Вы тут

У Беларусі з'явілася першае альтэрнатыўнае мадэльнае агенцтва


Пакрытыя яскравымі татушкамі рукі, тунэлі і пірсінг, каляровыя валасы і кідкі макіяж — ці такім вы ўяўляеце сучасны мадэлінг? Але чаму не кінуць выклік старым надакучлівым стандартам і не вывесці на подыум людзей з нефарматнай знешнасцю?

У Беларусі з'явілася першае альтэрнатыўнае мадэльнае агенцтва B.О.О.M. (Brеаkіng оf оld mеmоrіеs), гэта каманда сапраўды ламае стэрэатыпы і ўяўленні пра свет прыгажосці. Хлопцы і дзяўчаты з «хуліганскай» знешнасцю скараюць дызайнераў, «упісваюцца» ў рэкламу разнастайных рэчаў — ад спартыўнага інвентару да ўпрыгажэнняў і вясельных сукенак, заражаюць пазітывам на мерапрыемствах, удзельнічаюць у самых адметных і крэатыўных тусоўках.


— Калі ўсе мадэлі аднолькавыя — гэта нецікава, а людзі з нестандартнай знешнасцю заўсёды запамінаюцца. Татуіроўкі, пірсінг ці, напрыклад, зялёныя валасы могуць камусьці спадабацца, а некаму — наадварот, але ўсё роўна такая мадэль прыцягвае ўвагу, — заўважае кіраўнік мадэльнага агенцтва Ірына Бабарэка. — Так, калі я была на міжнародным форуме прадпрымальніцтва, адзін з замежных спікераў адзначыў мой колер валасоў і зрабіў камплімент. На Захадзе людзі з татуіроўкамі ўжо нікога не шакіруюць, там гэта звычайная з'ява. А да нас мода на тату толькі зараз прыходзіць.

Між іншым, агенцтва Ірына адкрывала ў свой дзень нараджэння, калі ёй спаўняўся 21 год, а да таго паспела змяніць некалькі месцаў працы. Прычым зарабляць грошы дзяўчына пачала з 14 гадоў.

— З такога ўзросту падлеткі ўжо могуць афіцыйна працаваць. Я была ў дзіцячым доме, і для сірот гэта магчымасць зарабіць на марожанае. Мы былі падсобнымі рабочымі і атрымлівалі капейкі, але любы занятак — гэта вопыт. Я доўга шукала сябе. Атрымала будаўнічую спецыяльнасць. Але, калі працавала будаўніком, мулярам ці менеджэрам у друкарні, не бачыла для сябе перспектыў, — дзеліцца дзяўчына. — Тады надумала звольніцца і — будзь што будзе. На той час я мела вопыт здымак, прадстаўляла расійскае мадэльнае агенцтва, у вольны час займалася арганізацыяй здымак для яго. І мне падалося, што гэта крутая ідэя — стварыць у Беларусі новы праект для татуіраваных мадэляў. Насамрэч пачаць сваю справу — не так складана, як падаецца, і не так многа фінансаў патрабуецца. На рэкламу наогул не трацілася, пастаянна кантактавала з журналістамі, спачатку пісала сама. Паступова пачала стварацца каманда. Амаль год я практычна бясплатна працавала на сваіх мадэляў, дапамагала ім развівацца, арганізоўвала здымкі, унёсак рабілі і самі хлопцы і дзяўчаты. Хтосьці дапамагаў ствараць дызайн афіш мерапрыемстваў, нехта ўмеў наносіць макіяж, здымаць...

Звычайна, калі людзі прыходзяць у агенцтва, яны плацяць за здымкі, майстар-класы, навучанне. Каб пачаць працаваць мадэллю ў B.О.О.M., плаціць не трэба. Ды і навучанне там выключна практычнае — замест сумных майстар-класаў агенцтва арганізоўвае фотаздымкі, на якіх людзі спрабуюць сябе ў розных вобразах, разнявольваюцца, перастаюць баяцца камер.

І ўсе стараюцца. Тыя ж, хто да справы ставіцца несур'ёзна, вылятаюць з каманды. У нас ёсць сістэма балаў, якія мадэлі атрымліваюць за здымкі, удзел у мерапрыемствах і нават за рэпосты агенцтва. Хто набраў больш за астатніх, заахвочваецца падарункамі ад партнёраў — дызайнераў і крам. Дарэчы, першым падарункам, калі сістэма толькі ўводзілася, была бясплатная татуіроўка, за яе вялася цэлая «вайна». Пад канец месяца я заўсёды заўважаю максімальную актыўнасць — усе думаюць, як зарабіць балы і трапіць у спіс прызёраў. У той жа час той, хто правініўся, — караецца. Балы зніжаюцца нават за грубыя словы, — дзеліцца Ірына.

Трэба сказаць, што B.О.О.M. дае магчымасць рэалізавацца людзям, для якіх закрыты класічны мадэлінг. Так, у не вельмі высокіх мадэляў шанцаў трапіць на подыум няма, але ў альтэрнатыўным агенцтве хлопцы і дзяўчаты могуць быць задзейнічаны ў фотаздымках.

Апошнім часам усё большую цікаўнасць выклікаюць незвычайныя тыпажы, а альтэрнатыўны мадэлінг якраз аб'ядноўвае людзей з самабытнай, запамінальнай знешнасцю. Больш за тое, з такімі асобамі любяць працаваць стылісты і візажысты, бо з імі можна ўвасабляць самыя неверагодныя ідэі, экстравагантна іх апранаць, эксперыментаваць з макіяжам.

— Калі звычайнаму чалавеку зрабіць зялёныя вочы і, напрыклад, жоўтыя вусны, гэта можа выглядаць і непрыгожа, і недарэчна. Калі ж у мадэлі каляровыя валасы і цела пакрыта татуіроўкамі, можна спалучаць разнастайныя колеры і гэта будзе выглядаць гарманічна, — заўважае Ірына. — Але мы не раім рабіць татуіроўкі толькі для таго, каб трапіць да нас у агенцтва. Не факт, што чалавеку спадабаецца праца мадэлі, а са знешнасцю, якая яму, магчыма, і не падабаецца, ён застанецца і будзе вымушаны змірыцца.

— Змена знешнасці можа ўплываць на жыццё чалавека. Што набывае той, хто робіць такі крок?

— Я — працу, хобі, сям'ю, сяброў, змагла сабраць добрую каманду — цудоўны калектыў з людзей, якім давяраю і якімі ганаруся. Маіх мадэляў друкуюць у глянцавых часопісах, запрашаюць на здымкі, імі цікавяцца. У нас з'явіліся фанаты, хлопцаў і дзяўчат пазнаюць на вуліцы, падтрымліваюць. Нават погляды на жыццё змяніліся, я з цікавасцю гляджу на свет, мне падабаецца разглядаць мінакоў. Так, заўважаю, што апошнім часам стала больш рознакаляровых людзей, з жоўтымі, зялёнымі валасамі; сустракала і дзяўчат, у якіх нават па колерах афарбоўка падобная на маю: палова галавы ў бірузовым, палова ў ружовым колеры. Усё менш становіцца непаразуменняў, хаця негатыву і зараз яшчэ хапае...

У Беларусі пакуль яшчэ не ўсе гатовы адэкватна ўспрымаць эксперыменты са знешнасцю. Часам нефарматная моладзь можа пачуць у свой бок непрыемныя словы. Існуюць і стэрэатыпы, што людзі з татуіроўкамі на руках ці тунэлямі ў вушах — амаль асацыяльныя элементы. Ірына ўспомніла, як да яе ў транспарце прывязаўся нецвярозы чалавек: «Адкажы за свае наколкі», але колькі дзяўчына ні спрабавала растлумачыць, што гэта «мастацкая татуіроўка» і яна не мае ніякага дачынення да турэмнай сімволікі, адвязацца ад хама было цяжка. Насамрэч прымяраць на сябе яскравыя вобразы могуць і вельмі сціплыя, спакойныя людзі. Мадэлі альтэрнатыўнага агенцтва атрымліваюць вышэйшую адукацыю ці ўжо працуюць юрыстамі, эканамістамі, занятыя на розных важных, «сур'ёзных» пасадах. І часта на асноўным працоўным месцы ім даводзіцца забывацца на свае густы — хаваць татуіроўкі пад доўгімі рукавамі, не рабіць «узрыўны» макіяж. Затое на здымках моладзь кайфуе, адрываецца па поўнай. Дарэчы, іх каляровы лад жыцця прадстаўлены ў інтэрнэце.

— У нас з'явілася ідэя ствараць відэаблогі (яны выкладваюцца ў нашай групе «УКантакце» і на YоuTubе) і суправаджаць іх міні-інтэрв'ю. Мы нічога не хаваем. Людзі могуць назіраць за працай мадэляў, бачыць, як праходзяць здымкі, больш даведацца пра агенцтва, нашых хлопцаў і дзяўчат. Часам на фатаграфіі мадэлі могуць выглядаць агрэсіўнымі, а ў жыцці яны адкрытыя, мілыя, пазітыўныя, — далучаецца да размовы галоўны памочнік Ірыны Юрый Ванкевіч. — Вы заўважыце, якія розныя ідэі можна раскручваць з нашай камандай, любы тавар можна абыграць у фотапраекце ці відэарэкламе. Прычым з альтэрнатыўнымі мадэлямі зрабіць гэта можна прыгожа і яскрава. Праз вобраз, фота можна падаваць інфармацыю (напрыклад, мы малявалі на тварах сцягі і здымаліся з нацыянальнымі стравамі розных краін). А чаму б не закрануць сацыяльную тэматыку? Так, мы рабілі сумесныя здымкі бацькоў і дзяцей — праект пра ўзаемаадносіны ў сям'і.

— У першую чаргу хацелася сказаць, каб бацькі паважалі інтарэсы дзяцей, — дадае Ірына. — Лепш няхай дзіця эксперыментуе з колерам валасоў, чым ужывае наркотыкі ці яшчэ што. Калі падлетак загарэўся ідэяй па змене знешнасці, ён усё роўна зробіць татуіроўку, магчыма, недзе падпольна, дрэнную, крывую. Важна, каб у сям'і было паразуменне, нічога не ўтойвалася.

Дарэчы, у планах агенцтва — стварыць такую прастору, куды змогуць звяртацца людзі рознага ўзросту, у тым ліку дзеці і састарэлыя, і пры жаданні кожны зможа паспрабаваць сябе ў ролі мадэлі.

Некаторыя ідэі Ірына пакуль трымае ў сакрэце, але падзялілася, што ў найбліжэйшы час (да таго, як выйдзе ў дэкрэт) хоча адкрыць фотастудыю, зноў жа не падобную ні на якія іншыя, і што там сапраўды будзе крута.

Алена ДЗЯДЗЮЛЯ

Загаловак у газеце: Нефарматны подыум

Выбар рэдакцыі

Грамадства

Як выхаваць даследчыка за школьнай партай?

Як выхаваць даследчыка за школьнай партай?

Чаму ўсе краіны, якія развіваюць інавацыйную эканоміку, робяць сёння стаўку на STЕM? 

Палітыка

Аляксандр Лукашэнка сустрэўся з прадстаўнікамі СМІ Расіі

Аляксандр Лукашэнка сустрэўся з прадстаўнікамі СМІ Расіі

Некалькі рэчаў сёлета адбываюцца ўпершыню.

Грамадства

Ці набудуць у гаспадароў старыя хаты?

Ці набудуць у гаспадароў старыя хаты?

Адэльскі сельскі савет, што ў Гродзенскім раёне, можна назваць брамай у Еўрасаюз.