Цяльпук шыдэлкам не падчэпіш, у хцівага сырызны не выпрасіш

Штотыдзень у эфіры тэлеканала «Беларусь 3» тэлевіктарына «Размаўляем па-беларуску». Для таго каб стаць яе ўдзельнікамі, неабходна зайсці на сайт tvrgomel.by або 3belarus.by і праз банер «Размаўляем па-беларуску» запоўніць заяўку на каманду з трох чалавек. Ну, а праверыць сваё веданне роднай мовы пасля таго, як праграма выйшла ў эфір, можна з дапамогай «Звязды».

Ці ведалі вы, што:

шыдэ́лак — кручок для вязання;
цяльпу́к — кароткі тоўсты кавалак дрэва, калодка;
хці́вы — скупы, карыслівы;
рахма́ны — дабрадушны, лагодны;
цэлік — прыцэл на ствале зброі;
сыры́зна — недаспелая садавіна ці агародніна.
Як рэзаны — вельмі моцна, нястрымна, адчайна крычаць, плакаць. Беларусы яшчэ скажуць: благім матам, на ўвесь свет. Рускія: не своим голосом, во всю ивановскую.
У руках быць — знаходзіцца ў поўнай залежнасці ад каго-небудзь. Беларускія адпаведнікі: пад абцасам, пад ботам, пад пятой. Рускія: под каблуком, под колпаком.