаў сродкамі гарантыйнага фонду складае больш за 20 %, што практычна ў тры разы перавышае каэфіцыент пакрыцця дэпазітаў насельніцтва, якія захоўваюцца ў банках, сродкамі агенцтва па гарантаванай кампенсацыі ўкладаў фізічных асоб у банкаўскім сектары краіны.
Па даных прадстаўніка Нацбанка, у 2017 годзе сумарны памер сфарміраванага статутнага фонду беларускіх форэкс-кампаній склаў 4 млн рублёў, у тым ліку нерэзідэнтамі ўнесена 3,6 млн рублёў (90 %). Такая высокая доля замежнага капіталу тлумачыцца зразумеласцю профільнага беларускага заканадаўства замежным інвестарам. Гэта забяспечыла стварэнне больш як 100 новых працоўных месцаў.
У цэлым, па словах Аляксея Уласава, летась колькасць кліентаў форэкс-кампаній склала больш за тры тысячы чалавек. Было здзейснена больш за 1 млн аперацый на агульную суму (з улікам маржынальнага пляча) 15,6 млрд рублёў. Больш як 70 % аперацый былі завершаны са станоўчым для кліентаў фінансавым вынікам.
Кансалідацыя рынку
Старшыня асацыяцыі развіцця фінансавага рынку Аляксей Сідараў адзначыў, што дзейнасць АРФІН летась была накіравана на фарміраванне прававога асяроддзя ўдзельнікаў пазабіржавога рынку Форэкс, павышэнне фінансавай адукаванасці насельніцтва і супрацьдзеянне нядобрасумленным практыкам.
«Для нас вельмі важна не толькі наладзіць супрацоўніцтва паміж дзяржаўнымі органамі і членамі асацыяцыі, але і аказаць падтрымку ўдзельнікам форэкс-рынку і спрыяць іх развіццю на тэрыторыі Беларусі, — сказаў Аляксей Сідараў. — Адным з вынікаў дзейнасці мінулага года з'яўляецца кансалідацыя большасці ўдзельнікаў пазабіржавога рынку Форэкс нашай краіны ў складзе АРФІН. Гэта дазваляе казаць аб іх прыхільнасці ўстойліваму развіццю і аказанню якасных паслуг. Важна таксама адзначыць эфектыўнасць наладжанага супрацоўніцтва асацыяцыі з рэгулятарам, па выніках узаемадзеяння з якім у цэлым улічана больш за 95 % прапаноў па ўдасканаленні заканадаўства».
Абараніць патэнцыйных інвестараў
Старшынёй было таксама адзначана, што сёлета плануецца пашырыць дзейнасць па аб'яднанні ўсіх удзельнікаў пазабіржавога рынку Форэкс і працягнуць працу, накіраваную на ўдасканаленне рэгулятарнага асяроддзя, у тым ліку па абароне кліентаў кампаній. Адным з важных напрамкаў работы Асацыяцыі развіцця фінансавага рынку з'яўляецца супрацьдзеянне нядобрасумленнай рэкламе, якая садзейнічае ўключэнню грамадзян краіны ў інвесціраванне сваіх грашовых сродкаў неправераным і часам ашуканскім арганізацыям, а таксама наносіць страты рэпутацыі форэкс-кампаній.
У тэму
Пастановай праўлення Нацбанка № 132 пашыраны круг замежных арганізацый, з якімі маюць права ўзаемадзейнічаць беларускія форэкс-кампаніі пры хэджаванні рызык.
У адпаведнасці з заканадаўствам, беларускія суб'екты пазабіржавога рынку Форэкс абавязаны здзяйсняць аперацыі з беспаставачнымі пазабіржавымі фінансавымі інструментамі выключна з замежнымі фінансавымі інстытутамі, якія ажыццяўляюць дзейнасць у рэгуляваных юрысдыкцыях пад эфектыўным кантролем (наглядам). Пералік такіх юрысдыкцый устанаўліваецца Нацыянальным банкам і на дадзены момант змяшчае 39 арганізацый.
Пастанова № 132 дапаўняе названы пералік Швейцарскай службай па наглядзе за фінансавым рынкам (Swіss Fіnancіal Market Supervіsory Authorіty) і Аўстралійскай камісіяй па каштоўных паперах і інвестыцыях (Australіan Securіtіes and Іnvestments Commіssіon). Названыя юрысдыкцыі характарызуюцца высокім узроўнем развіцця і ўстойлівасці фінансавага рынку, а таксама эфектыўнай сістэмай прававога рэгулявання і нагляду за яго ўдзельнікамі.
Прынятае рашэнне дазволіць беларускім суб'ектам пазабіржавога рынку Форэкс аптымізаваць працэс кіравання рызыкамі, а таксама забяспечыць стварэнне ўмоў для далейшага эфектыўнага і празрыстага развіцця пазабіржавога рынку Форэкс
Сяргей КУРКАЧ
Мерапрыемства праводзіцца на добраахвотнай аснове.
Не выявіць ні секунды абыякавасці.
