У панядзелак, 10 ліпеня, у 18.20 у цэнтр аператыўнага ўпраўлення Смаргонскага райаддзела па надзвычайных сітуацыях паступіла паведамленне аб тым, што паблізу вёскі Белая ўзарваўся газавы балон ёмістасцю 25 літраў. У выніку выбуху пацярпелі чатыры чалавекі, з іх трое дзяцей — дзве дзяўчынкі 2002 і 2004 гадоў нараджэння, хлопчык 2011 года нараджэння і яго маці 1988 года нараджэння. Усе яны атрымалі апёкі 1—3-й ступені.
Як аказалася, адпачыць на прыродзе прыехалі тры сям'і са Смаргоні, усяго сем чалавек. Раскінулі каля возера палатачны лагер, паставілі шэзлонгі. Непадалеку ўсталявалі газавы балон, але да гарэлкі і пліты не падключалі. Каля 17.15 адбыўся выбух.
— Балон знаходзіўся за тры метры ад палаткі, — паведаміла афіцыйны прадстаўнік Гродзенскага абласнога ўпраўлення МНС Наталля Жывалеўская. — Пры выбуху пацярпелі тыя, хто знаходзіўся ў радыусе чатырох метраў. Больш за іншых пацярпелі жанчына і 15-гадовая дзяўчына, якія атрымалі апёкі 50% цела. Двое іншых дзяцей — хлопчык і дзяўчынка — апёкі 25% цела. Пацярпелыя знаходзяцца ў аддзяленні рэанімацыі цэнтральнай раённай бальніцы.
Па словах прадстаўніка МНС, корпус балона неяк раптоўна разышоўся, быццам расшыўся, і выкід газавай сумесі загарэўся. Што магло выклікаць такі працэс, пакуль невядома. Балон будзе дасканала абследаваны. Праверку няшчаснага выпадку вядзе Следчы камітэт. У МНС кожныя 3—4 гадзіны фіксуюць стан пацярпелых. Пакуль ён ацэньваецца як стабільна цяжкі.
Маргарыта УШКЕВІЧ
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
