Пракуратура Мінскай вобласці накіравала ў суд крымінальную справу ў адносінах да заснавальніка таварыства з абмежаванай адказнасцю «АўтаХоўмКомпані», больш вядомага як аўтасалон «Аўтатата». Органы папярэдняга расследавання кваліфікавалі дзеянні фірмы як махлярства, здзейсненае групай асоб у асабліва буйным памеры.
Трое яго саўдзельнікаў асуджаны па гэтай справе яшчэ ў канцы 2016 года. Двое з іх атрымалі па восем гадоў пазбаўлення волі, а трэцяя ўдзельніца — сем гадоў з канфіскацыяй маёмасці. Адзін з абвінавачаных быў затрыманы на тэрыторыі Расійскай Федэрацыі і перададзены ў Беларусь. Пра гэта паведаміла намеснік начальніка аддзела пракуратуры Мінскай вобласці Таццяна Кучынская.
Прадстаўнік пракуратуры нагадала, што двое заснавальнікаў таварыства разам з двума індывідуальнымі прадпрымальнікамі са жніўня 2012-га па снежань 2013 года распрацавалі злачынную схему па авалодванні маёмасцю грамадзян. Зламыснікі бралі нібыта на продаж аўтамабілі: заключалі з уладальнікамі дагаворы і вусныя дамоўленасці. Пры гэтым яны і не думалі выконваць узятыя на сябе абавязацельствы. Яны паведамлялі лжывую інфармацыю аб абставінах продажу аўтамабіляў, іх месцазнаходжанні, а таксама прычынах немагчымасці вярнуць гаспадарам выручаныя грошы. Прасцей — завалодвалі транспартнымі сродкамі і распараджаліся імі паводле свайго меркавання.
Ахвярамі махляроў сталі 40 чалавек, агульныя страты, нанесеныя ім, перавысілі 4,5 млрд недэнамінаваных рублёў.
Дзеючым заканадаўствам за махлярства ў асабліва буйным памеры прадугледжана пазбаўленне волі на тэрмін да 10 гадоў з канфіскацыяй маёмасці.
Таццяна ЛАЗОЎСКАЯ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».