Святочны кірмаш у Нюрнбергу прадоўжыцца, як і шмат дзе ў Еўропе, да 24 снежня. Ён праводзіцца ў гонар маленькага Хрыста, таму называецца Крыскіндэлсмаркт. Адкрыў яго 1 снежня нюрнбергскі калядны анёл, ролю якога выконвае звычайна прыгажуня ў залацістай вопратцы. Галоўная справа анёла — раздаваць падарункі паслухмяным дзецям. А для дарослых на гэтым кірмашы гатуецца палаючы пунш «Вогненны зуб». Але галоўнае, што варта набыць у Нюрнбергу, — чалавечкі з сухафруктаў.
Да 7 студзеня доўжыцца кірмаш у Бруселі. Чым там можна паласавацца? Ласосем, запечаным на вуголлях, а з салодкага — вафлямі. І калі б вы ведалі, якія гэта вафлі! Мяккія, пухнатыя фігурныя аладкі — не іначай, — пасыпаныя, аблітыя, глазураваныя самымі рознымі пасыпкамі, паліўкамі і глазурамі. Каб пакаштаваць іх усе, давядзецца ў тым Бруселі затрымацца.
Новы год у Празе — гэта вельмі рамантычна. Тамтэйшы кірмаш працягнецца да 4 студзеня. З каляднай Прагі вязіце ў якасці сувеніраў на доўгую памяць шкляны і парцалянавы посуд.
Калі хочацца пакаштаваць пайду са смальцам, трэба ехаць у Кракаў. Там гэты гіганцкі хлеб будзе чакаць вас да 26 студзеня. Акрамя яго на Галоўным рынку ў старой сталіцы прадаюцца самыя разнастайныя мясныя і малочныя стравы, без якіх Новы год у Польшчы ўвогуле ніякі не Новы год.
Нарвежская традыцыя прымушае гаспадынь выкласці на святочны стол ажно сем гатункаў пячэння. Абавязкова дамашняга. Пеперкаке, кажуць, самае смачнае з іх. Не хочаце пакаштаваць нешта незвычайна-неверагоднае? Безумоўна, усё незвычайнае і неверагоднае прадаецца там цяпер у кожнай цукерні.
Да 15 студзеня — Калядны кірмаш у Мінску. Дакладны адрас — Кастрычніцкая плошча і пляцоўка каля Палаца спорту. Нашы калядныя кірмашы не маюць такой славы, якую маюць іншыя еўрапейскія, але гэта, трэба думаць, пакуль. Радасных вам тут пакупак!
Існуюць строгія патрабаванні да месцаў для купання.
Яе песні займаюць першыя радкі ў музычных чартах краіны, пастаянна гучаць на радыё і тэлебачанні.
