Вы тут

Пейзажы Сямёна Дамарада супраць халодных дзён


У памяці кожнага з нас ёсць любімыя пейзажы, якія звязваюць з дарагімі момантамі жыцця. Мы не ўспамінаем іх штодзень, але яны могуць выпадкова ўсплываць у памяці. А ёсць творы, якія падштурхоўваюць да ўспамінаў. Як выстаўка «Паэтыка пейзажу Сямёна Дамарада», што працуе ў пераходнай галерэі Нацыянальнага мастацкага музея Рэспублікі Беларусь.


«Вясной», 2017 г

У экспазіцыю ўвайшло парадку трыццаці мастацкіх твораў, у якіх аўтар апявае родную краіну. Работы Сямёна Дамарада кранаюць глыбінёй, фатаграфічным эфектам. Нягледзячы на маразы за акном, аўтар запрашае нас у вясну. Яго мяккая лірычная нота дакладна перадае стан беларускай прыроды. Работы напісаны па-майстэрску, з вялікай душэўнай цеплынёй.

— Прыемна, што ў юбілейны год атрымалася выставіцца ў Мастацкім музеі, — адзначае Сямён Дамарад. — Для мяне пейзаж вельмі важны і блізкі жанр, таму хочацца, каб глядач убачыў, што гэта сапраўдная прадуманая работа. Я люблю тонкі, паэтычны жывапіс. Захапляюся не толькі вялікімі прасторамі прыроды, але і камернымі краявідамі. Часам проста іду па пяску, і гэтыя адчуванні западаюць у душу. Магу паглядзець у лужыну і ўбачыць у ёй адлюстраванне дрэва, і гэты момант мяне будзе хваляваць. Калі ўбачу нейкі прыцягальны пейзаж, адразу ж фіксую яго на паперы, а потым замалёўка будзе рэалізаваная на палатне.

 Майстар працаваў у розных жанрах: манументальны жывапіс, партрэт, нацюрморт. Апошнія гады аддае перавагу жывапісу, але ў яго творах адчуваецца ўплыў акварэльнай тэхнікі. Пейзажы выкананы ў рэалістычнай манеры, але пры гэтым дзіўна рамантычныя і паэтычныя па настроі. Колеры мяккія, без рэзкіх кантрастаў, але вельмі насычаныя эмацыянальна, поўныя святла і паветра.

Мастацтвазнаўцы называюць творцу мастаком настрою: Сямён Дамарад часта занатоўвае на палотнах пераходны настрой прыроды. Так, у адной рабоце можна заўважыць, як знікае зіма і прыходзіць вясна, альбо ў адным творы спалучаюцца сонейка і дождж. Лета на палотнах мастака практычна не сустрэнеш. Аўтар называе гэты перыяд часам ідэй і накідаў. Пачынае пісаць творы з натуры і толькі зімой дарабляе іх у цёплай майстэрні.

— Я любіў пейзаж з дзяцінства. Пісаў шмат акварэлі, шмат эцюдаў рабіў з натуры, — дзеліцца мастак. — Да сённяшняга дня шмат часу праводжу на прыродзе. Ад яе чэрпаю натхненне. Памятаю, як у дзяцінстве я спаў на траве ля ракі пад плашчом з бацькам. Часта з дзедам і бацькам мы шукалі новыя цікавыя месцы. Заўсёды мяне здзіўляла наша прырода. Я мог ісці, убачыць кветкавы луг і доўга ім любавацца. Уражвалі захады сонца, маленькі кавалачак вады з чаротамі. Уражванні назапашваліся і адлюстраваліся ў творчасці. Вядома, уменне перадаць прыгажосць вельмі важнае для мастака. Галоўнае — не сапсаваць краявід.

Творца жыве ў горадзе, але ж не можа адказаць сабе ў задавальненні пакасіць луг, з’ездзіць на рыбалку, пасядзець ля берага ціхага возера і падарыць жонцы палявыя кветкі. Усё гэта фарміруе запас для рэалізацыі творчых задум.

— Акрамя пейзажа, люблю манументальны жывапіс. У мяне ёсць шмат вітражоў, мазаік, роспісаў. Бывала так, што нават жывапіс адыходзіў на другі план, — адзначае Сямён Дамарад. — Але калі ў поле майго зроку трапляе цікавы пейзаж, адразу хочацца ўзяць у руку пэндзаль. Мае пейзажы далікатныя і цёплыя, таму што маімі кумірамі былі такія мастакі, як Ісаак Левітан, Вітольд Бялыніцкі-Біруля. Бывае, што адразу падабаецца некалькі пейзажаў, і я пачынаю іх складваць як пазлы, ствараю адзін сюжэт, які можа мяняцца ў працэсе. Галоўнае — захаваць пачуццё трапятання ў гэты момант.

Сямён Дамарад — адзін з самых знакамітых беларускіх пейзажыстаў. Мастак сам, бывае, здзіўляецца, як у такім, здавалася б, традыцыйным жанры змог заняць сваё месца. Але ўпэўнены, што многаму навучыўся ад бацькі — знакамітага беларускага графіка Уладзіміра Дамарада.

Работы Сямёна Уладзіміравіча знайшлі свайго гледача не толькі ў Беларусі, але і за яе межамі. Яго персанальныя выстаўкі праходзілі ў Германіі, Аўстрыі. У 2017 годзе работы мастака выстаўляліся ў Палацы Незалежнасці ў Мінску і ў Расійскім доме навукі і культуры ў Берліне. Майстар шмат працуе, імкнецца знаходзіць адметныя мясціны, каб паказаць гледачам, якая вялікая і цікавая наша краіна.

Вікторыя АСКЕРА

Загаловак у газеце: З пераходным настроем

Выбар рэдакцыі

Грамадства

Як выхаваць даследчыка за школьнай партай?

Як выхаваць даследчыка за школьнай партай?

Чаму ўсе краіны, якія развіваюць інавацыйную эканоміку, робяць сёння стаўку на STЕM? 

Палітыка

Аляксандр Лукашэнка сустрэўся з прадстаўнікамі СМІ Расіі

Аляксандр Лукашэнка сустрэўся з прадстаўнікамі СМІ Расіі

Некалькі рэчаў сёлета адбываюцца ўпершыню.

Грамадства

Ці набудуць у гаспадароў старыя хаты?

Ці набудуць у гаспадароў старыя хаты?

Адэльскі сельскі савет, што ў Гродзенскім раёне, можна назваць брамай у Еўрасаюз.