У сталіцы адкрыўся "Беларускі прамысловы форум-2017". Сёлета на яго пляцоўцы сустрэнуцца каля 300 беларускіх і замежных кампаній. Як адзначыў падчас цырымоніі адкрыцця намеснік прэм'ер-міністра Уладзімір Сямашка, мерапрыемства ўжо стала традыцыйным для дыскусій вытворцаў, навуковых дзеячаў і многіх іншых зацікаўленых асоб у развіцці прамысловага комплексу.
Ён нагадаў, што Беларусь па праву называлася зборачным цэхам СССР. "Сёння мы не толькі захавалі машынабудаўнічы прамысловы патэнцыял, але і прымножылі яго. Варта таксама адзначыць, што станоўча на развіццё сферы ўплывае і дыверсіфікацыя экспарту машынабудавання. Калі не так даўно да 75% гэтай прадукцыі пастаўлялася ў Расію, то сёння каля 50% ужо экспартуецца ў іншыя краіны. За апошнія 8 гадоў у сферы сельскага машынабудавання было створана прадукцыі на 23,4 млрд долараў. Прычым на пераабсталяванне айчыннай сельгасвытворчасці выдаткавалі толькі 6,8 млрд долараў. Астатняе было экспартавана ў іншыя краіны", — растлумачыў намеснік прэм'ер-міністра.
Акрамя таго, паводле яго слоў, у айчыннай машынабудаўнічай галіне сёння заказаў больш, чым магчыма вырабіць. "Гэта агульная праблема для нашых гігантаў. Было б больш абаротнага капіталу, мы б значна эфектыўней загрузілі вытворчасць", — падкрэсліў Уладзімір Сямашка. Разам з тым ён выказаў надзею, што да канца года захаваецца існуючы тэмп росту прамысловай вытворчасці, які за два месяцы дайшоў да адзнакі 103,1%, за тры месяцы — 104,3%, за чатыры — 105,4%.
Кажучы пра кропкі росту, віцэ-прэм'ер нагадаў, што адноўлены аб'ёмы паставак расійскай нафты. "У другім паўгоддзі будзе значна больш эфектыўна працаваць "Белнафтахім" па адносінах да мінулага года, калі адбылося рэзкае зніжэнне паставак нафты. Сёлета мы толькі пачалі нарошчваць аб'ёмы. Другое паўгоддзе і па аб'ёме, і па экспарце шмат у чым будзе вызначальным", — растлумачыў Уладзімір Сямашка.
Таксама ён распавёў, што не пазней канца чэрвеня ў краіне павінны ўвесці ў строй і правесці кантрольныя выпрабаванні першай прамысловай партыі легкавых аўтамабіляў, якія будуюцца на заводзе "БелДжы". Уладзімір Сямашка адзначыў, што будаўніча-мантажныя работы на заводзе выкананыя на 99,3%. Тэхналагічнае абсталяванне для асноўных і дапаможных вытворчасцей пастаўлена на пляцоўку, зманціравана і практычна адладжана. Тры базавыя цэхі: зваркі, афарбоўкі і канчатковай зборкі, выпрабавання, паводле ацэнак спецыялістаў, будуць гатовыя да правядзення тэстаў ужо 15 чэрвеня. Далей за трое сутак бесперапыннай работы павінна быць сабрана 222 аўтамабіля. Тэсціраванне дазволіць праверыць працу ўсіх цэхаў, якасць зборкі па ўсіх параметрах. "Да канца года мы павінны мець прадпрыемства магутнасцю 60 тысяч аўтамабіляў у год. Калі продажы пойдуць добра, на заводзе закладзены патэнцыял на выпуск 120 тысяч аўтамабіляў штогод", — растлумачыў віцэ-прэм'ер. У перспектыве плануецца забяспечыць узровень лакалізацыі вытворчасці не менш за 50%.
Ілья КРЫЖЭВІЧ
Мерапрыемства праводзіцца на добраахвотнай аснове.
Не выявіць ні секунды абыякавасці.