З новым праектам выступіла Гродзенская абласная навуковая бібліятэка імя Я. Карскага. Першы сезон распачаў «Летні баль», які прайшоў на пляцоўцы каля доміка пісьменніцы.
Гасцей сустрэла сама гаспадыня. Яе вобраз выдатна ўвасобіла супрацоўніца бібліятэкі і сцэнарыст Вольга Багдановіч. Яна паведаміла, што летні баль падрыхтаваны ў адпаведнасці з традыцыямі таго часу — канца XІX — пачатку XX стагоддзя. Дата правядзення гродзенскіх сезонаў таксама выбрана невыпадкова. Па-першае, сама пісьменніца нарадзілася ў чэрвені, да таго ж роўна 110 гадоў таму яна атрымала дыплом Ганаровага грамадзяніна Гродна.
Атмасферу былых часоў удала ўвасобілі пары ў адпаведным адзенні. Уражвалі і пышныя сукенкі дзяўчат, і строгія фракі хлопцаў. Касцюмы падрыхтавалі маладыя гродзенскія дызайнеры. На адну сукенку спатрэбілася 8 метраў тканіны і 25 метраў стужак і карункаў. Пары танцавалі паланэз, кадрыль, вальс, польку. Удзельнікі балю знаёмілі прысутных з правіламі этыкету і праводзілі майстар-класы. Наведвальнікі слухалі вершы Элізы Ажэшкі на рускай, беларускай і польскай мовах.
Ініцыятыву абласной бібліятэкі падтрымалі гродзенскія пісьменнікі, народныя ансамблі польскай песні і танца «Лехіці» і «Хабры», навучэнцы гродзенскіх каледжаў мастацтва і бытавога абслугоўвання, студэнты і выкладчыкі Гродзенскага дзяржуніверсітэта імя Я. Купалы, музыканты і салісты абласной філармоніі, спонсары. Каб перадаць падзеі тых часоў, спатрэбілася падрыхтоўка, якая доўжылася некалькі месяцаў.
На думку мясцовых улад, новы праект зойме пачэснае месца ў брэндавых мерапрыемствах Гродна і будзе карыстацца поспехам як у гараджан, так і турыстаў. Дарэчы, спецыяльна на баль прыехалі госці з літоўскага горада Друскінінкай. Турыстка з Нідэрландаў зняла свята на відэа, каб паказаць сваім суайчыннікам.
Наведвальнікі балю маглі пачытаць, уладкаваўшыся на пледах, пакаштаваць гарбату на лекавых травах па рэцэпце Элізы Ажэшкі. Прысутныя гулялі ў кракет і лато, рабілі старадаўнія прычоскі, выпрабоўвалі свой лёс у латарэі. Дарэчы, сабраныя ад гэтага грошы пойдуць на навагоднюю дабрачынную ёлку для дзяцей-сірот. Гэту традыцыю, якую заклала Эліза Ажэшка, таксама ўзнавілі работнікі бібліятэкі.
У тэму:
Эліза Ажэшка, вядомая беларуская і польская пісьменніца, нарадзілася на Гродзеншчыне, дзе правяла ўсе жыццё, пахавана ў Гродне. Вуліца, дзе стаіць яе дом, названа яе імем, тут пастаўлены помнік пісьменніцы. У 1905 годзе была ў ліку намінантаў на Нобелеўскую прэмію, як і Леў Талстой, але ўзнагароду атрымаў Генрык Сянкевіч. Самы вядомы яе раман — «Над Нёманам».
Маргарыта УШКЕВІЧ
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.