Падпісаны дагавор аб асновах супрацоўніцтва паміж Беларуссю і Грузіяй

Учора ў Тбілісі адбылася сустрэча Прэзідэнта Беларусі Аляксандра Лукашэнкі з Прэзідэнтам Грузіі Георгіем Маргвелашвілі, па выніках якой быў падпісаны стратэгічны дакумент аб супрацоўніцтве дзвюх краін.

На перагаворах з грузінскім калегам Аляксандр Лукашэнка падкрэсліў асаблівую дружбу паміж народамі Беларусі і Грузіі і добрыя пачуцці, якія засталіся яшчэ з савецкага часу. «Я сапраўды сюды еду як дадому. Хоць і другі раз. Але я адчуваю, што тут блізкія нам людзі», — сказаў Прэзідэнт Беларусі.

Перагаворы кіраўнікоў дзяржаў спачатку прайшлі ў фармаце сам-насам, а затым у пашыраным складзе. Прэзідэнты разгледзелі шырокае кола пытанняў парадку дня двухбаковага супрацоўніцтва з акцэнтам на развіццё ўзаемадзеяння ў гандлёва-эканамічнай сферы, а таксама ўдзялілі ўвагу кантактам у сферы палітыкі, абмеркавалі сітуацыю ў свеце і рэгіёне.

Кіраўнік беларускай дзяржавы пагадзіўся са словамі грузінскага лідара аб тым, што супрацоўніцтва дзвюх краін развіваецца ў першую чаргу дзеля грамадзян. Гэта датычыцца ўзаемадзеяння як у сферы паставак і вытворчасці прадуктаў харчавання, так і складанай тэхнікі. «У Беларусі няма закрытых тэм у супрацоўніцтве з Грузіяй», — падкрэсліў беларускі лідар. Ён таксама выказаў упэўненасць, што краіны ўжо сёлета змогуць пераадолець адзнаку $200 млн ва ўзаемным гандлі.

Георгій Маргвелашвілі таксама выказаўся за развіццё адносін паміж Беларуссю і Грузіяй. «Гэты візіт азнаменаваны тым, што мы будзем падпісваць дагавор, які стане вызначаць адносіны паміж Беларуссю і Грузіяй на многія дзесяцігоддзі. Дзякуй вам асабіста за дружбу і добрае стаўленне», — сказаў Прэзідэнт Грузіі. Ён падкрэсліў, што адносіны дзвюх краін для многіх у свеце могуць быць прыкладам.

На перагаворах у пашыраным складзе лідар Беларусі падзякаваў кіраўніцтву Грузіі за падтрымку на міжнародных пляцоўках, у тым ліку ў АБСЕ, ААН, на пляцоўцы «Усходняга партнёрства»: «Не было таго выпадку, каб Грузія не стаяла побач з Беларуссю ў самыя складаныя часы».

Гаворачы аб развіцці гандлёва-эканамічнага супрацоўніцтва, Аляксандр Лукашэнка адзначыў, што краіны ідуць не проста па шляху звычайнага тавараабмену, хоць гэта і важна, але пачынаюць ствараць навуковыя цэнтры для патрэб сельскай гаспадаркі, сумесныя вытворчасці. Прэзідэнт дадаў, што для эфектыўнага развіцця таго ці іншага кірунку неабходны падрыхтаваныя кадры, і ў гэтым плане ў краін ёсць добры патэнцыял для ўзаемадзеяння. «Калі мы ствараем сумесныя прадпрыемствы па трактарабудаванні, мы вам дапаможам падрыхтаваць спецыялістаў па гэтым кірунку, калі па жывёлагадоўлі — дапаможам вучонымі і спецыялістамі, калі мы вырашылі разам з вамі займацца транспланталогіяй — прыехаў наш кіраўнік цэнтра, прызнаны ва ўсім свеце», — канстатаваў Прэзідэнт Беларусі.

Па выніках перагавораў лідары дзвюх краін падпісалі Дагавор аб асновах супрацоўніцтва паміж Беларуссю і Грузіяй. У дакуменце замацаваны намер Беларусі і Грузіі ўмацоўваць узаемадзеянне на ўсіх узроўнях і ва ўсіх сферах, што ўяўляюць узаемную цікавасць.

Адзначаецца таксама намер заахвочваць кантакты на ўзроўні малога і сярэдняга бізнесу і рэалізацыю сумесных праектаў, развіваць супрацоўніцтва ў галіне максімальна эфектыўнага выкарыстання транзітнага патэнцыялу бакоў шляхам рэалізацыі сумесных праектаў у галіне транспарту і лагістыкі, а таксама ўдзелу ў развіцці міжнародных транзітных калідораў. Акрамя таго, Беларусь і Грузія будуць спрыяць пашырэнню міжрэгіянальнага супрацоўніцтва і ўзаемадзеяння ў сферы турызму.

У прысутнасці кіраўнікоў дзяржаў былі таксама падпісаны яшчэ 10 дакументаў, накіраваных на развіццё супрацоўніцтва па канкрэтных кірунках.

Фота БЕЛТА