Створаны сэрвіс бясплатнай арэнды рэчаў для арганізацый "Зялёная шафа"

Ён дзейнічае на базе Цэнтра экалагічных рашэнняў. Асноўная яго задача — папулярызаваць мерапрыемствы, арганізаваныя па канцэпцыі "нуль адходаў", і дапамагчы некамерцыйным арганізацыям і ініцыятывам прытрымлівацца  экалагічных прынцыпаў і падыходаў.

— Сама ідэя дзяліцца рэчамі не новая. Аналагічныя сэрвісы паспяхова існуюць як за мяжой, так і ў нас у Беларусі. Аднак мы хочам укараніць гэтыя прынцыпы ў карпаратыўную культуру кампаній нашай краіны, — патлумачыла куратар праекта, супрацоўніца праграмы па экалагічна сяброўскаму ладу жыцця Цэнтра экалагічных рашэнняў Марыя Сума. — Наш цэнтр ужо даўно дзеліцца рэчамі з арганізацыям-сябраміі: Мінскім веласіпедным таварыствам, грамадскай арганізацыяй "Ахова птушак Бацькаўшчыны", прыходам храма св.Мікалая Японскага, з такімі ініцыятывамі, як Freemarket, "Дзiцячыя майстэрні", дабрачынны праект "Калi ласка" і іншымі. Таму сэрвіс "Зялёная шаяа " не быў ўтвораны спантана.

Працуе ён проста: Цэнтр экалагічных рашэнняў прадстаўляе шматразовы посуд, мэблю, тэхніку і іншыя неабходныя для мерапрыемстваў рэчы, яго спецыялісты тлумачаць нюансы, з якімі арганізатары могуць сутыкнуцца пры выбары экалагічнага фармату, дапамагае знайсці і арандаваць рэчы, якіх у базе няма. Ад арандатара, у сваю чаргу, патрабуецца як мінімум за два працоўныя дні да мерапрыемства запоўніць заяўку на сайце цэнтра ці патэлефанаваць, заключыць дагавор і забраць рэчы, абавязкова паведаміць удзельнікам аб тым, што мерапрыемства праводзіцца па прынцыпе "нуль адходаў", ну і,канешне, вярнуць рэчы ў цэласці. 

Цэнтр экалагічных рашэнняў таксама адкрыты для супрацоўніцтва з фізічнымі асобамі і камерцыйнымі арганізацыямі, але ўмовы агаворваюцца асобна. Акрамя таго, цэнтр шукае кампаніі, якія гатовыя стаць спонсарамі рэчаў для сэрвісу "Зялёная шафа", каб падтрымаць ініцыятыву змяншэння колькасці адходаў на планеце.

Надзея НІКАЛАЕВА