Што трэба памятаць і рабіць, каб жыццё пасля выхаду на пенсію і адключэння ад актыўнай вытворчай дзейнасці стала не горам, а радасцю?
Самае важнае — не здавацца, развіваць свае запыты і інтарэсы, займацца любімымі справамі, прысвячаць сябе таму, што сапраўды дастаўляе задавальненне.
— Для захавання здароўя і працягласці жыцця маюць значэнне рэжым працы і адпачынку, рацыянальнае харчаванне, рэгулярныя заняткі фізкультурай і спортам, адмаўленне ад шкодных звычак, — кажа ўчастковы тэрапеўт 11-й гарадской паліклінікі г. Мінска Марына НАВУМЕНКА. — Варта памятаць, што перанапружанне, стомленасць атручваюць арганізм. Праца ў пажылым узросце павінна адпавядаць патрэбам і магчымасцям арганізма, прыносіць маральнае задавальненне і захаванне фізічнай формы. Правільна арганізаваны адпачынак паляпшае настрой, выклікае задаволенасць жыццём, надае сіл і бадзёрасці. Асаблівае месца займае сон — гэта аднаўленне, нармальны тонус і ўстойлівасць нервовай сістэмы.
Класціся спаць рэкамендуецца ў адзін і той жа час, уставаць таксама.
Харчаванне павінна быць умераным і разнастайным, са зменшанай колькасцю лёгкіх вугляводаў і тлушчу, з абавязковым ужываннем кісламалочных прадуктаў, садавіны і гародніны. Агульная каларыйнасць у пажылым узросце — невысокая, 2400—2600 калорый, але пры гэтым арганізм не павінен пакутаваць ад дэфіцыту бялкоў, вітамінаў і мінеральных соляў.
Ніколі не позна пачаць абследаванне і лячэнне ва ўрача. Неабходна зрабіць рэнтген лёгкіх і страўніка, электракардыяграфію, даследаванне крыві, мачы і іншыя аналізы.
Калі не проціпаказана, можна пачаць адпаведную ўзросту гімнастыку. Заняткі хадой трэба пачынаць з невялікіх дыстанцый, ва ўмераным тэмпе. Дыхайце спакойна і глыбока. Акрамя таго, карысна падымацца і спускацца па лесвіцы, займацца тэнісам і танцамі, на велатрэнажоры, плаваць. Любыя нагрузкі лепей абмеркаваць з урачом. Апошнім часам герантолагі ўсё больш кажуць аб тым, што пажылым гімнастыка і танцы патрэбны яшчэ больш, чым маладым, — неабходна мэтанакіравана ўмацоўваць мышцы і суставы.
Для барацьбы з атэрасклерозам мозга і звязанымі з гэтым галавакружэннем, галаўным болем, бяссонніцай неабходна не толькі піць лекі, але і часцей бываць на свежым паветры, сачыць за работай страўнікава-кішачнага тракту.
Баяцца старасці бессэнсоўна. Многае ўсё ж такі залежыць ад нас саміх: колькі творчых і дзелавых людзей зрабілі рывок і трапілі ў гісторыю ў далёка не маладым узросце! Памятайце пра вялікую моц добразычлівасці і дружбы, пра «даваць, а не браць», «прапаноўваць, а не патрабаваць».
Святлана БАРЫСЕНКА
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.