У штотыднёвым спартыўным аглядзе «Звязды» расказваем пра поспехі весляроў на планетарным першынстве, падводзім вынікі адкрытага чэмпіянату краіны па летнім фрыстайле і першай дамашняй серыі мінскага «Дынама» ў новым сезоне Кантынентальнай
хакейнай лігі.
1. Шэсць медалёў заваявалі нашы спартсмены на чэмпіянаце свету па веславанні на байдарках і каноэ.
Залатыя ўзнагароды на рахунку Вольгі Худзенкі і Арцёма Козыра, на трэцюю прыступку п'едэстала падняліся ў каноэ-двойцы на 500 м Алена Наздрова і Каміла Бобр, у байдарцы-двойцы на 500 м Раман Петрушэнка і Віталь Бялько, а таксама канаіст Максім Пятроў. У заключным відзе праграмы на 5000 м Алег Юрэня таксама стаў трэцім.
У агульным медальным заліку падапечныя Уладзіміра Шантаровіча размясціліся на восьмым месцы. Першая пазіцыя ў весляроў з Германіі — 12 узнагарод (6 залатых, 5 сярэбраных і 1 бронзавая).
2. Алімпійскія чэмпіёны Сочы па фрыстайле Антон Кушнір і Ала Цупер перамаглі ў адкрытым чэмпіянаце Беларусі па скачках на лыжах у ваду.
Спаборніцтвы прайшлі ў спарткомплексе «Фрыстайл» у Мінску. У турніры прынялі ўдзел спартсмены з Беларусі, Расіі, Швейцарыі, ЗША, Казахстана, Вялікабрытаніі і Германіі.
Яшчэ адзін беларус Станіслаў Гладчанка стаў бронзавым прызёрам. Сярод жанчын акрамя Алы Цупер на п'едэстал падняліся Аляксандра Раманоўская і Ганна Гуськова. Адзначым, што адкрыты чэмпіянат краіны з'яўляецца важным этапам падрыхтоўкі нашай зборнай да зімовага алімпійскага сезона. Ён пачнецца ў снежні ў Кітаі, а турнір на Алімпійскіх гульнях у Пхёнчхане пройдзе з 15 па 18 лютага.
3. Легкаатлеткі Ірына Жук і Эльвіра Герман заваявалі «золата» і «серабро» адпаведна на Сусветнай універсіядзе ў Тайбэі.
У скачках з шастом Ірына Жук узяла вышыню 4 м 40 см і стала першай. Бягуння Эльвіра Герман на дыстанцыі 100 м з бар'ерамі паказала вынік — 13,17 сек.
Наогул, на рахунку беларускай студэнцкай зборнай у Тайбэі сем узнагарод: тры залатыя і чатыры сярэбраныя. На найвышэйшую прыступку п'едэстала акрамя Ірыны Жук двойчы ўздымаўся плывец Ілья Шымановіч. Сярэбраныя медалі ў Эльвіры Герман, Ганны Малышчык, Паўла Барэйшы і цяжкаатлеткі Дар'і Навумавай. Турнір завершыцца 30 жніўня.
Тым часам Аліна Талай з уласным лепшым вынікам у сезоне заняла трэцяе месца на турніры катэгорыі «Чэлендж» у Берліне. Дыстанцыю 100 м з бар'ерамі яна пераадолела за 12,72 сек.
4. На старце сезона хакеісты мінскага «Дынама» атрымалі тры паражэнні.
Спачатку прайгралі фінскаму «Ёкерыту» з буйным лікам 1:6, затым мінімальна саступілі «Віцязю» 0:1 і завяршылі дамашнюю серыю пройгрышам у авертайме маскоўскаму ЦСКА — 1:2.
— Безумоўна, хацелася набраць больш ачкоў. Акрамя першага, прайгранага «Ёкерыту» матча, наступныя шэсць перыядаў былі добрыя. Мы павінны прымаць лепшае з таго, што здарылася. Цяпер у нас пяць матчаў на выездзе, і трэба дадаваць ад гульні да гульні. Думаю, будзем заваёўваць свае ачкі, — пракаментаваў вынік галоўны трэнер мінскага «Дынама» Гордзі Дуаер.
Далей «зуброў» чакаюць гульні на выездзе, 30 жніўня ў Браціславе яны сустрэнуцца са «Слованам», а 2 верасня з маскоўскім «Спартаком».
5. Лідар зборнай краіны па сучасным пяцібор'і Настасся Пракапенка заваявала бронзавы медаль на чэмпіянаце свету ў Каіры.
Апярэдзіць яе змаглі Гульназ Губайдуліна з Расіі і Сафія Фолдашы з Венгрыі.
Для Настассі Пракапенкі гэта першы асабісты медаль на сусветных форумах. У бягучым сезоне яна таксама выступіла на дамашнім чэмпіянаце Еўропы, дзе заваявала «золата».
Дар'я ЛАБАЖЭВІЧ
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
