Штотыдзень у эфіры тэлеканала «Беларусь 3» тэлевіктарына «Размаўляем па-беларуску». Для таго каб стаць яе ўдзельнікамі, неабходна зайсці на сайт tvrgоmеl.bу або 3bеlаrus.bу і праз банер «Размаўляем па-беларуску» запоўніць заяўку на каманду з трох чалавек. Ну, а праверыць сваё веданне роднай мовы пасля таго, як праграма выйшла ў эфір, можна з дапамогай «Звязды».
Ці ведалі вы, што:
выдма — пясчаны пагорак (па-руску скажам — дюна);
вепр — самец дзікай свінні (той самы дзік);
вонкавы (адно са значэнняў) — знешні, знадворны (можна сказаць: вонкавы выгляд, вонкавая паверхня);
хаўру́сны (размоўнае) — агульны, супольны (раней былі хаўрусныя малатарні);
хлуд — дробны хвораст, вецце («Нават і на сухім аеры ды хлудзе, нават і ў ботах, адзетаму ды пад плашчом — даволі такі холадна», — чытаем у Янкі Брыля);
хці́вец — надзвычай скупы чалавек (па-руску скажам — жадина);
прыкусіць язык — раптоўна замаўчаць, перастаць гаварыць, устрымацца ад размовы (беларусы яшчэ скажуць: павесіць замок на рот, наступіць сабе на язык; рускія: проглотить язык);
чортава процьма — вельмі многа нечага ці некага, у вялікай колькасці (беларускія сінонімы: мора разліўное, па самыя вушы, як гразі, чортава гібель, да ліха, да халеры, з горла лезе, па самую завязку, хоць заліся, як завязаць, як сабак нярэзаных; рускі адпаведнік: тьма тьмущая).
Чарговыя выпускі тэлевіктарыны глядзіце ў эфіры «Беларусь 3» раніцай кожную суботу.
Ірына АСТАШКЕВІЧ
Мерапрыемства праводзіцца на добраахвотнай аснове.
Не выявіць ні секунды абыякавасці.
Каментары