Як зрабіць эканоміку ўстойлівай?

У сталіцы стартаваў «Кастрычніцкі эканамічны форум «Аснова будучыні». Дадзеная дыялогавая пляцоўка стала ўжо традыцыйнай для экспертаў і эканамістаў, якія абмяркоўваюць ўстойлівае развіццё Беларусі ў кантэксце працэсаў глабальнай эканомікі. Першы намеснік прэм'ер-міністра Васіль Мацюшэўскі адзначыў, што ва ўрадзе краіны ўважліва слухаюць экспертаў форуму і ўлічваюць іх рэкамендацыі.

Васіль Мацюшэўскі запэўніў, што Беларусь удзяляе асаблівую ўвагу вызначэнню ключавых кірункаў далейшага ўстойлівага эканамічнага развіцця. Таксама ён выказаў надзею, што форум — добрая нагода пазначыць механізмы дасягнення пастаўленых мэт па стварэнні новых драйвераў эканамічнага развіцця і шляхоў павышэння якасці жыцця насельніцтва.

Падчас форуму першы віцэ-прэм'ер закрануў пытанні перагавораў з Міжнародным валютным фондам. Па яго словах, у Беларусі няма неабходнасці ў экстранным фінансаванні і крэдыты не з'яўляюцца прыярытэтным пытаннем для краіны: «У нас збалансаваная сітуацыя, мы дастаткова абслугоўваем свае абавязацельствы. Нам не патрэбныя дадатковыя грошы. Узаемадзеянне з МВФ — гэта іншая гісторыя. МВФ традыцыйна ўспрымаецца інвестарамі, удзельнікамі рынку як глабальны аўдытар. Нам проста патрэбен дыялог з МВФ, каб яны пацвярджалі, што мы рухаемся ў правільным кірунку, што ніякіх пагроз для інвестараў няма. Вось асноўная задача». Чарговае абмеркаванне праграмы з МВФ адбылося напярэдадні.

Кіраўнік прадстаўніцтва Еўрапейскага саюза ў Беларусі Андрэа Віктарын у размове з журналістамі нагадала, што ЕС заўсёды дапамагаў і падтрымліваў перагаворны працэс Беларусі з МВФ. «Мы перакананы ў тым, што пагадненне з МВФ значна палепшыць сітуацыю ў беларускай эканоміцы, калі яно будзе дасягнута, а таксама паслужыць пазітыўным сігналам для ўсяго свету. Беларусі важна сфарміраваць станоўчы імідж і пасылаць правільныя паведамленні міжнароднай інвестыцыйнай супольнасці», — адзначыла Андрэа Віктарын.

Ілья КРЫЖЭВІЧ

krуzhеvісh@zvіаzdа.bу