Вы тут

Савет Міністраў падвёў вынікі работы эканомікі краіны


ВУП да таго ж перыяду 2016-га склаў 101,7% пры такім жа гадавым прагнозным паказчыку. Добра спрацавалі прамысловасць, сельская гаспадарка, гандаль, але пакуль адстаюць будаўніча-мантажныя работы. Таксама падчас пасяджэння Прэзідыума Савета Міністраў гутарка ішла пра рост заработнай платы і пенсій па ўзросце, стварэнне новых працоўных месцаў.


«У цэлым у студзені-верасні бягучага года з задачай справіліся, — заявіў прэм'ер-міністр Беларусі Андрэй КАБЯКОЎ, каментуючы сітуацыю з ВУП. — Агульная сітуацыя ў эканоміцы застаецца стабільнай, выконваюцца амаль усе ключавыя паказчыкі эфектыўнасці работы ўрада і Нацыянальнага банка». Расце вытворчасць па ВУП, працягвае павялічвацца экспарт. Збалансаваны знешні гандаль. Інфляцыя за 9 месяцаў склала 2,7%. «Гэта мінімальны паказчык за ўсю нашу суверэнную гісторыю Беларусі», — адзначыў прэм'ер-міністр.

Крэдыты для рэальнага сектара эканомікі працягваюць таннець. У верасні сярэдняя працэнтная стаўка па новых крэдытах для юрыдычных асоб склала 12,3% гадавых (у пачатку года — 20,8%). Захоўваецца тэндэнцыя росту рублёвых дэпазітаў насельніцтва — прырост на 11,9% за 9 месяцаў. Станоўчыя тэндэнцыі ў астатніх галінах эканомікі таксама захоўваюцца. У прамысловай вытворчасці рост у 6,1%, у параўнанні з мінулым перыядам паказчык не змяніўся. Сельская гаспадарка спрацавала лепш, чым летась, на 1,7%. Тут важна замацаваць вынік і выйсці па годзе на мэтавую задачу ў 102,2%, лічыць прэм'ер. «Рэальная заработная плата за восем месяцаў перывысіла ўзровень аналагічнага перыяду мінулага года на 3,2%», — паведаміў Андрэй Кабякоў.

Разам з тым узровень намінальнай заработнай платы ніжэйшы, чым прадугледжана планам-графікам па выхадзе да канца года на 1000 рублёў. За жнівень сярэдняя зарплата склала 844,4 рубля, згодна з графікам гэта павінна было быць 896 рублёў. Зарплаты ўжо выраслі ў бюджэтнікаў і ваенных, пытанне па нізкааплатных катэгорыях работнікаў бюджэтнай сферы будзе дадаткова разгледжана.

Але мэтавыя задачы выканалі не ўсе. Гэта датычыцца асобных сфер прамысловасці, а ў сельскай гаспадарцы  — абласцей: крыху недабралі Брэсцкая,  Гомельская і Мінская. Самае высокае невыкананне па секцыі будаўніцтва — яе ўплыў на ВУП -0,4%. А калі б гэты сектар працаваў на ўзроўні мінулага года, ВУП склаў бы 102,1%.

Акрамя таго, прэм'ер заклікаў актывізаваць будаўніцтва жылля з выкарыстаннем механізма субсідавання, актыўней ствараць новыя працоўныя месцы, а таксама хутчэй сабраць ураджай з палёў. «Стаўлю задачу: лён павінен быць сабраны да суботы 21 кастрычніка, да 31 кастрычніка з палёў павінна быць сабрана ўсё астатняе. Прашу губернатараў прыняць меры па пад'ёме зябліва. Араць трэба кругласутачна», — паставіў задачу кіраўнік урада.

Вераніка ПУСТАВІТ

pustavit@zviazda.by

Загаловак у газеце: Пайсці ў рост

Выбар рэдакцыі

Эканоміка

Як абараняцца ад рыэлтараў, якія не хочуць працаваць па законе

Як абараняцца ад рыэлтараў, якія не хочуць працаваць па законе

Лiцэнзiя агенцтва «Гатовыя рашэннi» скасавана, «Iмперыi нерухомасцi» — прыпынена, а «Тваёй сталiцы» выпiсана прадпiсанне.

Палітыка

Аляксандр Лукашэнка: Гэта адна з самых складаных выбарчых кампаній

Аляксандр Лукашэнка: Гэта адна з самых складаных выбарчых кампаній

Кіраўнік дзяржавы прагаласаваў на выбарах Прэзідэнта.

Палітыка

У Рэспубліцы Беларусь прайшоў асноўны дзень выбараў Прэзідэнта

У Рэспубліцы Беларусь прайшоў асноўны дзень выбараў Прэзідэнта

Сёлетнія выбары кіраўніка дзяржавы — шостыя па ліку.

Грамадства

Медыцынскі агляд у віцебскіх газавікоў ажыццяўляе... робат

Медыцынскі агляд у віцебскіх газавікоў ажыццяўляе... робат

А наведвальнiкаў крамы кансультуе выява спецыялiста.