Вы тут

Аляксандра Чычыкава: Я імкнуся да станоўчых змен


«У нас прыдумана так многа слоў, каб абазначыць людзей з інваліднасцю. Але перш за ўсё кожны з іх — чалавек. Дайце яму магчымасці, адкрыйце шлях да рэалізацыі — гэта і будзе шчасцем».


Так лічыць Аляксандра ЧЫЧЫКАВА, фіналістка міжнароднага конкурсу Mіss Wheelchaіr World 2017, першая беларуска, якая стала Міс свету на інваліднай калясцы. Па словах дзяўчыны, мерапрыемства ў Варшаве адрознівалася ад звычайных конкурсаў прыгажосці, а яго мэты былі больш сацыяльныя. Вярнуўшыся на радзіму, Аляксандра мяркуе правесці нешта падобнае для беларускіх дзяўчат, тым больш што такія конкурсы ўжо існуюць у Польшчы, Украіне, Расіі.

— Я хачу захаваць ідэю Mіss Wheelchaіr. Мая мэта — разбурыць унутраныя бар'еры, якія часам узводзяць для сябе людзі з фізічнымі асаблівасцямі. Будзе цудоўна, калі гэта дапаможа ім зразумець, што абмежаванняў насамрэч няма і ніхто не забараняе ім быць шчаслівымі, актыўнымі. Цяпер я атрымліваю адукацыю па спецыяльнасці псіхалогія ў БДПУ імя М. Танка. Спадзяюся, што прафесійныя веды дапамогуць у стасунках, бо пасля выпуску я хачу дапамагаць людзям з інваліднасцю, прапаноўваць ім шырэй паглядзець на магчымасці. Хацелася б працаваць пры карэкцыйным цэнтры ці грамадскай арганізацыі.

Сярод заданняў конкурсу Міс свету журы ў тым ліку прапаноўвала назваць тры праблемы на радзіме ўдзельніц, вельмі важныя для дзяўчат на калясках. На думку Аляксандры, у Беларусі гэта пытанне медыцынскага абслугоўвання, а таксама праблема займець дзіця і захаваць яго. Справа ў тым, што некаторым дзяўчатам з фізічнымі асаблівасцямі складана зацяжарыць, а пасля нараджэння немаўляці сям'ю могуць пазбавіць бацькоўскіх правоў на аснове медыцынскага заключэння. Цяжкасці ўзнікаюць і тады, калі такая пара хоча ўзяць дзіця з прытулку.

— Я імкнуся да станоўчых змен. Нельга паказаць на чыйсьці твар і сказаць, што гэта эталон. У прыгажосці мноства адценняў і вобразаў. Хочацца адшукаць іх у чалавеку і дапамагчы расквітнець.

Акрамя сустрэчы з Аляксандрай Чычыкавай на прэс-канферэнцыі адбыўся паказ адзення, пашытага па спецыяльных мерках для людзей з фізічнымі асаблівасцямі. Ідэя прыйшла дызайнеру Кацярыне Цікоце на пачатку гэтага года. На працягу некалькіх месяцаў адбывалася падрыхтоўка, і вось першая фокус-група з пяці мужчын і пяці дзяўчат на калясках прымерыла штаны адмысловага, зручнага пакрою. Удзельнікі перш за ўсё адзначылі завышаную талію, пахвалілі даўжыню калашын і ўважлівасць дызайнера да фізічных параметраў. У той жа час былі выказаны пажаданні, напрыклад па размяшчэнні кішэняў.

Пакуль што такое адзенне існуе ў дзесяці экземплярах, але распрацоўка ідзе далей. У будучыні плануюцца новыя мадэлі, пры пашыве якіх будуць улічвацца некалькі дзясяткаў асаблівых параметраў.

Рагнеда ЮРГЕЛЬ

yurgel@zvіazda.by

Фота Анастасіі Грук

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.