19 Чэрвень, аўторак

Вы тут

Мох і лішайнікі: як абараніць пладовыя дрэвы


Садовыя дрэвы, пакрытыя мохам і лішайнікамі, запавольваюць рост, дрэнна пладаносяць, з часам іх галіны засыхаюць і адміраюць. Як жа абараніць дрэвы?


Працэдуры па ачыстцы дрэў варта праводзіць ранняй вясной, калі на іх яшчэ не набраклі пупышкі (звычайна ў сакавіку), і позняй восенню, калі сабраныя апошнія плады (у лістападзе). Пры гэтым перад восеньскай апрацоўкай трэба абавязкова сабраць і спаліць апалае лісце.

Калі пладовыя дрэвы, на якіх ужо распусціліся пупышкі, апрацаваць прэпаратамі, то гэта прывядзе да гібелі расліны.

Як і чым апрацаваць?

Прыгатуйце раствор жалезнага купарвасу ў прапорцыі 50 г на 1 л вады і апрацуйце ствалы і шкілетныя галіны дрэў. Праз тыдзень лішайнікі і імхі павінны адпасці самастойна. Таксама не забудзьцеся апрацаваць зямлю пад дрэвамі, бо жалезны купарвас — выдатны сродак прафілактыкі розных хвароб пладовых дрэў.

Калі на паверхні дрэў усё ж такі засталіся лускавінкі лішайнікаў і імхоў, выдаліце іх механічным спосабам. Рассцяліце пад раслінамі кавалкі плёнкі або тканіны і паскрабіце паверхню ствала і галінак драўлянай лапаткай, шчоткай або старой мешкавінай.

Пры ачыстцы пладовых дрэў не выкарыстоўвайце металічныя скрабкі: яны могуць траўмаваць кару. Кавалкі лішайніка і моху, якія адпалі, збярыце і знішчыце.

Выратуе прарэджвальная абрэзка

Калі ваш сад запушчаны моцна, практычна ўсе дрэвы пакрытыя лішайнікам і мохам, то перад пачаткам працэдуры ачысткі неабходна правесці санітарную высечку. Паколькі некаторыя дрэвы могуць быць настолькі моцна пашкоджаны лішайнікам, што чысціць іх будзе бессэнсоўна.

Старанна даследуйце кожнае дрэва і абрэжце зарослыя галінкі. Акрамя таго, не забывайце рабіць пастаяннае прарэджвальнае абразанне садовых дрэў, каб іх кроны не загушчаліся. Гэта добра паўплывае на дадатковы прыток паветра і святла. У такім садзе не будзе падвышанай вільготнасці і, адпаведна, празмерных параснікаў імхоў і лішайнікаў.

Пасля прарэджвання механічным спосабам (саскрабаннем) здыміце буйныя часткі лішайнікаў і імхоў. Затым прыгатуйце раствор меднага купарвасу: 350—500 г парашка растварыце ў 10 л вады.

Спачатку парашок купарвасу старанна размяшайце ў невялікай колькасці гарачай вады, а затым, пакрысе падліваючы халодную ваду, давядзіце да патрэбнага аб'ёму.

Гэтым саставам апрацоўваюць дрэвы гэтак жа, як і жалезным купарвасам. Апрацоўка растворам менавіта ў такой канцэнтрацыі праводзіцца адзін раз у 5 гадоў. А часам дастаткова аднаго разу — і ваш сад назаўжды пазбавіцца ад імхоў і лішайнікаў.

Лёгкі метад ачысткі

Калі вашы садовыя дрэвы не моцна пакрытыя нарастамі, то можна скарыстацца больш простым метадам чысткі: змяшайце 1 кг солі, 2 кг драўнянага попелу, натрыце ў гэтую сумесь 2 кавалкі гаспадарчага мыла, заліце 10 л гарачай вады, давядзіце да кіпення, астудзіце і абмажце атрыманым саставам ствалы дрэў.

Калі лішайнікі ў вашым садзе з'яўляюцца перыядычна, то скарыстайцеся прафілактычным антыгрыбковым прэпаратам. Яго разводзяць у адпаведнасці з інструкцыяй і наносяць на дрэвы ранняй вясной.

Пасля ачысткі неабходна правесці вапнавую пабелку ствалоў дрэў. Раствор можна прыгатаваць самастойна (1,5—2 кг гашанай вапны развесці ў 10 л вады) або выкарыстоўваць гатовыя сумесі.

Улічыце: акрылавую пабелку не рэкамендуецца наносіць на маладыя дрэвы.

Пабелку праводзяць пры сухім надвор'і (восенню або ранняй вясной) пры тэмпературы паветра не ніжэй за 2 °С. Папярэдне варта замазаць усе раны і зрэзы на дрэвах садовым варам.

Ірына ТАМКОВІЧ

Дадаць каментар

Выбар рэдакцыі

Грамадства

Калі адукацыя «захрасне» ва ўчарашнім дні, лічбавае грамадства не свеціць

Калі адукацыя «захрасне» ва ўчарашнім дні, лічбавае грамадства не свеціць

Лічбавая трансфармацыя — не мода і не часовая з'ява.