Вы тут

Фільм з сямю намінацыямі на «Оскар» ідзе ў мінскім пракаце


Выдатны прыклад нешаблоннай драматургіі, дарэчнага змяшэння жанраў і стварэння неверагодных персанажаў, якія застаюцца з табой раз і назаўжды, будзе ісці да 15 лютага. Карціна напалову ірландскага, напалову брытанскага рэжысёра Марціна МакДоны «Тры білборды на мяжы Эбінга, Місуры» ўжо атрымала ўзнагароды ў Венецыі, «Залатыя глобусы» і некалькі намінацый на «Оскар». На прэмію Амерыканскай кінаакадэміі чорная камедыя прэтэндуе ў тым ліку як найлепшы фільм: яе дасканалая прастата, жыццесцвярджэнне без маралізатарства і наіўная, але не банальная, трансфармацыя герояў галоўнай статуэткі дакладна вартыя.


Дзеянне «Трох білбордаў» — для лонданца карціна стала першым рэалізаваным у ЗША праектам — адбываецца ў амерыканскай правінцыі. Галоўная гераіня Мілдрэд заўважае тры пустыя білборды на дарозе, па якой ніхто не ездзіць, і вырашае выкарыстаць іх у сваёй барацьбе за раскрыццё справы аб згвалтаванні і забойстве яе дачкі. Яна кідаецца ў рэкламнае агенцтва і арандуе білборды, заказваючы тры надпісы, адрасаваныя шэфу мясцовай паліцыі Уілаўбі. Паліцыя ж, замест таго каб успрыняць гэта як стымул да дзеяння, лічыць учынак Мілдрэд абвяшчэннем вайны. Першым у гэтай вайне аказваецца дурны, лянівы і нязграбны супрацоўнік паліцыі Дыксан, і нават сам Уілаўбі, якога, мабыць, не дарэмна любіць увесь горад, спачатку няздольны стаць на месца маці, што страціла дачку.

І вось, у гэтай гарачай, але крыху абсурднай барацьбе нейкім чынам аказваецца замяшаным ледзь не ўвесь горад: ярка-чырвоныя білборды Мілдрэд выклікаюць рэзананс, і кожны персанаж — з-за сваёй пазіцыі або асабістага стаўлення — аказваецца на нейкім баку.

Што цікава, сам глядач, калі і аказваецца на пэўным баку, эмпатыю будзе адчуваць амаль да кожнага з персанажаў — маці Дыксана, інфантыльнага дырэктара рэкламнага агенцтва, закаханага ў Мілдрэд карліка і, вядома ж, да кожнага з галоўных герояў.

У гэтай мітусні мы можам убачыць жыццё Мілдрэд, Уілаўбі і Дыксана, трапіць у іх сем'і, растлумачыць іх паводзіны і не знайсці ў гэтым сюжэце ніводнага адмоўнага персанажа (акрамя нябачнага забойцы і яго магчымага ўвасаблення ў эпізадычнай ролі маральнага вылюдка). У эксцэнтрычных выбрыках Мілдрэд вы гатовы ўдзельнічаць самі, паводзіны Дыксана здольны зразумець і прыняць, у дачыненні да Уілаўбі адчуваеце, што можаце на яго спадзявацца.
І гэтая надзея не аказваецца марнай — менавіта шэф паліцыі, ужо не як чын, а як звычайны чалавек, дае старт кардынальным трансфармацыям. У гумарыстычнай традыцыі фільма лагічна, што замацоўвае вынік недалёкая 19-гадовая дзяўчына былога мужа галоўнай гераіні, якая прамаўляе цытату пра тое, маўляў, што зло спараджае толькі зло. І зло адступае — Мілдрэд і Дыксан аб'ядноўваюцца дзеля апошняй справы, якую невядома, ці завершаць.

У выпадку з новай карцінай МакДоны нельга не захапіцца распрацоўкай персанажаў і акцёрскімі ролямі. Галоўную гераіню шыкоўна сыграла Фрэнсіс МакДорманд — актрыса, што выглядае, як суседка з мясцовага двара. Яна стварыла вобраз рашучай, смелай, баявой, разняволенай, іранічнай прадаўшчыцы ў сувенірнай краме, якая ў адзіночку ўвязваецца ў барацьбу і да апошняга трымаецца ў ёй малайчынай. Вудзі Харэльсан сыграў шэфа паліцыі і сваім добрым тварам ні на секунду не даў усумніцца, што ўсё будзе добра (ці амаль усё). Сэм Рокуэл непараўнальны ў ролі мамчынага сынка як у сцэнах, калі яго прыніжаюць, так і ў сцэнах, дзе прыніжае ён.

Ва ўсім гэтым смешным, трагічным і насычаным тлуме дабро нарэшце небанальна перамагае зло. Можна надоўга затрымацца ў кур'ёзнай гісторыі амерыканскай правінцыі, дзе нетрадыцыйная, але супердраматургія, гумар і простая скіраванасць да гледача без высакалобага снабізму ўвасабляюцца ў трох чырвоных білбордах.

Марцін МакДона, дарэчы, зняў карціны «Залегчы на дно ў Бруге» з Колінам Фарэлам і Брэнданам Глісанам і «Сем псіхапатаў», дзе апроч іншых сыгралі Вудзі Харэльсан і Сэм Рокуэл з «Трох білбордаў». Акрамя таго, брат Марціна МакДоны — даволі вядомы рэжысёр і прызёр Берлінале Джон Майкл МакДона, які зняў, напрыклад, гамерычна смешны фільм «Аднойчы ў Ірландыі» і актуальна-абсурдную «Галгофу». Нарэшце, акрамя поўнаметражных работ, Марцін МакДона з'яўляецца аўтарам кароткаметражкі «Шасцізарадны», якая ў 2006 годзе ўжо атрымала «Оскар» як найлепшы ігравы кароткаметражны фільм. Наступная цырымонія ўзнагароджання гэтай прэміяй Акадэміі пройдзе ў Лос-Анджэлесе 4 сакавіка — тады мы і даведаемся, ці атрымалі «Тры білборды» і яго акцёры па заслугах.

Ірэна КАЦЯЛОВІЧ

Загаловак у газеце: Тры чырвоныя білборды

Выбар рэдакцыі

Эканоміка

Тонкае мастацтва дабрабыту. Складаем сямейны бюджэт разам спецыялістам Нацбанка

Тонкае мастацтва дабрабыту. Складаем сямейны бюджэт разам спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.

Калейдаскоп

Вясёлыя гісторыі чытачоў

Вясёлыя гісторыі чытачоў

Класiкаў трэба ведаць…, Быў бы араты, будзе й прыганяты, Па малiну…

Эканоміка

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

У бiзнес-колах Гродзеншчыны лiчаць, што меры па падтрымцы эканомiкi з'явiлiся своечасова.