Зборная Беларусі пяты раз возьме ўдзел у кантынентальным турніры. Чэмпіянат прымае Харватыя, 16 камандаў падзелены на 4 групы, адпаведна матчы папярэдняга этапу пройдуць у чатырох гарадах прымаючай краіны.
Наша зборная згуляе ў Порэчы, на самай маленькай па ўмяшчальнасці арэне турніру, спартыўны цэнтр «Жаціка» мае месцы ўсяго для 3500 гледачоў. Група «D» асталюецца ў горадзе Вараждзін, а гульні пройдуць на аднайменнай арэне, якую могуць наведаць 5200 балельшчыкаў. Матчы групы «А» пройдуць у Спліце на «Спаладыум Арэне» ўмяшчальнасцю 11 000 чалавек. Самая буйная арэна турніру размясцілася ў сталіцы Харватыі, дзе будзе выступаць група «С», а таксама пройдуць паўфінальныя матчы, гульня за 3-е месца і фінал. «Заграб Арэну» могуць наведаць больш за 15 000 гледачоў.
Цэны на білеты Еўра-2018 вар'іруюцца ад 14 еўра на групавы этап (для дзяцей — ад 7 еўра) і 60 еўра на паўфінальныя матчы. А вось каб наведаць фінал, прыйдзецца выкласці мінімум 105 еўра. Сувенірная прадукцыя ўжо паступіла ў афіцыйныя крамы, цэны тут не адрозніваюцца ад леташніх турніраў, напрыклад, майкі з лагатыпам чэмпіянату або сімволікай камандаў, якія выступаюць на Еўра, можна набыць за 15 еўра, у асартыменце таксама мячы, бірулькі і іншыя традыцыйныя сувеніры.
Афіцыйным талісманам чэмпіянату Еўропы ў Харватыі з'яўляецца сабака Тор, менавіта ён будзе забаўляць гандбольных прыхільнікаў на ўсіх чатырох арэнах турніру. Афіцыйны гімн чэмпіянату называецца «Оn thе wіngs оf vісtоrу», што ў перакладзе азначае «На крылах перамогі», яго выканала харвацкая спявачка Індзіра Левак. Энергічная мелодыя будзе суправаджаць увесь турнір.
Цікавыя факты — арганізатары Еўра-2018 выдадуць камандам 400 мячоў для трэніровак. Акрамя таго, наша «дрым-цім», як і ўсе астатнія, атрымае 30 бутэлек з пітной вадой, арганізатары высветлілі, што за трэніроўку гульцы выпіваюць каля 40 літраў вады, а за матч — да 50 літраў.
Зборная Беларусі ў рамках падрыхтоўкі да чэмпіянату Еўропы згуляла на двух турнірах. Спачатку ў Польшчы на «Кубку чатырох нацый», дзе перамагла ў паўфінале турніру японцаў (31:27) і саступіла ў фінале гаспадарам (22:26). А потым на 43-м традыцыйным міжнародным турніры «Мемарыял Дамінга Барсенаса» ў Іспаніі. Дзе саступіла пяць мячоў іспанцам і зноў прайграла Польшчы, але ўжо ўсяго адзін мяч. У заключным матчы са зборнай Аргенціны падапечныя Юрыя Шаўцова атрымалі перамогу і тым самым пакінулі за сабой другое месца на гэтым турніры.
Што датычыцца кадравага складу, то галоўнымі стратамі нашай каманды сталі Іван Броўка і Іван Мароз, якія прапусцяць чэмпіянат з-за траўмаў, астатнія ўжо сёння адправяцца ў Харватыю.
Першую гульню зборная Беларусі правядзе з аўстрыйцамі, магчыма, што менавіта гэты паядынак і стане вырашальным за выхад з групы. Бо далей беларусам будуць супрацьстаяць сапернікі значна мацнейшыя — зборныя Францыі і Нарвегіі, якія адмысловага прадстаўлення не патрабуюць. Нарвежцы — сярэбраныя прызёры леташняга чэмпіянату свету ў Францыі, а французы — алімпійскія чэмпіёны, чэмпіёны свету і Еўропы.
Будуць у Харватыі свае прадстаўнікі нашай краіны і ў судзейскім корпусе, шэраг матчаў рассудзіць пара беларускіх арбітраў — Андрэй Гуско і Сяргей Рэпкін.
Склад груп
Група А | Група В | Група С | Група D |
Харватыя | Францыя | Германія | Іспанія |
Швецыя | Беларусь | Македонія | Данія |
Сербія | Нарвегія | Чарнагорыя | Чэхія |
Ісландыя | Аўстрыя | Славенія | Венгрыя |
Расклад гульняў у групе В*
12 студзеня | 14 студзеня | 16 студзеня |
18:15 Беларусь — Аўстрыя | 18:15 Аўстрыя — Францыя | 18:15 Францыя — Беларусь |
20:30 Францыя — Нарвегія | 20:30 Нарвегія — Беларусь | 20:30 Нарвегія — Аўстрыя |
* - час мясцовы
Дар'я ЛАБАЖЭВІЧ
Канцэрт для дзяцей і моладзі, пластычны спектакль Ягора Дружыніна і «Рок-панарама».