Вы тут

Уладзімір Андрэйчанка: Праблема сацыяльнага інфантылізму ўзнікла даўно


«У дэпутатаў парламента і мясцовых Саветаў ёсць шырокая прастора для праяўлення ініцыятывы і актыўнасці», — заявіў у інтэрв'ю «Звяздзе» старшыня Палаты прадстаўнікоў Нацыянальнага сходу Беларусі Уладзімір АНДРЭЙЧАНКА.


— Уладзімір Паўлавіч, вы прайшлі ўнікальную дэпутацкую школу ў мясцовых Саветах, Вярхоўным Савеце БССР, Савеце Рэспублікі і ў Палаце прадстаўнікоў Нацыянальнага сходу, якую ўзначальваеце ўжо трэцяе скліканне. Скажыце з вышыні вашага вопыту, якую ўладу мае дэпутат?

— Улада дэпутата — гэта яго ўплыў на вырашэнне канкрэтных сацыяльна-эканамічных праблем і пытанняў, важных для людзей, тэрыторый, рэгіёнаў і краіны, на грамадска-палітычныя падзеі і грамадскія працэсы. Зразумела, у рамках сваёй кампетэнцыі, вызначанай заканадаўствам. Я думаю так, калі гаварыць коратка.

Маеце на ўвазе парламентарыяў?

— Чаму толькі іх? Дэпутатаў усіх прадстаўнічых дзяржаўных органаў — і парламента, і мясцовых Саветаў. Мы робім адну справу.

— Але ж адказнасць розная — ёсць агульнанацыянальныя, рэспубліканскія задачы, а ёсць і мясцовыя, рэгіянальныя.

— Адказнасць — яна ва ўсім адказнасць. Без вырашэння гэтых задач як на дзяржаўным, так і мясцовым узроўнях эфектыўнага руху краіны наперад і развіцця рэгіёнаў не будзе. Вось такая непарыўная між імі ўзаемаўвязка.

— На нядаўняй рабочай сустрэчы з вамі Прэзідэнт звярнуў сур'ёзную ўвагу на неабходнасць умацавання работы дэпутатаў у выбарчых акругах. Як Палата прадстаўнікоў мяркуе рэалізоўваць гэта ўказанне?

— Мы не проста мяркуем выконваць, а выконваем рэкамендацыі і задачы, пастаўленыя кіраўніком дзяржавы. Гэта датычыцца таксама нашай заканатворчай і міжнароднай дзейнасці. Усё гэта пытанні эфектыўнасці парламента, якасці ажыццяўлення дэпутатамі сваіх паўнамоцтваў. Напярэдадні выбараў у мясцовыя Саветы, як падкрэсліў Аляксандр Рыгоравіч Лукашэнка, асабліва важна быць бліжэй да людзей і мясцовых органаў улады. Скажу вам, нішто ў заканадаўчай, як і ўвогуле ў парламенцкай дзейнасці, не можа замяніць асабістага кантакту, шчырай, адкрытай размовы з людзьмі па ўсіх праблемах, якія іх хвалююць. Вытокам многіх заканадаўчых навацый па сацыяльных, гаспадарчых і праваахоўных пытаннях, у тым ліку па вельмі адчувальных, з'яўляецца менавіта дэпутацкая работа ў выбарчых акругах. З рэгіёнаў дэпутаты прывозяць і свае прапановы, якія ўлічваюцца пры карэкціроўцы заканадаўства, у рашэннях урада і іншых дзяржаўных органаў.

— Вялікі грамадскі рэзананс выклікалі дэкрэты кіраўніка дзяржавы аб развіцці прадпрымальніцтва і садзейнічанні занятасці насельніцтва. Што ў гэтым кантэксце асабліва важна для дэпутацкага корпуса парламента?

— Сістэмныя меры па паляпшэнні дзелавога клімату і вырашэнні праблем занятасці маюць вялікае значэнне для сацыяльна-эканамічнага развіцця краіны. Парламенту трэба будзе правесці карэкціроўку эканамічнага, грамадзянскага і іншага заканадаўства. Гэта адзін з нашых заканатворчых прыярытэтаў. Што датычыцца выбарчых акруг, то на першым плане для нас канкрэтныя пытанні працаўладкавання непрацуючых грамадзян і інфармацыйна-растлумачальная работа, чым і займаюцца дэпутаты. Важна тлумачыць меры, якія прымае дзяржава па ключавых пазіцыях сацыяльна-эканамічнага развіцця краіны і ўмацавання нацыянальнай бяспекі. Гэта вельмі грамадска значная справа. Рабіць яе трэба з глыбокім веданнем, прафесіянальна.

— Наколькі магчыма прыцягнуць да працаўладкавання тых працаздольных грамадзян, якія працаваць не хочуць?

— Праблема сацыяльнага інфантылізму і спажывецтва ўзнікла не сёння і не ўчора. Ёй далі патачку ў савецкі час. Таму няпроста ўзараць гэту няўдобіцу. Навацыі Дэкрэта № 1 з'явіліся праз актыўны дыялог улады з грамадскасцю і адкрываюць перспектыву вырашэння сур'ёзнай грамадскай праблемы. У гэтым наш грамадскі і дзяржаўны інтарэс. І яго трэба актыўна і мэтанакіравана ажыццяўляць. Каму тут быць на правым флангу, як не выканаўчым камітэтам і мясцовым Саветам — самым блізкім да людзей органам дзяржаўнай улады?

Я лічу, што названыя дэкрэты Прэзідэнта адкрываюць новую прастору для прымянення ініцыятывы і актыўнасці дэпутатаў усіх узроўняў. Ад іх настойлівасці ў многім залежыць не толькі вырашэнне сацыяльных, камунальных і бытавых пытанняў, але і вытворчых. Уменне, калі патрэбна, падштурхнуць кіраўнікоў прадпрыемстваў і раённыя ўлады ўшчыльную заняцца павышэннем эфектыўнасці вытворчасці, мадэрнізацыяй, стварэннем новых працоўных месцаў мае немалое значэнне. Гэта датычыцца і вырашэння пытанняў занятасці. Адна сітуацыя, калі чалавек часова не працуе па ўважлівай прычыне, і другая, калі свядома сядзіць на шыі сваіх блізкіх і дзяржавы, вядзе непрыстойны лад жыцця. У кожным выпадку патрэбен індывідуальны падыход — канкрэтны, акуратны і ўзважаны. Мы бачым у рэгіёнах, што такі падыход дазваляе весці вельмі плённую работу па прыцягненні непрацуючых грамадзян да малога прадпрымальніцтва, рамесніцтва, у сферы гандлю, паслуг і да іншых відаў дзейнасці ў залежнасці ад спецыфікі рэгіёна ці тэрыторыі, стымулюе самазанятасць. Невырашальнымі праблемы не здаюцца, калі іх стараюцца вырашаць.

— На вашу думку, ці ёсць у парламентарыя магчымасць максімальна аператыўна рэагаваць на нестандартныя сітуацыі, якія ўзнікаюць у выбарчай акрузе?

— У гэтым пытанні адчуваецца няўпэўненасць, але я не сумняваюся ў такой магчымасці, калі зваротная сувязь дэпутата з грамадзянамі і мясцовымі органамі ўлады працуе як гадзіннік. Добры гадзіннік ніколі не адстае. Трэба ведаць усе асабліва пульсуючыя праблемныя кропкі ў раёнах сваёй выбарчай акругі, трымаць руку на іх пульсе і вырашаць наспелыя пытанні разам з рэгіянальнымі органамі ўлады і мясцовымі жыхарамі. Вельмі важна бачыць мясцовыя магчымасці і рэсурсы і прыводзіць іх у дзеянне, каб жыццё жыхароў акругі паляпшалася.

— Гэта ключ да рэпутацыі дэпутата?

— Можна сказаць і так. Дэпутаты Палаты прадстаўнікоў імкнуцца пастаянна трымаць у фокусе ўвагі інтарэсы сваіх рэгіёнаў і выбаршчыкаў. Таму ёсць і станоўчы вынік і эканамічнага, і сацыяльнага характару.

— Як вы лічыце, чаго не павінна быць у дэпутацкай рабоце?

— Абстрактнага падыходу да чалавека і адарванасці ад палітычнай рэальнасці.

— Ведаю па водгуках, што жыхары Докшыцкай выбарчай акругі № 22, ад якой вы выбраны дэпутатам парламента, успрымаюць вашы рабочыя прыезды як прыезды свайго чалавека, які вельмі многа зрабіў і робіць для акругі і людзей. Можаце сказаць хоць бы канспектыўна пра асноўнае, што зроблена вамі за мінулы год?

— Займаюся рознымі сацыяльна-эканамічнымі пытаннямі сумесна з кіраўніцтвам Глыбоцкага, Докшыцкага і Ушацкага раёнаў. Гэта будаўніцтва, мадэрнізацыя, капітальны і бягучы рамонт, прыцягненне інвестыцый у асабліва значныя вытворчыя і сацыяльныя праекты, добраўпарадкаванне тэрыторый і іншае. Вырашаю па меры магчымасці і канкрэтныя просьбы грамадзян, якія прыходзяць на мае дэпутацкія прыёмы, звяртаюцца з вуснымі і пісьмовымі зваротамі. Словам, будзённая дэпутацкая работа, як і ў маіх калег. Мы ўсе настроены на тое, каб наша заканадаўчая дзейнасць і праца ў выбарчых акругах прыносілі карысць простаму чалавеку. На сваім вопыце пераканаўся: калі ставішся да людзей з разуменнем і адкрытым сэрцам, то так яны ставяцца і да дэпутата.

— Уладзімір Паўлавіч, што вы пажадаеце новаму складу мясцовых Саветаў, які будзе выбраны 18 лютага?

— Лёгкасці на пад'ём у вырашэнні задач, якія стаяць перад мясцовымі Саветамі, і актыўнай работы на практычны вынік, каб 2018 год, аб'яўлены Годам малой радзімы, прынёс добры плён рэгіёнам і тэрыторыям. Гэта ў нашых агульных інтарэсах. У інтарэсах краіны.

Аляксандр ФІЛІМОНАЎ

Загаловак у газеце: Чым бліжэй да людзей, тым бліжэй да жыцця

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.