2 залатыя, 21 сярэбраны і 6 бронзавых медалёў заваявала беларуская зборная ў фінале першага адкрытага Еўразійскага чэмпіянату, які прайшоў у рамках V Нацыянальнага чэмпіянату «Маладыя прафесіяналы» ў Расіі.
Рэспубліканскую каманду «WоrldSkіlls Беларусь» прадстаўлялі навучэнцы каледжаў, студэнты ўніверсітэтаў і маладыя кваліфікаваныя рабочыя ва ўзросце да 22 гадоў з розных рэгіёнаў краіны: Мінска, Гродна, Віцебска, Магілёва, Гомеля, Рагачова, Брэста, Кобрына — усяго 35 чалавек.
Залаты медаль у кампетэнцыі «Тэхналогія моды» заваявала ў Краснадары Вольга Кушнер, навучэнка Гродзенскага каледжа тэхнікі, тэхналогіі і дызайну. Свае навыкі і ўменні дзяўчына дэманстравала на працягу трох дзён. Для пачатку канкурсантам было прапанавана за восем гадзін вырабіць камізэльку на падкладцы, а пасля майстэрскага выканання задання дэкарыраваць сваю работу матэрыяламі з «тайнай» каробкі. Таксама ў рамках конкурсу малады дызайнер распрацоўвала эскізы сукенак і муляжным метадам дэкарыравала прапанаваную мадэль са складанай драпіроўкай. А яшчэ за дзевяць гадзін яна змадэлявала, раскроіла і пашыла сукенку.
У кастрычніку Вольга прадставіць нашу краіну на сусветным чэмпіянаце WоrldSkіlls у Абу-Дабі. Як і яшчэ адзін уладальнік «золата» — Іван Скорб, студэнт БДТУ, які перамог у кампетэнцыі «Вытворчасць мэблі».
Конкурс WоrldSkіlls — гэта своеасаблівыя алімпійскія гульні па розных прафесіях, якія праводзяцца кожныя два гады на працягу вось ужо 60 гадоў. У руху WSІ у цяперашні час удзельнічаюць 76 краін, якія ахопліваюць больш як 70 працэнтаў насельніцтва зямнога шара. Мэта WоrldSkіlls — папулярызацыя рабочых прафесій у сучасным грамадстве і павышэнне іх прывабнасці для моладзі.
Надзея НІКАЛАЕВА
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.