У штотыднёвым спартыўным аглядзе «Звязды» расказваем пра тое, з кім будзе змагацца наша гандбольная зборная за права згуляць на чэмпіянаце свету, ці выступіць Вікторыя Азаранка на турніры ў Катары і як завяршыўся чарговы паядынак у Адзінай лізе ВТБ для мінскіх баскетбалістаў.
1. У харвацкім Заграбе прайшла жараб'ёўка матчаў плэй-оф за права згуляць у фінальнай стадыі мужчынскага чэмпіянату свету па гандболе, які пройдзе ў 2019 годзе ў Германіі і Даніі. Беларускія гандбалісты ў барацьбе за пуцёўку на сусветнае першынства двойчы згуляюць з камандай Аўстрыі. Першы матч пройдзе ў Мінску 8 чэрвеня, матч у адказ — у перыяд з 12 па 14 чэрвеня на пляцоўцы аўстрыйцаў.
— Мы паважаем любога саперніка, не скажу, што нам трапіў лёгкі праціўнік. Характарыстыка «рабочы варыянт» да гэтай каманды не падыходзіць. Сутнасць жараб'ёўкі для мяне толькі ў тым, што даведаюся саперніка, ажыятажу з яе ніколі не раблю. З гэтага моманту пачынаецца падрыхтоўка, планаванне. Аўстрыйцы — добрая каманда. Да чэрвеня яшчэ шмат часу. Звычайна я люблю гуляць на выездзе першы паядынак. Але як ёсць, — пракаментаваў жараб'ёўку галоўны трэнер зборнай Беларусі Юрый Шаўцоў.
Склады астатніх пар плэй-оф за месца на ЧС-2019:
Сербія — Партугалія,
Літва — Ісландыя,
Чэхія — Расія,
Славенія — Венгрыя,
Македонія — Румынія,
Нарвегія — Боснія і Герцагавіна ці Швейцарыя,
Харватыя — Чарнагорыя,
Нідэрланды — Швецыя.
Прамы пропуск атрымліваюць гаспадары чэмпіянату планеты Германія і Данія, дзеючы чэмпіён свету Францыя, а таксама пераможцы чэмпіянату Еўропы — зборная Іспаніі.
2. Вікторыя Азаранка атрымала wіld саrd ад арганізатараў Адкрытага чэмпіянату Катара. Турнір у Досе будзе праходзіць з 12 па 18 лютага. Нагадаем, што раней Вікторыя перамагала там у 2012 і 2013 гадах.
Спецыяльнае запрашэнне атрымала таксама расійская тэнісістка Марыя Шарапава. Абедзве экс-першыя ракеткі свету могуць стартаваць на турніры з асноўнай сеткі. Адзначым, што сёлета спаборніцтвы ў Катары адносяцца да катэгорыі Рrеmіеr 5.
Адзначым таксама, што найлепшая з беларускіх тэнісістак Аляксандра Сасновіч у Мельбурне дабралася да 1/16 фіналу, што дазволіла ёй упершыню ў кар'еры падняцца на 46-е месца ў сусветным рэйтынгу. Яшчэ адна беларуска Арына Сабаленка займае 65-ю пазіцыю, што таксама з'яўляецца яе найлепшым дасягненнем.
3. Мінскія «Цмокі» пацярпелі восьмае паражэнне ў матчах Адзінай лігі ВТБ у гасцявым паядынку з аўтсайдарам спаборніцтваў рыжскім ВЭФам — 70:82. У складзе прайграўшых самым выніковым стаў амерыканскі легіянер Дэвон Садлер, які набраў 16 ачкоў.
Мінчане маюць у сваім актыве чатыры вікторыі ў 12 праведзеных сустрэчах і па-ранейшаму займаюць 7-е месца ў турнірнай табліцы. Лідзіруе краснадарскі клуб «Лакаматыў-Кубань» — 12 перамог, на адзін выйгрыш менш у маскоўскага ЦСКА і казанскага УНІКСА, 10 разоў перамагаў піцерскі «Зеніт».
Свой наступны матч «банкаўскага» турніру мінскія «Цмокі» правядуць 4 лютага ў Казані, а 11 лютага на пляцоўцы «Мінск-Арэны» прымуць ЦСКА.
4. Аршанскі «Вітэн» трэці раз стаў уладальнікам Кубка Беларусі па міні-футболе. У вырашальным паядынку футбалісты перайгралі дзеючага чэмпіёна краіны — мінскую «Сталіцу» — 5:3.
Для «Вітэна» гэта трэці поспех у кубкавых розыгрышах, да гэтага ён выйграваў трафей два гады запар — у 2009 і 2010 гадах.
Дар'я ЛАБАЖЭВІЧ
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.