Вы тут

Беларусы выйшлі ў фінал міжнароднага музычнага конкурсу


13 мая ў Кіеве пройдзе фінал маштабнага песеннага шоу "Еўрабачанне". Што асабліва прыемна, у вялізным канцэрце мы, як і мільёны іншых гледачоў па ўсім свеце, зноў убачым нашых удзельнікаў і пачуем беларускую мову.


Другое паўфінальнае шоу, у якім выступалі беларусы, завяршылася ў ноч з чацвярга на пятніцу. Калі нашу краіну назвалі ў ліку першых шчасліўцаў з топ-10, у многіх напэўна адлягло ад сэрца: усё ж адна справа — верыць і спадзявацца на поспех, а другая — дакладна ведаць, што пасля двух гадоў няўдач задача-мінімум выкананая, і свята на нашай вуліцы працягваецца. "Гэта неверагодна! Дзякуй кожнаму з вас за падтрымку!" – напісалі артысты на сваёй старонцы ў сацсетках ці не адразу пасля абвяшчэння вынікаў. Наогул, мяркуючы па водгуках у сусветным павуцінні, нашых артыстаў падтрымлівалі землякі і проста прыхільнікі з Украіны, Расіі, Польшчы, Літвы, Чэхіі, Румыніі, Нарвегіі, ЗША і нават Катару.

Ад усяго сэрца віншуем "NaviBand" і зычым ім удачы ў фінале! Дарэчы, паводле жараб’ёўкі, якая адбылася ўчора, беларусы з песняй "Гісторыя майго жыцця" выйдуць на сцэну пад нумарам 3. Разам з імі барацьбу за галоўны прыз працягнуць канкурсанты з Балгарыі, Венгрыі, Харватыі, Даніі, Ізраіля, Румыніі, Нарвегіі, Нідэрландаў і Аўстрыі. Усяго ж, нагадаем, у фінальным канцэрце выступяць удзельнікі з 26 краін; адкрые гранд-шоу прадстаўнік Ізраілю, а завершыць — спявачка з Францыі Альма.

Букмекеры, якія апошнія некалькі гадоў загадзя прадказваюць пераможцу "Еўрабачання", дагэтуль робяць самыя высокія стаўкі на запіснога фаварыта сёлетняга конкурсу, прадстаўніка Італіі — пераможцу Сан-Рэма Франчэска Габані, які са сваёй песняй-памфлетам "Occidentali's Karma" ("Карма на заходні манер") і чорнай малпай літаральна ўзарваў еўрапейскія чарты і набраў на YouTube звыш 110 мільёнаў праглядаў. Другім найбольш верагодным прэтэндэнтам на перамогу называюць прадстаўніка Партугаліі Сальвадора Сабрала: хворы на сэрца артыст сваёй лірычнай баладай на роднай мове "Amar Pelos Dois" парадаваў вуха музычных эстэтаў і, на думку многіх крытыкаў, прадставіў самую пяшчотную і прыгожую песню на конкурсе гэтага года. Замыкае тройку лідараў прадстаўнік Балгарыі Крысціян Костаў — самы юны ўдзельнік "Еўрабачання-2017" відавочна скарыў энергетыкай і крыху змрочным абаяннем сэрцы дзявочай аўдыторыі. Таксама ў першую дзясятку, паводле прагнозаў букмекераў, трапяць артысты з Бельгіі,  Швецыі, Арменіі, Румыніі, Францыі, Вялікабрытаніі і Азербайджана. Зрэшты, настроены на барацьбу і іспанскі спявак-гітарыст Манэль Навада Кесара са сваёй лёгкай "пляжнай" песенькай і сцэнічнымі доскамі для серфінгу, больш падобнымі зверху да гаманцоў, і ўкраінскія рокеры з гурта О.Тorvald, і прадстаўніца Германіі спявачка Levina, чый глыбокі хрыплаваты голас літаральна заварожвае…

Наколькі спраўдзяцца гэтыя прагнозы і нашы чаканні — даведаемся ўжо зусім хутка. Нагадаем, нацыянальныя журы ацэнкі ўжо выставілі, а сёння ўвечары галасуюць за сваіх улюбёнцаў гледачы з усіх 42 краін-удзельніц конкурсу. Балы ад беларусаў агучыць колішняя фіналістка "Еўрабачання" Алена Ланская. Пераможца "Еўрабачання", як і летась, вызначыцца па суме балаў суддзяў і публікі, таму інтрыга мусіць трымацца да апошняй хвіліны, а вынік — спадзяёмся — акажацца ўсё ж выбарам музычным, а не палітычным.

Вікторыя ЦЕЛЯШУК

Фота БЕЛТА

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».