Сталічны Палац спорту 18—19 жніўня прыме этап Кубка свету па скачках на батуце. У спаборніцтвах возьмуць удзел 78 спартсменаў з 16 краін. У Мінску збяруцца практычна ўсе лідары гэтага віду спорту. Традыцыйна моцныя склады прывезлі зборныя Японіі, Украіны, Расіі, Казахстана, Італіі, ЗША і Канады.
Чэмпіён Алімпійскіх гульняў 2016 года Уладзіслаў Ганчароў на гэтым турніры апрабуе новую праграму скачкоў, з якой пазней плануе выступіць на чэмпіянаце свету. Уладзіслаў адзначыў, што настроены на перамогу, хоць сапернікі ў яго і вельмі моцныя. Намеснік старшыні тэхнічнага камітэта па скачках на батуце Міжнароднай федэрацыі гімнастыкі Дзмітрый Паляруш адзначыў, што цяпер беларускія спартсмены перасягаюць у тэхніцы многіх сваіх сапернікаў. «Я кансультую шмат краін, езджу па свеце, дапамагаю, перадаю вопыт. Некаторыя краіны ідуць па нашых слядах», — сказаў ён.
Таксама на дамашнім этапе Кубка свету Беларусь прадставіць Алег Рабцаў, Арцём Жук і Мікіта Ільіных (для яго гэта будуць першыя спаборніцтвы ў складзе нацыянальнай зборнай краіны). У жаночай камандзе выступіць Ганна Гарчанок, Марыя Махарынская і Ангеліна Хацян. А вось вопытнай Таццяне Пятрэні трэнеры далі магчымасць аднавіцца і падрыхтавацца да галоўнага старту сезона — чэмпіянату свету ў Балгарыі.
Урачыстая цырымонія адкрыцця адбудзецца 18 жніўня ў 15.30, далей пройдуць кваліфікацыі ў індывідуальных скачках. У суботу з 10 гадзін раніцы пачнуцца кваліфікацыі ў сінхронных скачках, а затым фіналы ў гэтым відзе праграмы, завершыцца турнір фінальнымі індывідуальнымі выступленнямі. Уваход на трыбуны ва ўсе дні турніру вольны.
Дар'я ЛАБАЖЭВІЧ
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.