Наша краіна — адна з нямногіх і на постсавецкай прасторы, і нават у свеце, што змагла захаваць і ўдасканаліць сістэму прафесійна-тэхнічнай адукацыі. І сёння ў айчынных ліцэяў, каледжаў — зусім іншы імідж. Гэта — прэстыжна. Гэта — конкурсны адбор. Многія адразу пасля дзявятага класа вызначаюцца з будучай прафесіяй, каб потым, калі надыдзе час, ісці ва ўніверсітэт з пэўным узроўнем прыкладных ведаў.
Не толькі хлопчыкі
Пра важнасць прафесійнай адукацыі для краіны Прэзідэнт Беларусі Аляксандр Лукашэнка казаў ужо не раз. Гэта тэма абмяркоўвалася і падчас Рэспубліканскага педагагічнага савета. Тады ж, дарэчы, Прэзідэнта запрасілі ў Дзень ведаў наведаць Мінскі дзяржаўны аўтамеханічны каледж. Учора ён пабываў у названай навучальнай установе.
А паглядзець там сапраўды ёсць на што — нават кіраўніку краіны. Класы з цікавым абсталяваннем, сучасныя лабараторыі, дзе стаяць машыны ў самым розным выглядзе. Навучэнцы з дапамогай спецыяльных праграм вучацца знаходзіць паломку ў механізме аўтамабіля і максімальна хутка яе выпраўляць. Не менш важна — навучыцца самім вырабляць неабходныя дэталі для аўто.
На ўрачыстую лінейку навучэнцы прыйшлі прыгожыя, вясёлыя — і вельмі юныя. У асноўным хлопчыкі, але сёлета на першы курс паступіла і некалькі дзяўчатак-аўтааматарак. Першакурсніца Алена Радчук — родам з Кобрына — паступіла ў каледж, бо, як яна прызнаецца, «ён адпавядаў яе інтарэсам». Яна прывыкла дапамагаць бацьку рамантаваць машыны і вырашыла звязаць з гэтым жыццё. Марыць стаць аўтамеханікам, потым атрымаць вышэйшую адукацыю, а ў будучыні адкрыць уласны бізнес. Яе аднакурсніца Ганна Дзебяляк родам з Украіны. Некалькі гадоў таму яе сям'я вырашыла пераехаць на Міншчыну, у Пухавіцкі раён. Ганне падабаюцца аўтамабілі, а таксама ездзіць за рулём.
Прэстыж і перспектыва
— Пачатак новага навучальнага года — гэта заўсёды новыя надзеі, — сказаў Прэзідэнт, звяртаючыся да навучэнцаў каледжа. — Гэта новыя магчымасці, новыя адкрыцці. Асабліва важны сённяшні дзень для першакурснікаў. Наперадзе ў вас яркі, цікавы і разам з тым вельмі адказны перыяд. Вы ўжо зрабілі свой першы сур'ёзны крок у жыцці — выбралі прафесію — сапраўдную прафесію, рабочую.
Кіраўнік дзяржавы падкрэсліў: галоўны рэсурс любога прадпрыемства — не абсталяванне, якім бы сучасным і высокатэхналагічным яно ні было, а людзі. Рабочы-прафесіянал ніколі не застанецца без справы. Ён будзе запатрабаваны заўсёды, і попыт на такіх спецыялістаў пастаянна расце.
— Усё больш маладых людзей усведамляюць, што прафесійная адукацыя — гэта прэстыжна і, самае галоўнае, вельмі перспектыўна, — адзначыў Аляксандр Лукашэнка. — Штогод больш за трэць выпускнікоў школ выбіраюць ліцэі і каледжы ў якасці першай ступені прафесійнага кар'ернага росту. Сёлета на педагагічным савеце мы прынялі рашэнне аб тым, што і пры паступленні ў ВНУ мы будзем аддаваць прыярытэт тым, хто паспрабаваў, што называецца, на зуб будучую прафесію, хто ў ліцэях і каледжах зрабіў свае першыя крокі.
— Адукацыя павінна арыентавацца на патрэбнасці эканомікі, — заявіў Прэзідэнт. — Трэба рыхтаваць тых спецыялістаў, якія сёння запатрабаваны ў нашым жыцці. Дасягнуць поспеху ва ўмовах жорсткай канкурэнцыі наша краіна зможа, толькі сканцэнтраваўшы ўвесь інтэлектуальны рэсурс на стварэнні высокатэхналагічных, навукаёмістых прадпрыемстваў і інавацыйных галін.
Па словах кіраўніка краіны, жыццёва неабходна забяспечыць кваліфікаванымі работнікамі такія сферы, як будаўніцтва, перапрацоўчая прамысловасць, машынабудаўніцтва:
— Прычым нам патрэбны не проста «рабочыя рукі», а майстры сваёй справы, якія сваімі рукамі будуць ствараць дэталі, вузлы, механізмы — словам, канкурэнтаздольныя тавары заўтрашняга дня.
Прэзідэнт расказаў навучэнцам каледжа, што нядаўна яму паказалі новы камбайн «Палессе».
— Добрая тэхніка, нічым не саступае імпартным аналагам, — канстатаваў ён. — Але нам патрэбна, каб яна не проста не саступала, а пераўзыходзіла тэхніку канкурэнтаў. Ідэі і напрацоўкі ў нашых канструктараў ёсць, але, каб яны набылі рэальныя абрысы, патрэбны адукаваныя рабочыя, людзі, адданыя сваёй справе.
У падрыхтоўцы такіх кадраў вядучая роля адводзіцца прафесійна-тэхнічнай і сярэдняй спецыяльнай адукацыі.
— Мы разглядаем яе як школу фарміравання прафесіянала, грамадзяніна, патрыёта, — заявіў Аляксандр Лукашэнка. — Бо рабочы чалавек, як ніхто іншы, цэніць дасягненні свайго калектыву, прадпрыемства, сваёй краіны, цэніць мір і дабрабыт.
Звяртаючыся да выкладчыкаў, Аляксандр Лукашэнка нагадаў, што іх задача заключаецца не толькі ў падрыхтоўцы спецыялістаў, але і ў выхаванні гарманічнай асобы.
Практыкум па электракарах
У каледжы, дарэчы, ёсць лабараторыя дыягностыкі, дзе навучэнцы вывучаюць электрамабілі розных марак — іх спецыфіку, будову. Літаральна днямі тэме развіцця электратранспарту ў краіне — у прыватнасці, электрамабіляў — была прысвечана рабочая сустрэча кіраўніка дзяржавы. Безумоўна, учора яму было асабліва цікава паглядзець, з чым працуюць будучыя канструктары айчынных электракараў. Прэзідэнт прызнаўся, што для яго галоўнае ў такім аўтамабілі — надзейнасць, бяспека і даўгавечнасць. Даручэнне Аляксандра Лукашэнкі: да запуску БелАЭС у краіне павінны быць і спажыўцы такога тавару, як айчынны электракар, і — абавязкова — інфраструктура.
Падчас наведання навучальнай установы кіраўнік дзяржавы заслухаў даклад пра стан сістэмы прафесійнай адукацыі ў Беларусі. Так, зараз у нас ідзе яе аптымізацыя. Атрымаць сярэднюю спецыяльную, прафесійна-тэхнічную адукацыю можна ў каледжах, каледжах пры ВНУ, прафесійных ліцэях. Плануецца зрабіць адзіны тып установы ў гэтай сістэме — каледж. Аляксандр Лукашэнка падтрымаў такую прапанову.
Надзея ЮШКЕВІЧ
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
