Ну вось і настаў час назваць імёны пераможцаў нашага творчага конкурсу для юных і маладых няштатных аўтараў, падвесці лагічную рысу пад своеасаблівым марафонам, які доўжыўся на працягу навучальнага года! Нагадаем, што ён разлічаны найперш на беларускамоўную моладзь, якая ў будучым збіраецца абраць прафесію журналіста. Адпаведна, і планка ў конкурсе, што прайшоў ужо пяты раз, даволі высокая. Але тым каштоўнейшая не толькі перамога ў ім, а і сам удзел! Спадзяёмся, што тыя няштатныя аўтары, чые «пробы пяра» прайшлі праз «сіта» рэдактараў маладзёжнага дадатку, атрымалі карысны досвед.
Усяго на конкурс цягам навучальнага года паступіла амаль 30 матэрыялаў. Апублікавана было 17 найлепшых работ, прычым у чатырох аўтараў выйшла па дзве «пробы пяра» ў рамках творчага спаборніцтва (нагадаем, умовамі конкурсу гэта дазваляецца). Найлепшыя матэрыялы, якія не адпавядалі заяўленым умовам, але падыходзілі па фармаце для маладзёжнага дадатку, друкаваліся як звычайныя журналісцкія. Напрыклад, у двух удзельнікаў, акрамя конкурсных работ, было змешчана яшчэ па адной такой «спробе пяра». Яшчэ двум няштатным аўтарам залічана ў асабістае партфоліа таксама па адным «звычайным» матэрыяле. Карацей кажучы, прамінулы час у адказных за праект выдаўся насычаным у творчым і арганізацыйным плане! Мы радаваліся допісам знаёмых аўтараў і іх росту як творцаў, прыемна здзіўляліся здабыткам навічкоў, перажывалі, калі нічога нельга было зрабіць, каб выратаваць «пробу пяра»... З многімі з удзельнікаў перапісваліся па электроннай пошце, размаўлялі па тэлефоне, даючы парады. Але час бяжыць, і пара падводзіць вынікі. Работы юных і маладых няштатных аўтараў мусілі прайсці праз суровае, але, спадзяёмся, справядлівае калектыўнае рэдакцыйнае журы.
...А цяпер, увага, самае прыемнае! Абвяшчаем імёны пераможцаў нашага традыцыйнага маладзёжнага творчага конкурсу «Я — малады. І мне не ўсё роўна!..» сезона 2016—2017 года! Першы пераможца (у алфавітным парадку) — Ірына БУБНОВА, выпускніца 10 класа СШ №12 г. Маладзечна. Дзяўчына марыць у будучыні стаць журналістам, таму наведвае гурток «Школа журналістыкі» пры цэнтры творчасці дзяцей і моладзі «Маладзік». Перамагла Іра ў нашым творчым спаборніцтве з матэрыялам «Данік, здольны весці за сабой» (22.12.2016). Што цікава, як прызнавалася сама аўтарка, дасланая на конкурс работа была яе першай «пробай пяра». Больш за тое, яна стала і першай жа адабранай да друку ў ліку іншых... І першым пераможцам мы таксама называем Ірыну Бубнову. Нехта скажа, маўляў, навічкам шанцуе? Нязгодныя, бо аўтарка пацвердзіла сваю ўпартасць у справе авалодання журналісцкім майстэрствам: у рамках конкурсу была змешчана і другая па ліку «проба пяра» дзяўчыны («Тыя паштоўкі — як крылы для мары» ад 18.05.2017).
Прадстаўляем наступнага пераможцу — Ангеліну НОВІКАВУ, выпускніцу 11 класа гімназіі №1 г. Дзяржынска. Заслужаны поспех дзяўчыне прынёс матэрыял «Калі заклікаю размаўляць на роднай мове — раблю гэта па-беларуску» (6.04.2017). Акрамя конкурснай работы, у маладзёжным дадатку «Чырвонка. Чырвоная змена» былі надрукаваны яшчэ два матэрыялы аўтаркі, тэмам якіх можа пазайздросціць не толькі абітурыент журфака (а Ангеліна, як вы, мабыць, ужо здагадаліся, таксама збіраецца паступаць у Інстытут журналістыкі БДУ), але нават і малады спецыяліст. Гэта інтэрв'ю з удзельнікам дзіцячага «Еўрабачання» ад Беларусі («Аляксандр Мінёнак: «Мару стаць сапраўдным артыстам» ад 6.10.2016) і вядомым музычным гуртам («Група «Тяни-Толкай»: «Першы ганарар — палова курыцы» ад 17.11.2016). Як той казаў, а вам слабо? Інтэрв'ю з Сашам Мінёнкам пачыналася з першай паласы маладзёжнага дадатку, што сведчыць пра інтарэс да абранай аўтарам тэмы.
Яшчэ адзін пераможца — Валянціна Трубач, выпускніца 11 класа гімназіі №10 г. Маладзечна. Ганаровую грамату яна атрымлівае за свой матэрыял «Любімцы па жыцці — коні» (8.06.2017). Гаворачы спартыўнай мовай, у дзяўчыны спрацавала другая спроба, бо апроч «пробы пяра», якая прынесла ёй лаўры пераможцы, у Валянціны была яшчэ адна, крыху ранейшая па часе («Прафесія — толькі па душы» ад 5.01.2017). Дзяўчыне вельмі падабаецца пісаць кароткія замалёўкі, эсэ, сачыненні, нататкі, таму цалкам лагічна яна сёлета збіраецца паступаць у Інстытут журналістыкі БДУ.
Усе пераможцы па традыцыі атрымалі ад «Выдавецкага дома «Звязда» ганаровыя граматы і каштоўныя сувеніры з сімволікай найстарэйшага і адзінага беларускамоўнага штодзённага выдання краіны, якое праз месяц адзначыць 100-гадовы юбілей. Апроч таго, старэйшым дзяўчатам — Ангеліне Новікавай і Валянціне Трубач, якія сёлета збіраюцца «штурмаваць» журфак, — уручаны яшчэ і рэкамендацыі для паступлення.
Віншуем усіх удзельнікаў конкурсу, асаблівыя віншаванні пераможцам і — удачы ім пры паступленні!
Надзея НІКАЛАЕВА
Сяргей РАСОЛЬКА
Фота Сяргея НІКАНОВІЧА
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.