Вы тут

Дзяржаўтаінспекцыя праводзіць акцыю «Увага — дзеці!»


Спецыяльнае комплекснае мерапрыемства, галоўная мэта якога — папярэджанне дарожна-транспартных здарэнняў з удзелам дзяцей, будзе праходзіць па ўсёй краіне да пятага чэрвеня.


Пра­фі­лак­тыч­ная гуль­ня  «Го­рад бяс­печ­на­га дзя­цін­ства».

Аналіз становішча ў сферы дарожнага руху сведчыць аб тым, што менавіта ў маі—чэрвені магчыма абвастрэнне праблемы дзіцячага траўматызму. Бо, дачакаўшыся летніх канікулаў, школьнікі на тры месяцы маментальна выкідваюць з галавы не толькі старанна завучаныя нормы правапісу і табліцу множання, але нярэдка і правілы бяспечных паводзін.

Каб нагадаць дзецям і падлеткам, як належыць сябе паводзіць на дарозе, супрацоўнікі Дзяржаўтаінспекцыі сумесна з педагогамі правядуць тэматычныя мерапрыемствы, прафілактычныя гутаркі, акцыі і круглыя сталы. Акцэнт будзе зроблены на найбольш актуальных для школьнікаў розных узростаў Правілах дарожнага руху, звязаных з пераходам дарогі, катаннем на веласіпедзе, допускам да кіравання аўтамабілем і матацыклам. Падчас школьных сходаў прадстаўнікі ДАІ правядуць тлумачальную працу і з бацькамі, у прыватнасці, яна будзе датычыцца пытанняў кантролю за непаўналетнімі, пакінутых без нагляду, і правільнай перавозкі дзяцей у аўтамабілі. Па традыцыі міліцыянеры прымуць удзел ва ўрачыстых лінейках, прысвечаных святу «Апошняга званка».

Дзяржаўтаінспекцыя нагадвае ўсім кіроўцам аб неабходнасці перамяшчэння ў светлы час сутак з уключанымі на транспартным сродку блізкім святлом фар або дзённымі хадавымі агнямі (пры іх наяўнасці) у перыяд правядзення спецыяльнага комплекснага мерапрыемства (п. 166.9 Правілаў дарожнага руху Рэспублікі Беларусь). Дарожна-патрульныя службы будуць дзяжурыць паблізу месцаў масавага збору дзяцей.

26 мая пройдзе Адзіны дзень бяспекі дарожнага руху пад дэвізам: «Увага, кіроўцы! У школьнікаў канікулы!». У ходзе спецмерапрыемстваў супрацоўнікі ДАІ правядуць як прафілактычныя акцыі для дзяцей і бацькоў, так і рэйдавыя мерапрыемствы па спыненні парушэнняў Правілаў дарожнага руху. Асаблівая ўвага будзе ўдзяляцца выкананню кіроўцамі хуткаснага рэжыму, правілаў праезду пешаходных пераходаў і бяспечнай перавозкі дзяцей. Кіроўцам варта быць максімальна засяроджанымі пры руху паблізу дзіцячых устаноў, праездзе нерэгуляваных пешаходных пераходаў, прыпынкаў грамадскага транспарту і ў дварах.

З пачатку гэтага года на дарогах краіны загінулі 3 дзіцяці, яшчэ 72 непаўналетнія атрымалі траўмы. У Мінску за 4 месяцы гэтага года з удзелам дзяцей ва ўзросце да 16 гадоў — 6 дарожна-транспартных здарэнняў (-45,5% да 2016 г.), гібель дзяцей не дапушчана. 6 дзяцей-пешаходаў атрымалі цялесныя пашкоджанні рознай ступені цяжкасці.

Аналіз аварыйнасці мінулых гадоў паказвае, што дзіцячы траўматызм мае ярка выражаны сезонны характар. У сярэднім 70% атрымліваюць траўмы на дарогах у шэсць цёплых месяцаў года (з мая па кастрычнік), вялікая іх частка — улетку, калі дзеці застаюцца без нагляду педагогаў і бацькоў. У чэрвені—жніўні 2016 года ў ДТЗ загінула 7 дзяцей (у 2015 г. — 5, у 2014 г. — 11), а гэта 40% ад усіх загінулых за год.

Прафілактычныя мерапрыемствы для дзяцей і падлеткаў запланаваны і на летні перыяд. Сярод іх творчыя конкурсы, велаэстафеты, віктарыны, алімпіяды і многае іншае. Актыўна будуць задзейнічаныя і дзіцячыя аздараўленчыя лагеры, у тым ліку прышкольныя.

Аднак галоўная роля ў выхаванні дзяцей усё роўна адводзіцца бацькам. Дзяржаўтаінспекцыя заклікае дарослых стаць прыкладам безумоўнага выканання Правілаў дарожнага руху, штодзённа напамінаць дзецям аб бяспечых паводзінах на дарозе, кантраляваць іх вольны час і выключыць магчымасць доступу да ключоў ад аўтамабіляў і матацыклаў.

Штодзённая статыстыка правапарушэнняў за суткі на прыкладзе 23 мая

За адзін дзень у краіне адбылося 290 ДТЗ з матэрыяльным уронам. Здзейснена 8 ДТЗ, у якіх 8 чалавек атрымалі траўмы. За кіраванне транспартнымі сродкамі ў стане алкагольнага ап'янення затрымана 47 кіроўцаў. За перавышэнне хуткасных рэжымаў руху аштрафавана 649 кіроўцаў. Выяўлены 131 факт кіравання транспартнымі сродкамі асобамі, якія не маюць права кіравання. Выяўлена 359 кіроўцаў і пасажыраў, што праігнаравалі абавязковае патрабаванне аб прышпільванні рамянямі бяспекі. За парушэнне правілаў дарожнага руху да адказнасці прыцягнуты 425 пешаходаў, з іх 76 за адсутнасць святлоадбівальных элементаў у цёмны час сутак. 60 пешаходаў знаходзіліся ў стане ап'янення.

Дар'я КАСКО

kasko@zvіazda.by

Загаловак у газеце: Доўгачаканыя канікулы без шкоды для здароўя

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».