Сёння мала хто ў вёсцы трымае свіней (не кажучы пра кароў ды коней): старыя — іх большасць — ужо не могуць, маладзейшыя — не хочуць, бо і сапраўды, навошта, калі ўсё прадаецца і можна купіць.
А некалі ж так не было, некалі вяскоўцы (ды і гараджане часам таксама) працавалі болей. Вось і рохкалі парсюкі на кожным падворку... Адзінае, закалоць і разабраць іх не ўсякі мог, так званыя байцы ў вёсках з'яўляліся. Яны гэту справу выдатна ведалі і нават любілі. Узяць хоць бы дзядзьку Міхася. З надыходам халадоў ён, можна сказаць, продыху не меў: нікому не адмаўляў, бо, па-першае, работа для яго была звычная, па-другое, тры рублі за яе на дарозе не валяліся. І зноў жа новыя людзі... А дзядзька з гаваркіх быў, любіў нейкі жарт састроіць. Бывала, на сваю ж галаву...
Значыць, неяк трапіў ён да адной кабеціны на «забойства» вепрука. Прыйшоў, як дамаўляліся, амаль усё зрабіў, а ўрэшце думаў пажартаваць: дастаў са сваёй кішэні тры рублі, схаваныя ад жонкі, скруціў іх у трубачку ды засунуў у вуха парсюку.
— Нейкі дзіўны ў цябе кабан, — разважліва сказаў гаспадыні, калі тая прыйшла па чарговы кавалак свініны, каб занесці яго ў кладоўку.
— І чым гэта? — папыталася тая.
— А ты зірні яму ў вуха. Падобна, там грошы ляжаць?
— Ды быць не можа! — не паверыла яму кабета. — Адкуль?
— Я таксама не разумею, — пачухаў патыліцу Міхась. — А галоўнае — як яны не згарэлі, калі я галаву смаліў?
— І сапраўды, — не верыла вачам жанчына, дастаўшы з вуха трубачку. — Бач, ажно тры рублі!
Гаспадыня раскруціла іх, паглядзела на прасвет, ці сапраўдныя, і раптам загаласіла:
— А мой жа ты парсючок! А мой жа ты гаротнічак! Пашкадаваў мяне, бедную: вырашыў сам за сваё забойства заплаціць? Клапатлівец ты мой... Трымай траячку, Міхась! Дзякуй табе за працу!
Вось такога павароту дзядзька не чакаў: разгублена залыпаў вачыма, залапатаў, што гэта ягоны траяк, што ён пажартаваў.
Але слухаць яго жанчына не хацела: якія жарты могуць быць з грашыма? Ды ніякіх.
Анатоль ПАЛЫНСКІ,
г. Беразіно
Мой знаёмы, які ўсё жыццё адпрацаваў у міліцыі, некалі казаў, што для таго, каб змяніць чалавечыя звычкі (а з імі, магчыма, і... жыццё), часам дастаткова аднаго выпадку.
Я тады не вельмі паверыла. А ён, каб пераканаць, расказаў пра сябе вось гэту гісторыю.
«На працы ўсе звалі мяне стараверам. І было б з-за чаго. З-за таго, што заўжды пры сабе меў лусту хлеба з салам (не еў у сталоўках ды розных забягалаўках), з-за таго, што ваду піў толькі тады, калі сам налью са студні ці з крана, прычым у свой жа кубак... Ну і з жонкай у згодзе жыў, бо гарэлкі не піў — ад яе ўсе сваркі ды звады.
Праўда, гэтак не заўсёды было.
Праца ў міліцыі пачалася ў мяне з тэрміновага задання. Начальнік райаддзела выклікаў, сказаў, што да яго паступіў сігнал: у такой вось вёсцы, па такім вось адрасе захоўваюць і прадаюць самагонку. Трэба, значыць, узяць панятых («Апроч іншых, — падказаў начальнік, — суседку з дома насупраць...») і зрабіць вобыск.
Як яго рабіць, нас вучылі ў школе міліцыі, я гэта помніў і дзейнічаў строга па правілах: запрасіў панятых, пры іх уважліва агледзелі ўсё на кухні, потым у зале... Бачу, тая суседка падміргвае: маўляў, трэба ў каморку зайсці. Ідзём... І адразу ж бачым бітон, прыкрыты нейкай адзежай. Адкрываем яго — самагонам пахне. Значыць, сігнал той праўдзівы?..
Я ўжо сабраўся пратакол пісаць, ды гаспадыня трымае ледзь не за рукі: маўляў, пабойся бога, сыночак! Гэта ж не гарэлка! Ну пакаштуй...
І сама яна жвавенька хапае кубак, нахіляецца над бітонам, набірае вадкасці... Спачатку суседцы дае.
Тая, бачу, выпіла і маўчыць — нічога не кажа.
Прыйшлося і мне той кубак узяць. Прынюхаўся, глынуў — нічога не разумею. Кажу:
— Гэта ж вада!
— Ага, дзіцятка, ты праўду кажаш, — радуецца гаспадыня. — Гэта ж на маёй радзіме звычай такі: вада, што нябожчыка мылі, сорак дзён павінна ў хаце стаяць. Толькі потым яе на магілку вязуць. І там выліваюць.
Як я не вынес дзверы, не разумею, бо з мяне фантанам паляцела ўсё — і ўчарашняе, і пазаўчарашняе...
Карацей — не выканаў я першае заданне начальніка: ні пратакола не прывёз, ні рэчавых доказаў.
...Пасля даведаўся, што тая панятая, сённяшняй мовай кажучы, ужо дастала ўсіх сваімі даносамі.
А ў жанчыны, дзе мы вобыск рабілі, у сям'і і праўда нябожчык быў (муж памёр). Так што самагонка з хаўтур у хаце заставалася, але не ў бітоне. Там гаспадыня (пра наш прыезд яе загадзя папярэдзілі) звычайную ваду трымала.
Але ж ад гэтага не лягчэй, асабліва, калі ведаеш, што «незвычайнай» могуць наліць таксама, як піць даць.
Любоў ЧЫГРЫНАВА,
г. Мінск
Усё ў прыродзе ўзаемазвязана і для нечага патрэбна. Здавалася б, крывасмокі, камары, а для жаб — найлепшы ласунак, самі жабы — для буслоў (а месцамі і для людзей), буслы...
Адзінае, чаго ніхто не есць, гэта каларадскія жукі. Ужо каторае дзесяцігоддзе мы з імі змагаемся і ўсё безвынікова. Навукоўцы, праўда, стараюцца: некалі прыдумалі хларафос. Гэта колькі ж гадкоў мы ім зямельку труцілі, труцячы і сябе?!
Адмовіліся, нарэшце, як раней і ад дусту (ён, кажуць, нібы шкло, не гніе ніколі). Дык на змену новы сродак прыйшоў — можна сказаць, чароўны: ім, маўляў, толькі раз сваю бульбу папырскаў і ўсё, дастаткова: жукі больш не з'явяцца, шкоды чалавеку ніякай...
Ну-ну... Хацелася б верыць, што жукі адчуваюць наступствы таго прэпарата, а чалавеку ён што — за вітаміны? Насамрэч, мы труцім не жукоў, мы, як толькі яны з'яўляюцца, закідваем за плечы балон з атрутай, ды ідзём «труціць... бульбу».
Дарэчы, для гэтага самы час цяпер.
Пра яго ж і гэта гісторыя. Мне яе знаёмы падпісчык «Звязды» расказаў, па прозвішчы Іваноў. Я толькі запісала.
У іх, значыць, на калгаснай «лятучцы» нейкі Талян «шафярыў» — каністры з ядахімікатамі на палі развозіў. Само сабой — нешта адліваў, дзе сабе, дзе людзям. А ў выніку многія ведалі, што ў Толі «заўсёды ёсць», многія сумленна мянялі сваю бутэльку на ягоную (праўда, з іншай хіміяй).
Але ж аднаго мужыка, мусіць, жаба задушыла. Ён у тую вясну з паўгектара бульбай засеяў. Толькі ад зямлі адскочыла — каларадскі ўссеў і так «залютаваў»... На атруту грошай не набрацца. Вось гаспадар і злаўчыўся — хоць бутэлечку, але ж сцягнуў з бардачка «лятучкі».
Толік, ну вядома ж, гэта не ўзлюбіў: захацеў правучыць тога злодзея. І прыдумаў жа як. У аграхіміка ўзяў акурат такую ж, але пустую бутэлечку са шкалой, напоўніў яе «прэпаратам» са свайго ўласнага «краніка», што ніжэй жывата, і паклаў на месца ранейшай — у бардачок. Як ведаў чалавек, што адной скрадзенай бутэлькі злодзею мала будзе: ён павінен прыйсці па другую.
І сапраўды — не памыліўся Толік (ён сваю «лятучку» спецыяльна не замыкаў, каб «на жыўца» зладзюжку злавіць): знікла «кантрольная» бутэлечка.
І — адпаведна — абодва бакі задаволены. Шафёр, што пакараў-такі злодзея, бульбавод — тым, што на халяву, можна сказаць, апрацаваў другую палову сотак. Праўда, пры гэтым ён увагу звярнуў, што ў новай бутэлечцы «хімія» крыху іншая, што ад яе, у прыватнасці, дужа мачавінай (карбамідам) нясе... «Мусіць, азотам узбагацілі», — падумаў гаспадар і паліваў сваю бульбачку ўжо не шкадуючы: 10 кубікаў на вядро — для азотнага сілкавання.
Апрацаваў, значыць, свае пасадкі, ад душы парадаваўся і жыве сабе як нічога ніякага, бо градак не бачыць (надзелы за вёскай, у полі былі)...
Аж неяк спыняе яго знаёмы. «Што з тваёй бульбай? — пытаецца. — Адна палова сотак зялёная, а другая — вочы б не бачылі, ажно чырвоная...»
Гаспадар лёцьма на поле. Убачыў свае гоні і як не самлеў: жукі на бульбоўніку аж кішаць — апошнія лісткі даядаюць...
Шкада было раслін. Але ж сябе ды сваё здароўе — не меней. «З хіміяй, — думаў чалавек, — дурныя жарты. Трэба ж неяк даведацца, што ў бутэльцы было?»
Прыйшлося яму патраціць грошы, узяць добры магарыч з закускай і пра ўсё распытаць у Толіка.
Той з ахвотай расказваў... Злодзей слухаў: свярбелі ў яго кулакі, хацелася палічыць расказчыку скабы... Але рука не паднялася, бо сам вінаваты: ніхто ж не прымушаў яго красці.
Соф'я КУСЯНКОВА,
в. Лучын, Рагачоўскі раён
Рубрыку вядзе Валянціна ДОЎНАР
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».