На гэтым тыдні адзначыў свой 80-гадовы юбілей старшыня Саюза пісьменнікаў Беларусі Мікалай Чаргінец. Урачыстасць з гэтай нагоды ўчора адбывалася ў Нацыянальнай бібліятэцы Беларусі. Павіншаваць юбіляра завіталі намеснік прэм'ер-міністра Беларусі Васіль Жарко, першы намеснік кіраўніка Адміністрацыі Прэзідэнта Максім Рыжанкоў, міністр інфармацыі Алесь Карлюкевіч, намеснік міністра культуры Ірына Дрыга, прадстаўнікі Акадэміі навук, пісьменніцкай грамадскасці, у прыватнасці Мікола Мятліцкі. У святочным канцэрце для юбіляра прынялі ўдзел кампазітар Алег Елісеенкаў, Леанід Барткевіч, гурт «СССР», Ядзвіга Паплаўская, Андрэй Разін.
Намесніца старшыні Саюза пісьменнікаў Беларусі Алена СТЭЛЬМАХ расказала карэспандэнту «Звязды»:
— З Мікалаем Іванавічам вельмі прыемна працаваць. Кожны дзень я іду на работу, думаючы, што маю шчасце зносін з такім незвычайным чалавекам. Бачу, якое кола людзей яго віншуе — і з Беларусі, і з блізкага і далёкага замежжа, — гэта сведчыць пра аўтарытэт чалавека. Яго 80 гадоў — не толькі яго дата, гэта падзея для ўсёй культурнай грамадскасці. Той унёсак, які ён зрабіў у станаўленне нашай незалежнай краіны, будучы грамадскім дзеячам і будучы пісьменнікам, вельмі важны. Колькі ён стварыў кніг, каб слова служыла людзям! І зараз ён працягвае гэтую справу, будучы старшынёй Саюза пісьменнікаў.
Кажуць, што Мікалай Чаргінец унесены ў Кнігу рэкордаў Гінеса як вельмі разнапланавы дзеяч. Ён займаўся спортам, мае дасягненні ў футболе, працаваў у органах правапарадку. Ён быў і ў парламенце, Савеце Рэспублікі, 10 гадоў прадстаўляў Беларусь у ААН. Мікалай Чаргінец з'яўляецца сустаршынёй Саюза пісьменнікаў Саюзнай дзяржавы. Ён служыў у Афганістане і мае баявыя ордэны. Увогуле гэты чалавек узнагароджаны трыма ордэнамі і больш як 60 медалямі самага рознага ўзроўню — Беларусі, Расіі, Афганістана, Югаславіі.
Учора да ўзнагарод дадалася яшчэ адна — першы намеснік міністра па надзвычайных сітуацыях Васіль Сцепаненка асабіста ўзнагародзіў Мікалая Чаргінца медалём Міністэрства па надзвычайных сітуацыях.
Дырэктар выдавецтва «Чатыры чвэрці» Ліліяна АНЦУХ адзначыла:
— Без перабольшання можна казаць пра тое, што Мікалай Чаргінец — знакавая асоба не толькі ў беларускай, але і ў сусветнай літаратуры. Яго творы перакладзены на многія мовы. Як чалавек ён адрозніваецца ад іншых сваёй уважлівасцю. Ці гэта будзе малады талент, ці праблема нейкая ў чалавека, ці знакавая падзея ў жыцці іншага — ён заўсёды адзначыць. Гэта вельмі важна і не кожнаму такое дадзена. З ім заўсёды камфортна і можна абмеркаваць любыя тэмы. А ў выдавецтве «Чатыры чвэрці» нядаўна выйшаў пераклад кнігі «Сыны» на англійскую мову. Ёсць і іншыя сумесныя задумы, якія, магчыма, з цягам часу ўдасца рэалізаваць.
Адметным падарункам да юбілею стаў пераклад адной з кніг Мікалая Чаргінца, зроблены на французскую мову. Так супала, што акурат у дзень святкавання Жан Гараньен дапрацаваў свой рукапіс па-французску. Жан Гараньен з'яўляецца прафесарам французскай мовы і літаратуры ў Францыі, Аўстраліі, таксама пэўны час выкладаў у Мінскім лінгвістычным універсітэце. Цяпер ён шмат часу праводзіць у Беларусі і адзначае, што наступны крок у рабоце з кнігай Мікалая Чаргінца — пошук выдавецтва і яе выданне.
Фота Кастуся ДРОБАВА
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».